ބަޔަކު ބޭނުންވިޔަސް އެ މަނިކުފާނު ރައްޔިތުންގެ މަޖިލީހުގެ ރައީސްކަމުން ވަތްކެއް ނުކުރެވޭނެ ކަމަށް ވިދާޅުވެ، އެމްޑީޕީގެ ރައީސްކަން ވެސް ކުރައްވާ ކުރީގެ ރައީސް މުހައްމަދު ނަޝީދު، އެމްޑީޕީގެ ޕީޖީ ގުރޫޕަށް އިންޒާރެއް ދެއްވައިފިއެވެ.
ސަރުކާރާ މެދު އުފެދުނު ހިތްހަމަނުޖެހުންތަކާ އެކު، މިދިޔަ ޖެނުއަރީ މަހު ބޭއްވި އެމްޑީޕީ ޕްރައިމަރީގެ ނަތީޖާ ވެސް ގަބޫލުނުކޮށް، ނަޝީދަށް ތާއީދުކުރައްވާ މެންބަރުން ވަނީ އެމްޑީޕީން ވަކިވެ، އާ ޕާޓީއަށް އުފައްދަން ނިންމައިފައެވެ.
އެހެންވެ، އެ ޕާޓީން ވަކިވި މެންބަރުންގެ ތެރޭގައި ހިމެނޭ، ނަޝީދުގެ ދެބެއިންގެ ދެދަރި ކޮއްކޯފުޅު ކަމަށްވާ، އީވާ އަބްދުﷲ މަޖިލީހުގެ ނައިބު ރައީސްކަމުން ވަކިކުރަން މިއަދު ވަނީ ހުށަހަޅައިފައެވެ. މަޖިލީހުގައި އޮތް މެޖޯރިޓީއާ އެކު 50 މެންބަރުންގެ ސޮޔާ އެކު އީވާ ވަކިކުރަން ހުށަހެޅުމުން އެމްޑީޕީގެ މަޖިލީސް މެންބަރުން ތިއްބަވާ ވަޓްސްއެޕް ގުރޫޕެއްގައި ވަނީ ވަރަށް ބޮޑަށް ހޫނުވެފައެވެ.
އެ ގުރޫޕުގައި ހުޅުމާލޭ ދާއިރާގެ މެންބަރު އަލީ ނިޔާޒް(ނިޔާ) އަށް ނިސްބަތް ކުރައްވާ ނަޝީދު ވިދާޅުވީ މަޖިލީހުގެ ހައެއްކަ މެންބަރުން ރައީސް އިބްރާހިމް މުހައްމަދު ޞާލިޙަށް ބިރުދައްކައިގެން ކަންކަން ކުރައްވާ ކަމަށެވެ. އަދި، ޕީޖީން އަމަލުކުރައްވައި ގޮތާ މެދު އެ މަނިކުފާނު ވަނީ ނުރުހުން ފާޅު ކުރައްވައިފައެވެ.
ނަޝީދަށް ރައްދުދެއްވައި ނިޔާ ވިދާޅުވީ އޭނާއަށް ބިރު ނުދެއްކޭނެކަން އެންމެ ރަނގަޅަށް އެނގިވަޑައިގަންނަވާނީ ވެސް ނަޝީދަށް ކަމަށެވެ.
"އަޅުގަނޑު ތަބާ ވަނީ މެޖޯރިޓީއަށް، އަޅުގަނޑަކީ ހަގީގީ ޑިމޮކްރެޓެއް،" ނިޔާ ވިދާޅުވިއެވެ.
ހުޅުމާލެ ދައިރާގެ މެންބަރު އަލީ ނިޔާޒު -- ފޮޓޯ/ މަޖިލިސް
އެ ހިސާބުން ނަޝީދު ވަނީ ސަރުކާރު ވެއްޓުމުން އެންމެ ކައިރީގައި ހުންނާނީ އެ މަނިކުފާނު ކަމަށް ވިދާޅުވެ، އަނެއްކާ ވެސް ނިޔާއަށް ރައްދުދެއްވައިފައެވެ. ގުރޫޕު ހޫނުވީ އެ ހިސާބުންނެވެ.
ސަރުކާރު މެންބަރުން ނަޝީދަށް ފާޑު ވިދާޅުވަމުން، އީވާ ވެސް ވަކިކޮށް، ނަޝީދު ވެސް ވަކިކުރަން ވަނީ ގޮވާލައިފައެވެ. އެއަށް ރައްދުދެއްވާ ނަޝީދު ވިދާޅުވީ، އެ މަނިކުފާނު މަޖިލީހުގެ ރައީސްކަމުން ވަކި ނުކުރެވޭނެ ކަމަށެވެ.
"ބިގޭ[އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން]، ނިޔާ، އަސްލަމް[ހިތަދޫ އުތުރު ދާއިރާގެ މެމްބަރު، މުހައްމަދު އަސްލަމް] ވަރަށް ވިސްނަވާތި. އަޅުގަނޑު ވަކި ނުކުރެވޭނެ،" ނަޝީދު ވިދާޅުވިއެވެ.
އެމްޑީޕީގެ ރައީސް މުހައްމަދު ނަޝީދު -- ސަން ފޮޓޯ/ ފަޔާޒު މޫސާ
އެކަމަކު، ނަޝީދު ހިތްހަމަ ޖެހިވަޑައިނުގަތަސް، އީވާ ވަކިކުރަން ބޭނުންވާ އަދަދަށް ވޯޓު ހަމަވެފައިވާ ކަމަށް ސަރުކާރަށް ތާއީދު ކުރައްވައި މެންބަރުން ވިދާޅުވިއެވެ. އަދި، ނަޝީދު ވެސް ޕާޓީން ވަކިވެވަޑައިގެންފި ނަމަ، މަގާމުން ދުރުކުރާނެ ކަމަށް ވިދާޅުވިއެވެ.
ސަރުކާރާ މެދު ހިތްހަމަނުޖެހި، ނަޝީދަށް ތާއީދުކުރައްވައި މެންބަރުން ވަނީ "ދަ ޑިމޮކްރެޓްސް"ގެ ނަމުގައި އާ ޕާޓީއެއް އުފެއްދުމުގެ ހުއްދައަށް އެދިފައެވެ. އެކަމަކު، ނަޝީދު މިހާތަނަށް އެ ޕާޓީއަށް ބަދަލުވެފައެއް ނުވެއެވެ.