އިންޓަނޭޝަނަލް ޔޫނިއަން އޮފް ޔުނިވާސިޓީގެ މެންބަރަކަށް ޒިކުރާ އިންޓަނޭޝަނަލް ކޮލެޖް ވެއްޖެ

އިންޓަނޭޝަނަލް ޔޫނިއަން އޮފް ޔުނިވާސިޓީގެ މެންބަރަކަށް ޒިކުރާ އިންޓަނޭޝަނަލް ކޮލެޖް ވެއްޖެއެވެ.

މި ޖަމިއްޔާގެ މެންބަރަކަށް ވުމުގެ ޝަރުތުތަކާއި މިންގަނޑުތަކަށް ފެތޭކަން ކަށަވަރުކުރުމަށްފަހު، މި ޖަމިއްޔާގެ މެންބަރެއްގެ ގޮތުގައި ޒިކުރާ އިންޓަނޭޝަނަލް ކޮލެޖު ރަޖިސްޓްރީކޮށްދީފައިވަނީ ނިމިދިޔަ މަހުގެ 23 ވަނަ ދުވަހުއެވެ.

މައިގަނޑު ގޮތެއްގައި ޢަރަބި އަދި އިސްލާމީ ޤައުމުތަކުގެ ޔުނިވާސިޓީތަކާއި މަތީ ތަޢުލީމު ފޯރުކޮށްދޭ އެހެނިހެން މުއައްސަސާތައް ހިމެނޭ އިންޓަނޭޝަނަލް ޔޫނިއަން އޮފް ޔުނިވާސިޓީޒްގެ (އައިޔޫޔޫ) މެންބަރުންގެ ގޮތުގައި މިވަގުތުވެސް 130 ޤައުމެއްގެ 600 އަށްވުރެ ގިނަ ޔުނިވާސިޓީތަކާއި މަތީ ތަޢުލީމު ފޯރުކޮށްދޭ އެހެނިހެން މުއައްސަސާތައް ހިމެނެއެވެ.

އެ ޖަމިއްޔާގެ މައިގަނޑު މަގުސަދަކީ ޖަމިއްޔާގެ މެންބަރުންގެ ގޮތުގައި ރަޖިސްޓްރީވެފައިވާ ޔުނިވާސިޓީތަކާއި މަތީ ތައުލީމު ފޯރުކޮށްދޭ އެހެނިހެން މުއައްސަސާތަކުގެ ޢިލްމީ އަދި ފަންނީ ޤާބިލުކަން އިތުރުކުރުމާއި، ޕްރޮގްރާމްތައް ފަރުމާކުރުމަށް ބޭނުންވާ އެހީތެރިކަން ފޯރުކޮށް ދިނުމާއި، ފެންވަރު ރަނގަޅު ތަޢުލީމެއް ފޯރުކޮށްދެވޭކަން ކަށަވަރުކުރުމުގެ ގޮތުން ތައްޔާރުކުރަންޖެހޭ ގައިޑްލައިންތަކާއި ސްޓޭންޑަޑްތައް ތައްޔާރުކުރުމަށް އެހީތެރިވުމާއި، ޢިލްމީ ކޮންފަރެންސްތައް ބޭއްވުމުވެ.

މީގެ އިތުރުންވެސް އެ ޖަމިއްޔާގެ މެންބަރު ޔުނިވާސިޓީ އަދި ކޮލެޖު ތަކުގެ ދިރާސާކުރުމުގެ ދާއިރާގެ ފެންވަރު ރަނގަޅުކޮށް ގާބިލުކަން އިތުރުކުރުމާއި އެ ތަންތަނުގެ ޕްރޮގްރާމްތައް އިޝްތިހާރުކުރުމަށްވެސް އެ ޖަމިއްޔާއިން އެހީތެރިވެއެވެ.

ޒިކުރާ އިންޓަނޭޝަނަލް ކޮލެޖުން ފާހަގަކުރާގޮތުގައި އެ ޖަމިއްޔާގެ މެންބަރުކަން އެ ކޮލެޖަށް ލިބުމަކީ، ކޮލެޖުގެ ޢިލްމީ އަދި ދިރާސާކުރުމުގެ ޤާބިލުކަން އިތުރުކުރުމާއި ރާއްޖެއިން ބޭރުގެ ޔުނިވާސިޓީ އަދި ކޮލެޖުތަކާ ދެމެދު އޮންނަ ގުޅުން ހަރުދަނާކުރުމަށް ކުރަމުންދާ މަސައްކަތަށް ލިބުނު ވަރަށްބޮޑު ކުރިއެރުމެކެވެ.

އަދި މި ގުޅުމުގެ ސަބަބުން ބައިނަލްއަޤުވާމީ އެކިއެކި ޢިލްމީ ކޮންފަރެންސްތަކާއި ސެމިނާ ތަކުގައި ބައިވެރިވުމުގެ ފުރުސަތު ކޮލެޖުގެ މުވައްޒަފުންނާއި ދަރިވަރުންނަށް ލިބި މުވައްޒަފުންނާއި ދަރިވަރުންގެ ޢިލްމީ ޤާބިލުކަން އިތުރުވާނެކަމަށް އެ ކޮލެޖުން އުންމީދުކުރެއެވެ.