ރާއްޖޭގައި ހުރި ޑިޖިޓަލް ކަންބޮޑުވުންތަކުގެ އެންމެ ކުރީ ސަފުގައި އޮތީ ޑޭޓާ ޕްރޮޓެކްޝަން ކަމަށް އެންވަރަމެންޓް މިނިސްޓަރު އައިމިނަތު ޝައުނާ މިއަދު ވިދާޅުވެއްޖެއެވެ.
މިއަދު ކުޑަބަނޑޮސްގައި ފެށި "މޯލްޑިވްސް ފައިނޭންސް ފޯރަމް" ފެށުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު މިހެން ވިދާޅުވީ މި އަހަރުގެ ފައިނޭންސް ފޯރަމް ޚާއްސަކޮށްފައިވާ ފައިނޭންޝަލް ޓެކްނޮލޮޖީސް (ފިންޓެކް) އާއި އާޓިފިޝަލް އިންޓެލިޖެންސް (އޭއައި) އަށް ރިއާޔަތްކުރައްވަމުންނެވެ.
މި ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ ރާއްޖޭގައި ހުރި ޑިޖިޓަލް ކަންބޮޑުވުންތަކުގެ އެންމެ ކުރީ ސަފުގައި އޮތީ ޑޭޓާ ޕްރޮޓެކްޝަން ކަމަށާއި، އެކަން ހައްލު ކުރުމަށް ޕްރައިވެސީ އެންޑް ޑޭޓާ ޕްރޮޓެކްޝަން ބިލް އާންމުންގެ މަޝްވަރާއާ އެކު ޑްރާފްޓް ކުރަމުން އަންނަ ކަމަށެވެ.
ޝައުނާ ވިދާޅުވީ ސަރުކާރުގެ އަމާޒަކީ ޑޭޓާ ސޭފްޓީ ހަރުދަނާކުރުން ކަމަށެވެ.
އަދި އެ ބިލުގެ މަސައްކަތްތައް ނިމުމުން، އެ ބިލަކީ ރައްކާތެރި ޑިޖިޓަލް މުއާމަލާތްތަކަށް ޔަގީންކަމެއް ލިބޭނެ ބިލެއް ކަމަށް މިނިސްޓަރު ވިދާޅުވިއެވެ.
މޯލްޑިވްސް ފައިނޭންސް ފޯރަމް ފެށުމުގެ ރަސްމިއްޔާތުގައި އެންވަރަމެންޓް މިނިސްޓަރު އައިމިނަތު ޝައުނާ ވާހަކަދައްކަވަނީ --- ފޮޓޯ/ ޕެންޝަން އޮފީސް
މިނިސްޓަރު ވިދާޅުވީ ފިންޓެކް އަދި އޭއައި ސްޓާޓްއަޕްތަކަށް ސަރުކާރުގެ ފަރާތުން ފުރިހަމައަށް އެއްބާރުލުން ދޭ ކަމަށާއި، ރާއްޖެ ބޭނުންވާ ފަދަ އުންމީދީ ޑިޖިޓަލް މުސްތަގުބަލަކަށް ޓަކައި އުމްރާނީ ތަރައްގީއަށް ސަރުކާރުން މުހިއްމު އިސްކަމެއް ދޭ ކަމަށެވެ. އެގޮތުން ސަރުކާރުގެ އެންމެ ބޮޑު އަމާޒަކީ ރާއްޖޭގެ މުއައްސަސާތައް ހަރުދަނާކޮށް، ރާއްޖޭގައި ކުރިއަރަމުން އަންނަ ފިންޓެކް އިކޯސިސްޓަމެއްގެ ބިންގާ އެޅުން ކަމަށް ޝައުނާ ވިދާޅުވިއެވެ.
މިނިސްޓަރު އިތުރަށް ވިދާޅުވީ ޑިޖިޓަލް ޓްރާންސްފޯމޭޝަނަށް އަހުލުވެރިވުމަށްޓަކައި ހަރުދަނާ ރެގިއުލޭޓަރީ ފްރޭމްވޯކެއް ބިނާކުރުމަށް ސަރުކާރުން އިސްކަން ދޭ ކަމަށެވެ. އަދި އެކަމުގެ ތެރެއިން ނިމިދިޔަ އަހަރު ވުޖޫދުވި އިލެކްޓްރޯނިކް ޓްރާންސެކްޝަންގެ ގާނޫނަށް ރިއާޔަތްކުރައްވާ މިނިސްޓަރު ވިދާޅުވީ އެ ގާނުނުގެ ސަބަބުން އިލެކްޓްރޯނިކް މުއާމަލާތްތަކާއި ސޮއިތަކާއި ކޮންޓްރެކްޓްތަކަށް ގާނޫނީ ހައިސިއްޔަތު ލިބުނު ކަމަށެވެ.
"އެ ގާނޫނަކީ ރާއްޖޭގައި ފިންޓެކް ގެ ކުރިއެރުމާއި ފުޅާކުރުމަށް ކުރެވުނު މުހިއްމު ކަމެއް، މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ ފިންޓެކްގެ މުސްތަގުބަލަށް ބަދަލުވުމަށް ރާއްޖެ ތައްޔާރަށް އޮތް ކަމަށެވެ. އެގޮތުން ނިމިދިޔަ އަހަރު ކުރެވުނު ނޭޝަނަލް ފައިނޭންޝަލް އިންކްލޫޝަން ސާވޭ އިން ރާއްޖޭގައި މޮބައިލް އިންޓަނެޓް ބޭނުންކުރުމާއި މޮބައިލް ބޭންކިން އަކީ ވަރަށް ފުޅާ ދާއިރާއެއްގައި ބަލައިގަންނަ އެއްޗެއް ކަން ހާމަވި ކަން މިނިސްޓަރު ފާހަގަކުރެއްވިއެވެ.
މޯލްޑިވްސް ފައިނޭންސް ފޯރަމް" ފެށުމުގެ ރަސްމިއްޔާތުގައި އެންވަރަމެންޓް މިނިސްޓަރު އައިމިނަތު ޝައުނާ ވާހަކަދައްކަވަނީ --- ފޮޓޯ/ ޕެންޝަން އޮފީސް
"ނޭޝަނަލް ފައިނޭންޝަލް އިންކްލޫޝަން ސާވޭ 2022 އިން ދައްކާ ގޮތުގައި މޮބައިލް އިންޓަނެޓް ބޭނުންކުރުމާއި މޮބައިލް ބޭންކިން އަކީ ވަރަށް ފުޅާ ދާއިރާއެއްގައި ބަލައިގަންނަ އެއްޗެއް. މި ތައްޔާރީގެ ސަބަބުން ވަރުގަދަ މެސެޖެއް ދޭ. މިއީ ފިންޓެކް މުސްތަގުބަލަށް ފުންމާލަން ރާއްޖެ އޮތީ ތައްޔާރަށް ކަން ހާމަކޮށްދޭ ކަމެއް،" މިނިސްޓަރު ވިދާޅުވިއެވެ.
މިއަދު ފެށި މޯލްޑިވްސް ފައިނޭންސް ފޯރަމަކީ މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން އިންތިޒާމުކޮށްގެން ކޮންމެ އަހަރަކުވެސް ބާއްވާ އިވެންޓެކެވެ. މިއީ 10 ވަނަ ފޯރަމެވެ.
މި ފޯރަމުގައި ފިންޓެކް އަދި އޭއައިގެ ސަބަބުން މާލީ ދާއިރާގައި ބޭނުންކުރާ ބަދަލުތަކާއި އަދި އަންނަމުންދާ ބަދަލުތަކުގެ ސަބަބުން ރާއްޖޭގެ މާލީ ދާއިރާއަށް ހުރި ހިރާސްތަކާއި އަދި ފުރުސަތުތަކާ މެދު މަޝްވަރާ ކުރުމަށް ވަނީ ހަމަޖެހިފައެވެ.
މި ފޯރަމްގެ މައިގަނޑު މަޤްސަދަކީ މާލީ ސިނާއަތުގައި މަސައްކަތް ކުރާ ފަރާތްތަކަށް ދިވެހި ރާއްޖޭގެ މާލީ ދާއިރާއާ ގުޅުންހުރި އެންމެ ފަހުގެ ކަންކަމާ ބެހޭގޮތުން މަޝްވަރާކޮށް މައުލުމާތު ހޯދުމުގެ ފުރުސަތު ފަހިކޮށްދިނުމެވެ.
އެގޮތުން މޯލްޑިވްސް ފައިނޭންސް ފޯރަމަކީ ރާއްޖޭގެ މާލީ ދާއިރާގެ އިސްފަރާތްތަކާއި އެކި ތަޖުރިބާކާރުން އެއްތަނަކަށް އެއްކޮށް، ރާއްޖޭގައި ބާއްވާ އެންމެ ގިނަ ދުވަސްވީ ފޯރަމެވެ.
މި ފޯރަމްގައި ދިވެހި އަދި ބައިނަލްއަގްވާމީ ސްޕީކަރުން ބައިވެރިވެ، ފައިނޭންސްގެ މުސްތަގުބަލުގައި ފިންޓެކް އާއި އޭއައިގެ ދައުރާއި ރާއްޖޭގެ ފައިނޭންސް ދާއިރާގައި އެ ޓެކްނޮލޮޖީތަކުގެ ދައުރަށް އަލިއަޅުވާލާނެއެވެ.