ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިސްވެ އުފައްދަވާ ސިޔާސީ ޕާޓީ "ދަ ޑިމޮކްރެޓްސް" ވާނީ ރާއްޖޭގައި އޮތް އެންމެ ބޮޑު ސިޔާސީ ޕާޓީއަށް ކަމަށް މަޖިލީހުގެ ނައިބު ރައީސް އަދި ދަ ޑިމޮކްރެޓްސް އުފެއްދުމުގައި އިސްކޮށް ހަރަކާތްތެރިވާ، އީވާ އަބްދުﷲ ވިދާޅުވެއްޖެއެވެ.
ދަ ޑިމޮކްރެޓްސް އުފެއްދުމުގެ ހުއްދަ އިލެކްޝަންސް ކޮމިޝަން (އީސީ)އިން މިއަދު ދިނުމާ ގުޅިގެން އީސީގެ ބޭފުޅުންނާ ވާހަކަދައްކަވަމުން އީވާ ވިދާޅުވީ ސިޔާސީ ޕާޓީތަކާ ގުޅިފައިވަނީ ރައްޔިތުންގެ ވަރަށް ފޮނި އުއްމީދެއް ކަމަށެވެ. ޚާއްސަކޮށް ރިޔާސީ އިންތިޚާބު އޮންނަ އަހަރެއްގައި އެތައް ބަޔެއްގެ ފޮނި އުއްމީދުތައް އެ ޕާޓީތަކާ ގުޅިފައިވާ ކަމަށް ވެސް ވިދާޅުވިއެވެ.
އީވާ ވިދާޅުވީ އެ ޕާޓީގެ ޖަލްސާއެއް ވަރަށް އަވަހަށް ބާއްވާނެ ކަމަށެވެ. އެ ޖަލްސާގައި ޕާޓީގެ ކުލައާއި، ލޯގޯ އަދި ދިދަ ފާސް ކުރާނެ ކަމަށް ވެސް އޭނާ ވިދާޅުވިއެވެ.
"އަޅުގަނޑުމެން ވަރަށް އަވަހަށް އަޅުގަނޑުމެންގެ ޖަލްސާ ބާއްވާ، ކުލަ، ދިދަ އަދި ލޯގޯ ފާސް ކުރާނަން. ތިބޭފުޅުން ވެސް ރަށުތެރޭގައި އުޅުއްވާ ބޭފުޅުންވީމަ އެނގިވަޑައިގަންނަވާނެ އަޅުގަނޑުމެންގެ ކުލައެއް ހަމަ ނެޗުރަލީ އިވޯލްވް ވެއްޖެ،" އިވާ ވިދާޅުވިއެެވެ.
ދަ ޑިމޮކްރެޓްސް ޕާޓީގައި ހަރަކާތްތެރިވާ ގިނަ ބަޔަކު ބޭނުންކުރަމުން ދަނީ މަޑު ނޫކުލައެކެވެ. މިއަދުގެ އެ ބައްދަލުވުމުގައި އީވާ ފާހަގަކުރެއްވި ކުލައަކީ އެއީ ކަމަށް ގިނަ ބަޔަކު ލަފާކުރެއެވެ.
ދަ ޑިމޮކްރެޓްސް އުފެއްދުމުގެ ހުއްދަ އިލެކްޝަންސް ކޮމިޝަން (އީސީ)އިން ދިނުން--- ސަން ފޮޓޯ/ މުޙައްމަދު ޝާތިއު އަބްދުﷲ
އެ ބައްދަލުވުމުގައި އީސީގެ ނައިބު ރައީސް އިސްމާއީލް ހަބީބު ވިދާޅުވީ އެ ޕާޓީ އުފައްދަން ހުއްދަ ދިނުމާއެކު، ތިން މަސް ދުވަހުގެ ތެރޭގައި މަދުވެގެން 3،000 މީހުންގެ ސޮއި ހޯދަން ފުރުސަތު ދޭ ކަމަށެވެ. އެ ފޯމްތައް ހުށަހަޅާއިރު މިހާރު ވަރަށް ގިނަ ކަންކަމަށް ބަލަން ޖެހޭނެ ކަމަށާއި އޭގެ ތެރެއިން އެއް ކަމަކީ ސައްހަ ފޯމް ހުށަހެޅުން ކަމަށް އޭނާ ވިދާޅުވިއެވެ.
އެ ޕާޓީ އުފެއްދުމުގެ ހުއްދައަށް އެދި އީސީއަށް ހުށަހަޅާފައި ވަނީ މިދިޔަ އާދިއްތަ ދުވަހު، ހެންވޭރު ހުޅަނގު ދާއިރާގެ މެންބަރު ހަސަން ލަތީފުގެ ނަމުގައެވެ.
ސަރުކާރާ މެދު އުފެދުނު ހިތްހަމަނުޖެހުންތަކަށް ފަހުގައި، ނަޝީދަށް ތާއީދުކުރައްވާ މަޖިލީސް މެންބަރުން ވަނީ އެމްޑީޕީން އިސްތިއުފާ ދެއްވައިފައެވެ. އަދި، ކުރިން އެމްޑީޕީ ތެރޭގައި ފިކުރެއްގެ ދިރުން ނަމުގައި ހިންގި ހަރަކާތް ސިޔާސީ ޕާޓީއަކަށް ބަދަލުކުރަން ނިންމައިފައެވެ.
ސިޔާސީ ޕާޓީ އުފެއްދުމުގެ ހުއްދައަށް އެދި އިލެކްޝަންސް ކޮމިޝަނަށް ފޯމު ހުށަހެޅުއްވުމަށް ފަހު އެ ދުވަހު ނޫސްވެރިންނާ ވާހަކަދައްކަވަމުން އެ ޕާޓީގެ ތަރުޖަމާނު އަފްޝާން ލަތީފު ވިދާޅުވީ މި އަހަރުގެ ސެޕްޓެމްބަރު މަހުގެ ނުވަވަނަ ދުވަހު އޮންނަ ރިޔާސީ އިންތިޚާބުގައި އެ ޕާޓީގެ ކެންޑިޑޭޓެއް ވާދަކުރައްވާނެ ކަމަށެވެ.
ނަޝީދަށް ތާއީދުކުރައްވާ މެންބަރުން ޕާޓީ އުފައްދަން ފޯމު ހުށަހެޅުއްވި ނަމަވެސް ނަޝީދު އަދިވެސް އެމްޑީޕީން ވަކިވެވަޑައެއްނުގަންނަވައެވެ. އެ މަނިކުފާނު އަދިވެސް ހުންނެވީ އެމްޑީޕީގެ ރައީސްގެ މަގާމުގައެވެ.