ފެނުމުގެ ނުކުޅުދެންތެރިކަން ހުންނަ މީހުން އިތުރު މީހެއްގެ އެހީތެރިކަމާ ނުލައި ވޯޓު ލެވޭ ގޮތަށް ފާސްކުރި ބިލާއި، ރިޔާސީ އިންތިޚާބަށް ކުރިމަތިލުމަށް މުއްދަތު އިތުރު ކުރި ބިލް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ތަސްދީގުކުރައްވައިފިއެވެ.
ރިޔާސީ އިންތިޚާބުގެ ގާނޫނަށް އިސްލާހު ގެނެސްފައިވަނީ އެ ގާނޫނުގެ ފަސް ވަނަ މާއްދާގެ (ރ) އަށެވެ. އެއީ ރިޔާސީ އިންތިޚާބަށް ކުރިމަތިލުމަށް އެދޭ މީހުން އެކަމަށް އެދި އިލެކްޝަންސް ކޮމިޝަނަށް ހުށައެޅުމަށް ކުރިން ދީފައި އޮންނަ 10 ދުވަހުގެ މުއްދަތު 14 ދުވަހަށް އިތުރުކުރުމެވެ.
އޭގެއިތުރުން، އިންތިޚާބުތަކާ ބެހޭ އާންމު ގާނޫނަށް ތިން ވަނަ އިސްލާހު ގެނައުމުގެ ބިލް ވެސް ރައީސް ވަނީ ތަސްދީގުކުރައްވާފައެވެ. އެ ގާނޫނަށް ހުށަހެޅި އިސްލާހުގައި ބުނެފައިވަނީ ޖިސްމާނީ ނުކުޅެދުންތެރިކަން ތަހައްމަލް ކުރާ އެންމެން ވޯޓު ލަމުން އައިސްފައިވަނީ އެހެން މީހެއްގެ އެހީތެރި ކަމާ އެކު ކަމަށާއި، އެކަމުގެ ސަބަބުން ފެނުމުން މަހުރޫމްވެފައިވާ މީހުންނަށް ގާނޫނުން ކަށަވަރު ކޮށްދޭ އެތައް ހައްގެއް ގެއްލޭ ކަމަށެވެ.
އިސްލާހުގައިވާ ގޮތުން ލޯފަން މީހުންނަށް ވޯޓުލެވޭނެ ގޮތަށް ހާއްސަކޮށް ޕްލާސްޓިކް ޓެމްޕްލޭޓެއް މެދުވެރިކޮށް ވޯޓު ކަރުދާހުގައި ފާހަގަޖެހޭނެ އިންތިޒާމެއް ހަމަޖައްސައިދޭން ޖެހޭނެއެވެ.
މި ދެ ބިލް ރައްޔިތުންގެ މަޖިލީހުން ފާސްކޮށްފައިވަނީ މިދިޔަ ހޯމަ ދުވަހުއެވެ.