މީގެ މަހެއްހާ ދުވަސް ކުރިން އަނިޔާވެރި ގޮތަކަށް މަރާލި, ނ. މަނަދޫ ނައީމާ މޫސާގެ މަރާ އެކު އެ ރަށް ވެއްޓުނީ ބިރުވެރިކަމެއްގެ ތެރެއަށެވެ. މުޅި ރަށް ހިމޭންވީއެވެ. މަގުތައް ފަޅުވީއެވެ. ގާތިލު ރަށުގައި މިނިވަންކަމާ އެކު އުޅެމުން ދިޔައިރު ސިހުރާ ގުޅިފައިވާ މަރެއްކަމަށް ބުނެ ދެކެވުނު ވާހަކަތާ އެކު މުޅި ރަށް އޮތީ 'ގުޑައިލަން' ނުކެރިފައެވެ.
އޭރު ފުލުހުންގެ ތަހުގީގަށް މާ ބޮޑު ކުރިއެރުންތަކެއް ނުލިބުނު ނަމަވެސް މި ފަހުން އެ މަރާ ގުޅޭ ގޮތުން ހޯދުނު ކަންތައްތަކަކީ ހަމައެކަނި ތަހުގީގަށް ލިބުނު ކުރިއެރުމެއް ނޫނެވެ. މިއީ ރަށު ރައްޔިތުންނަށް މަސް ދުވަހަކަށް ފަހު ލިބުނު އުފަލެކެވެ. ހިތްހަމަޖެހުމެކެވެ.
ނައީމާގެ މަރުގެ ތުހުމަތުގައި 23 އަހަރާއި 21 އަހަރުގެ ދެ ޒުވާނުން މިހާރު މިވަނީ ހައްޔަރު ކޮށްފައެވެ. އެ ތިން މީހުންނަކީ ވެސް މަސްތުވާތަކެތީގެ މައްސަލަތަކުގެ ތުހުމަތު ކުރެވޭ މީހުންނެވެ.
އެ ރަށުން ވާހަކަދެއްކި މީހަކު ބުނި ގޮތުގައި މިހާރު ރަށުގެ ރައްޔިތުން މަގުތަކަށް ނުކުމެ އުޅެެއެވެ. އަދި، ކުރިން އޮތް ބިރުވެރިކަން ނެތުމުން އިގްތިސާދީ މަސައްކަތްތައް ރަށު ތެރޭ ކުރިއެކޭ އެއްގޮތަށް އަލުން ހިނގަމުން އަންނަ ކަމަށް ބުންޏެވެ.
އެގޮތުން ރަށުގެ ގިނަ އަންހެނުންނަކީ އާމްދަނީ ހޯދަން އޮށްކެޔޮ ހޮވުމާއި، ފަންވިނުން ފަދަ މަސައްކަތް ކުރާ ބަޔަކަށްވާއިރު ކުރިން އޮތް ބިރުވެރިކަމުގެ މާހައުލުގައި އެ ކަން އޮތީ ހުއްޓިފައެވެ.
ނަމަވެސް މިހާރު އަލުން އަންހެނުން ވެސް މަދުމަދުން މަސައްކަތް ކުރަމުން އަންނަކަމަށް ބުންޏެވެ.
"އާންމުކޮށް ފަތިހާއި ހަވީރު އަންހެނުން ވަލު ތެރެއަަށް ގޮސް އުޅެނީ މަދު[އޮށްކެޔޮ] ހޮވާށާއިި ދެން ވެސް މިހެން ހުންނަ މަސައްކަތްތަކަށް. މިއަދުން ފެށިގެން ހަމަ ވަރަށް ގިނަ ބަޔަކު ފަށައިފި މަސައްކަތް ވެސް ހަމަ،" އެ ރަށުން ވާހަކަދެއްކި މީހާ ބުންޏެވެ.
ގިނަ ބައެއްގެ ތުހުމަތު އަދިވެސް ސިހުރުގެ ކަމެއްކަމަށް
ނައީމާ މަރައިލުމުގައި ބައިވެރިވި ކަމަށް ތުހުމަތު ކުރެވޭ ތިން މީހަކު ހައްޔަރުކޮށްފައިވާއިރު އެކަކު އެ ކަމަށް އިއުތިރާފު ވެސް ވެފައިވެއެވެ.
ނަމަވެސް ނައީމާގެ މަރުގެ ތުހުމަތުގައި ހައްޔަރުކޮށްފައިވަނީ ޒުވާނުންތަކެއް ކަމަށްވާއިރު ނައީމާ މަރައިލާ ހިސާބަށް ކަންކަން ދިޔައީ ކިހިނެއްތޯ ރަށުގެ އެއްވެސް މީހަކަށް ނުވިސްނެއެވެ.
މަސްތުވާތަކެތީގެ ރެކޯޑު އެ ޒުވާނުންގެ އޮތްއިރު އެއީ ފައިސާގެ ބޭނުމުގައި ކުރި ކަމެއްނަމަ ނައީމާގެ ފޯނާއި، ގަހަނާފަދަ ތަކެތި ނުގެންގޮސް ބެހެއްޓި ސަބަބަކާ މެދު ވެސް އާންމުން ސުވާލު އުފައްދައެވެ.
ރަށުން ވާހަކަދެއްކި މީހުންނަށް ވިސްނެނީ އެއީ ބަދަލު ހިފުމުގެ ރޫހުގައި ކުރި ކަމެއްގެ ގޮތުގައެވެ. މި ކަމުގައި ތުހުމަތުކުރެވޭ ގާތިލުންގެ ސީދާ މަގްސަދެއް ހާމަވާނީ ފުލުހުންގެ ތަހުގީގުންނެވެ.
ނަމަވެސް އަދިވެސް އަޑުގަދަކޮށް ދެކެވޭ އެއް ވާހަކައެއް އެބައޮތެވެ. އެއީ، މި މަރާއި ސިހުރާ ގުޅިފައިވާ ކަމަށް ބުނެ ދައްކާ ވާހަކައެވެެ.
"އަޅުގަނޑަށް ހަމަ ޕާސަނަލީ ގަބޫލުކުރެވެނީ މިއީ ސިހުރާ ގުޅިފައި އޮތް ކަމެއްކަމަށް. އެއީ ނައީމާއަކީ އިހަކަށް ދުވަހެއް ނޫން، މާ ކުރިން އޭނާއާ މެދު ސިހުރުގެ ތުހުމަތުކުރެވޭ މީހެއް،" ނަން ނުޖަހަން ޝަރުތުކޮށް އެ ރަށުން ވާހަކަ ދެއްކި މީހަކު ބުންޏެެވެ.
އޭނާ އިތުރަށް ކިޔައިިދިން ގޮތުގައި ނައީމާގެ ގޭތެރެއިން ވަނީ އަންހެނުންގެ އިސްތައްޓާއި، ފައިވާނުގެ ވަދާއި، ނިޔަފަތި ފަދަ ތަކެތި ގިނަ އަދަދަކަށް ފެނިފައެވެ.
އެއީ މި މަރުގެ މައްސަލާގައި އެ ރަށުން ގާތްގަނޑަކަށް 400އާ ގާތްކުރާ އަދަދަކަށް އަންހެނުންގެ ސާމްޕަލް ނެގި ސަބަބެއް ކަމަށް އޭނާ ބުނެއެވެ.
އިތުރު މީހަކު ބުނި ގޮތުގައި އަދިވެސް ރަށު ތެރޭ މަރުގައި ބައިވެރިވި ބައެއް މީހުން ދޫވެފައި ތިބެދާނެއެވެ. އެ ފަދަ ވާހަކަތަކެއް ދެކެވެއެވެ.
ނަމަވެސް މިއީ ހުސް 'ތޯތޯ' ވާހަކަ ކަމަށް އޭނާ ބުންޏެވެ. އެ ކަން ހާމަވާނީ ފުލުހުންގެ ތަހުގީގު ކުރިއަށްދާ މިންވަރަކުންނެވެ.