ފިލްމު "ބޫލް ބުލައްޔާ2"އިން ފުރަތަމަ ފަހަރަށް ކާތިކް އާރްޔަން އާއި ކިއާރާ އަދްވަނީ ފެނުމާއެކު ދެތަރިންގެ އޮން ސްކްރީން ފެނިލުން ބެލުންތެރިންނަށް ވަރަށްބޮޑަށް ކަމުދިޔައެވެ. އެއާއެކު ދުވަސްކޮޅެއްފަހުން ކާތިކް އާއި ކިއާރާގެ އިތުރު އެހެން ފިލްމެއް ނިކުންނަން އުޅޭ ޚަބަރާއެކު ސަޕޯޓަރުންނަށް އިތުރު އުފާވެރިކަމެއް ގެނެސްދިނެވެ. މި ފިލްމު ރިލީޒްވާނެ ދުވަހެއްގެ އިންތިޒާރުގައި ބެލުންތެރިން އަދިވެސް ތިބިއިރު ފިލްމުގެ ޓްރެއިލާ މި ވަނީ އާއްމުންނަށް ދައްކާލާފައެވެ.
ސިނަމާތަކުގައި ހުކުރު ދުވަހު މި ފިލްމު އަޅުވަން ނިންމާފައިވާއިރު މިއީ ދެ ތަރިންގެ ރީތި ލޯބީގެ ވާހަކައެއް ހުށަހަޅައިދޭ ފިލްމެކެވެ. "ސަތްޔަ ޕްރޭމްކީ ކަތާ"ގެ ނަމުގައި ގެނެސްދޭ ފިލްމަކީ ނުވައިދިހައިގެ އަހަރުތަކުގައި ހިންދީ ސިނަމާއިން ފެނިގެންދިޔަ ލޯބީގެ ފިލްމުތަކުގެ ޖާދޫ އަލުން ސިނަމާއަށް ގެނެސްދޭނެ ފިލްމެއްކަމަށް މިފިލްމު ގެނެސްދޭ ކުންފުނިންވަނީ ބުނެފައެވެ. ފިލްމުގެ ޓްރެއިލާއިން ލޯބީގެ ހިތްގައިމު މަންޒަރުތަކާއެކު ހިތްދަތި، ވޭނީ މަންޒަރުތަކެއް ވެސް ބެލުންތެރިންނަށް ދައްކުވައިދެއެވެ. މިއީ ރީތި ފިލްމުތައް ގެނެސްދީފައިވާ ޕްރޮޑިއުސަރު ސާޖިދު ނަދިއަދްވާލާގެ ފިލްމު ކުންފުންޏާއި ނަމަހު ޕިކްޗާސްއާއި ގުޅިގެން ގެނެސްދޭ ފިލްމެކެވެ.
ފިލްމުގެ ޓްރެއިލާ ރިލީޒްކުރުމުގެ ކުރިން މިދިޔަ މަހު ރިލީޒްކުރި ފިލްމުގެ ފުރަތަމަ ލަވައަށް ވެސް ރިލީޒްކުރިތާ މާގިނަ އިރުތަކެއް ނުވެ 29 މިލިއަން މީހުންގެ ވިއުސް ވަނީ ލިބިފައެވެ. މިހާތަނަށް ފިލްމުގެ ޓްރެއިލާއަށް 14 މިލިއަން ވިއުސް ލިބުމަކީ ފިލްމު ބެލުމަށް ގިނަބަޔަކު ކެތްމަދުވެފައިވާ މިންވަރު އެނގިގެންދިޔަ ކަމެއްކަމަށް ފިލްމުގެ ކްރޫ ޓީމުން ވަނީ ބުނެފައެވެ. ކާތިކް އާއި ކިއާރާގެ އިތުރުން ފިލްމުން ފެންނާނެ އިތުރުން ތަރިންގެ ތެރޭގައި ސުޕްރިޔާ ޕަތަކް، ޝިކާ ތަލްސާނިއާ، ރާޖްޕަލް ޔާދަވް އަދި ނިރުމީތު ސާވަންތު ހިމެނެއެވެ. މި ފިލްމުގެ އިތުރުން ކާތިކް އާއި ކިއާރާ ވަނީ "ބޫލް ބުލައްޔާ3"އަށް ވެސް ސޮއިކޮށްފައެވެ. މިފިލްމުގެ މަސައްކަތް ފަށާނެ ވަކި ތާރީޚެއް އަދި އިއުލާނުނުކުރެއެވެ.