ކިޔޭވް (13 ޖޫން 2023): ރަޝިއާ ހިފާފައިވާ ޔުކްރެއިންގެ ބިންތައް މިނިވަން ކުރުމުގެ މަގްސަދު ޔުކްރެއިން ސިފައިން ފަށާފައިވާ ކައުންޓަރު އެޓޭކް ހަމަލާތަކުގައި ހަތް ވިލެޖް މިނިވަން ކުރެވިއްޖެ ކަމަށް ޔުކްރެއިންގެ ދިފާއީ ވަޒީރުގެ ނައިބު ޣާނާ މާލިޔާ ވިދާޅުވެއްޖެއެވެ.
މާލިޔާ ވިދާޅުވި ގޮތުގައި މި ހަތް ވިލެޖްގެ ތެރެއިން ހަތަރު ވިލެޖު ނިސްބަތް ވަނީ ޔުކްރެއިންގެ އިރުމަތީގެ ސަރަހައްދެއް ކަމަށްވާ ދޮނިޔެސްކް އަށެވެ. އަނެއް ތިން ވިލެޖް ނިސްބަތް ވަނީ ޔުކްރެއިންގެ އިރު ދެކުނުގެ ޒަޕަރޫޖިއާ ސަރަހައްދަށެވެ. މާލިޔާ އިތުރަށް ވިދާޅުވި ގޮތުގައި ރަޝިއާގެ އަތްދަށުން މިނިވަންކުރެވުނު ވިލެޖްތަކުގެ ބޮޑުމިނަކީ ޖުމްލަ 90 އަކަ ކިލޯމީޓަރެވެ.
މީގެ އިތުރުން ދާދިފަހުން ރަޝިއާގެ އަތްދަށަށްދިޔަ "ބަޚްމޫތު" ސިޓީގެ 12 އަކަ ކިލޯމީޓަރުގެ ސަރަހައްދެއް ވެސް ރަޝިއާގެ އަތްދަށުން މިނިވަން ކުރެވިފައިވާކަން އޭނާ ފާހަގަ ކުރެއްވިއެވެ.
ޔުކްރެއިންގެ ދިފާއީ ވުޒާރާއިން ވަނީ މިނިވަންކުރި ތަންތަން ކަމަށް ބުނާ ބައެއް ތަންތަނުގައި ޔުކްރެއިންގެ ދިދަ ނަގާ މަންޒަރު ދައްކައިދޭ ވީޑިއޯ ތަކެއް ސޯޝަލް މީޑިއާގައި އާންމުކޮށްފައެވެ.
ޔުކްރެއިން އަކީ ރަޝިއާގެ ހަމަލާތަކުގައި އެ ގައުމަށް ލިބޭ ގެއްލުންތަކާ ބެހޭ ގޮތުން ވަރަށް މަދުން ނޫނީ ވާހަކަ ދައްކާ ގައުމެއް ނޫނެވެ. އޭގެ ބަދަލުގައި ޔުކްރެއިން ގެންގުޅެނީ ހަމައެކަނި ޔުކްރެއިން ސިފައިން ރަޝިއާގެ މައްޗަށް ކާމިޔާބު ހޯދާ ކަމަށް ބުނެ ބަޔާންތައް ދިނުމާއި ބަޔާންތައް ނެރުމުގެ ސިޔާސަތެކެވެ.
ރަޝިއާގެ އަތްދަށުން ހަތް ވިލެޖެއް މިނިވަން ކުރި ކަމަށް ޔުކްރެއިނުން ބުނިއިރު މިދިޔަ އާދީއްތަ ދުވަހު ޔުކްރެއިނުން ވަނީ ޔުކްރެއިނުން ފަށާފައިވާ ކައުންޓާ އެޓޭކް އޮޕަރޭޝަނާ ދެކޮޅަށް ރަޝިއާ ދިން ކުއްލި ހަމަލާތަކެއްގައި ޔުކްރެއިން ސިފައިންގެ ހަތިޔާރު އެޅި ފައުޖަކަށް ބޮޑެތި ގެއްލުންތަކެއް ލިބި ފަހަތަށް ޖެހެން ޖެހުނު ކަމަށް އެއްބަސްވެފައެވެ. މިގޮތަށް އެއްބަސްވުމަކީ ވަރަށް މަދުން ނޫނީ ޔުކްރެއިން ނުކުރާ ކަމެކެވެ.
ރަޝިއާ ބުނާ ގޮތުން އެ ގައުމުން ދިން އެންބުޝް ހަމަލާތަކެއްގައި ޔުކްރެއިންގެ ފައުޖު (އެ ފައުޖުގެ އަތްދަށުގައިވާ ނޭޓޯގެ ހަތިޔާރުތަކާ އެކު) ވަނީ އެއްކޮށް ހަލާކު ކޮށްލައިފައެވެ. ޔުކްރެއިންގެ މި ފައުޖު ހަލާކުވީ ޒަޕަރޫޖިއާ ސިޓީއާ ކައިރީގައި ހަރަކާތްތެރިވަމުން ދަނިކޮށް ކަމަށް ވެސް ރަޝިއާ ބުނެފައިވެއެވެ.
ރަޝިއާގެ އަތްދަށުގައިވާ ޔޫކްރައިންގެ ސަރަހައްދުތައް މިނިވަން ކުރުމަށްޓަކައި ޔުކްރެއިނުން ކައުންޓާ އެޓޭކް އޮޕަރޭޝަން ފަށާފައި މިވަނީ މީގެ ހަފްތާއެއްހާ ދުވަސްކުރިންނެވެ. މި ހަމަލާތައް ފަށާފައިވަނީ އަށެއްކަ މަސްވަންދެން އެ ކަމަށް ވާންޖެހޭ ތައްޔާރީތައް ވުމަށް ފަހުގައެވެ.
ކައުންޓާ އެޓޭކް އޮޕަރޭޝަންގައި ޔުކްރެއިން ސިފައިން ގެންދަނީ އެމެރިކާ، ޖަރުމަނު، އިނގިރޭސިވިލާތް، ޕޮލެންޑް، ޕޯޗްގަލް އަދި ސްޕެއިން ފަދަ ގައުމުތަކުގެ އެންމެ ޒަމާނީ ހަތިޔާރުތައް ބޭނުން ކުރަމުންނެވެ. ރަޝިއާގެ އަތްދަށުގައިވާ ޔުކްރެއިންގެ ބިންތަކުގެ ތެރޭގައި ހިމެނެނީ ދޮނިޔެކްސްގެ ބޮޑު ބަޔަކާއި ލޮޣާންސްކް ގެ ވަރަށް ބޮޑު ބައެކެވެ. މީގެ އިތުރުން ޒަޕަރޫޖިއާ އާއި ޚަރްސޮންގެ ބައެއް ބިންތައް ވެސް ވަނީ ރަޝިއާގެ އަތްދަށުގައެވެ.
އަދި، 2014 ވަނަ އަހަރު ރަޝިއާ ވަނީ ކުރިން ރަޝިއާގެ ބައެއްގެ ގޮތުގައި އޮތް ކްރައިމިޔާ ވެސް އަލުން އަނބުރައި ރަޝިއާގެ ބާރުގެ ދަށަށް ގެނެސް ރަޝިއާގެ ބައެއްގެ ގޮތުގައި އެ ސަރަހައްދު ހަމަޖައްސާފައެވެ. ނަމަވެސް ޔުކްރެއިން މިނިވަން ދައުލަތެއްގެ ގޮތުގައި އުފަންވި އިރު ކްރައިމިޔާ އޮތީ ޔުކްރެއިންގެ ސަރަހައްދެއްގެ ގޮތުގައެވެ. ކްރައިމިޔާ ރަޝިއާގެ އަތްދަށުން މިނިވަން ކުރުމަކީ ވެސް ކައުންޓާ އެޓޭކްގެ މަގްސަދެއް ކަމަށް ޔުކްރެއިނުން ބުނެފައިވެއެވެ.
ރަޝިޔާ ބުނާ ގޮތުން އެ ގައުމުގެ ސިފައިން ވަނީ ދޮނިޔެސްކް ސަރަހައްދުގައި ޔޫކްރޭން ސިފައިން ދޭން އުޅުނު ހަމަލާތަކެއް ނާކާމިޔާބު ކޮށްލާފައެވެ. އަދި، ޔޫކްރޭން ސިފައިން ވައިގެ މަގުން ހަމަލާދިނުމަށް ބޭނުންކުރި އެމެރިކާގެ ޑްރޯން ތަކެއް ވައްޓާލި ކަމަށް ވެސް ރަޝިއާ ބުނެއެވެ. މީގެ އިތުރުން ކަޅު ކަނޑުގައި ރަޝިޔާގެ އައްސޭރިފަށް ބަލަހައްޓަން އުޅުނު މަނަވަރަކަށް ޔޫކްރޭންގެ ކަނޑުގެ ސިފައިން ދޭން އުޅުނު ހަމަލާތަކެއް ނާކާމިޔާބުކޮށްލައި އެ ހަމަލާދޭން އުޅުނު ޔުކްރެއިންގެ ލޯންޗްތައް ވެސް ގޮއްވާލައި ބައެއް ލޯންޗްތައް ކަޅުކަނޑަށް ފައްތާލި ކަމަށް ރަޝިއާ ބުނެފައިވެއެވެ.
ރިޕޯޓްތައް ބުނާ ގޮތުން ޔޫކްރޭން ސިފައިންގެ މިހާރުގެ އެންމެ ބޮޑު އަމާޒުތަކުގެ ތެރޭގައި ރަޝިއާގެ އަތްދަށުގައިވާ ސިޓީއެއް ކަމަށްވާ މަރިއުޕޯލް މިނިވަންކުރުމާއި ކްރައިމިޔާ އާއި ޔުކްރެއިންއާ ދެމެދު އެއްގަމު މަގުން ރަޝިއާއާ ދެމެދު ބިނާކޮށްފައިވާ ބްރިޖު ހަލާކު ކޮށްލުން ހިމެނެއެވެ. މިއީ ކްރައިމިޔާއާއި ރަޝިއާ އާ ދެމެދު ކަނޑުގެ މަގުން ބިނާކޮށްފައިވާ ބްރިޖެއް ނޫނެވެ.