ޒަމާނީ ހިދުމަތްތަކަކާއިއެކު މޯލްޑިވްސް އިސްލާމިކް ބޭންކު (އެމްއައިބީ) އިން އައު ވެބްސައިޓެއް ލޯންޗްކޮށް، އެ ބޭންކުގެ ހިދުމަތް ހޯދާ ފަރާތްތަކަށް ލުއި ފަސޭހަ ކަމާއިއެކު ހިދުމަތް ހޯދޭނެ މަގު ތަނަވަސް ކޮއްދީފިއެވެ.
އެމްއައިބީން ބުނި ގޮތުގައި މިއީ އެ ބޭންކުގެ ޚިދުމަތް ބަދަލު ކޮއްލާނެ ވެބްސައިޓެކެވެ. އެގޮތުން މުޅި ވެބްސައިޓު ފަރުމާ ކޮށްފައި ވަނީ ފަސޭހަ ކަމާއިއެކު މައުލޫމާތު އަމިއްލައަށް ހޯދާ ލިބިގަނެވޭނެ ގޮތަށް ކަމަށް އެ ބޭންކުން ބުންޏެވެ.
އެމްއައިބީގެ އައު ވެބްސައިޓުން މައުލޫމާތު ހޯދުމުގެ އެކި މަގު ކަސްޓަމަރުންނަށް ފަހި ކޮށްދީފައިވެއެވެ. އެގޮތުން އާންމު ސުވާލާއި ޖަވާބު ވަރަށް ތަފްސީލުކޮށް ލިޔެފައިވާއިރު، ބޭނުންވާ ކަންކަމާއި ގުޅޭ ސުވާލުތައް ވަނީ ވަރަށް ތަރުތީބު ކަމާއިއެކު އަތުރާލައިފައެވެ.
މި ވެބްސައިޓާއިއެކު އެމްއައިބީ ކަސްޓަމަރުން ބޭންކާއި މުއާމަލާތު ކުރާގޮތަށް ބޮޑު އިންގިލާބެއް އަންނާނެ ކަމަށް އެމްއައިބީން ބުންޏެވެ. އެގޮތުން ވެބްސައިޓުގައި ހިމެނޭ އޭއައި ޗެޓް ބޮޓް މެދުވެރިކޮށް އެކި ސުވާލާއި ޖަވާބު 24 ގަޑިއިރު ހޯދޭނެއެވެ. އަދި 24 ގަޑިއިރު ބޭންކުގެ ކަސްޓަމާ ކެއާ ސްޓާފުންނާއި ޗެޓު ކުރެވޭނެއެވެ. އެހެންކަމުން ބޭންކާއި ނުގުޅިގެން ދެން އުޅޭކަށް ނުޖެހޭނެ ކަމަށް އެމްއައިބީން ބުންޏެވެ.
އޭގެ އިތުރުން ވިޔަފާރި އަދި އެހެނިހެން ފައިނޭންސިން ފެސިލިޓީތަކާއި ބެހޭ މައުލޫމާތު ހޯދުމަށް ވެސް މި ވެބްސައިޓުން ހައްލު ގެނެސް ދޭނެ ކަމަށް، ރާއްޖޭގެ ފުރަތަމަ އިސްލާމިކް ފައިނޭންސިން ބޭންކުން ބުނެފައިވެއެވެ.
އެގޮތުން އިތުރު މައުލޫމާތު ބޭނުންވާނަމަ ހާއްސަ ކޮންސަލްޓޭޝަން ސެޝަންއަކަށް އެދެވިދާނެއެވެ. އަދި ބޭންކުން ވަކި ހިދުމަތެއް ހޯދުމަށް ނުވަތަ އެހެން މައުލޫމާތެއް ބޭނުންވާނަމަ ކަސްޓަމަރު އަމިއްލައަށް ޓިކެޓެއް އުފެއްދުމުން، ބޭންކުން މި ޓިކެޓަށް ޖަވާބު ދޭނެއެވެ.
އައު ވެބްސައިޓުން އެމްއައިބީ ފައިސާނެޓް އަދި އެޕްލައިނައު ޕޯޓަލްއަށް ފަސޭހަކަމާއިއެކު ވެދެވޭނެއެވެ. މިހާރު އެ ބޭންކުން ދަނީ އެޕްލައިނައު ޕޯޓަލް އަޕްގްރޭޑްކުރުމުގެ މަސައްކަތް ކުރަމުންނެވެ. އަޕްގްރޭޑް ނިމުމުން ނިގަ ހިދުމަތްތަކަކަށް ކަރުދާސް ފޯމު ފުރުމުގެ ބަދަލުގައި ޑިޖިޓަލްކޮށް އެދެވޭނެއެވެ.
އެމްއައިބީއަކީ ދިވެހިންގެ މެދުގައި މަގްބޫލު ބޭންކެކެވެ. ހާއްސަކޮށް އެ ބޭންކުގެ އުޖާލާ ދިރިއުޅުން ފެސިލިޓީއަކީ ރާއްޖޭގެ އެންމެ މަގްބޫލުއެއް ރީޓެއިލް ފައިނޭންސިން ސްކީމެވެ. އެމްއައިބީއިން ވަނީ ދާދި ފަހުން ފައިސާނެޓް އަޕްގްރޭޑުކޮށް ބޮޑެތި ހެޔޮ ބަދަލުތަކެއް ގެނެސްފައެވެ.
އެހެންކަމުން ވެބްސައިޓާއިއެކު މި ގެނެވުނު ބަދަލުވެގެންދާނީ އެ ބޭންކުގެ ހިދުމަތް ހޯދާ ފަރާތްތަކަށް ބޮޑެތި ލުއި ފަސޭހަތަކެއް ގެނެސްދޭނެ ބަދަލަކަށް ވާނެ ކަމަށް އެމްއައިބީން އުއްމީދުކުރެއެވެ.