ނ. ފޮއްދުއަށް ބަޔަކު މީހުން އަރައި އެ ރަށުގައި މަސައްކަތް ކުރާ ބިދޭސީއެއްގެ އަތުން ފޭރިގަތުމަށްފަހު ފިލައިފިއެވެ.
އެ ރަށުން "ސަން"އާ ވާހަކަ ދެއްކި މީހަކު ބުނީ މޫނު ނިވާކޮށްގެން ތިބި ބަޔަކު ރަށަށް އަރައި ހަމަލާ ދިނީ އެ ރަށު ސްކޫލް އިމާރާތްކުރުމުގެ މަސައްކަތުގައި އުޅޭ ބިދޭސީއަކަށް ކަމަށެވެ. އަދި އެ މީހުން އެ ބިދޭސީ މީހާ ހިފަހައްޓައި އަނިޔާކުރުމަށްފަހު އޭނާގެ ފޯނު ވެސް އަތުލައިފައިވާކަމަށް އެ ރަށުން ވާހަކަ ދެއްކި މީހާ ކިޔައިދިނެވެ. އިތުރު އެއްޗެއް އޭނާގެ އަތުން އަތުލިކަމެއް އެނގިފައެއް ނުވެއެވެ.
އަނިޔާ ލިބުނު ބިދޭސީ މީހާއާ ހަވާލާދީ އެ ރަށު މީހަކު ކިޔައިދިން ގޮތުގައި ތިން މީހަކު އައިސް އޭނާގެ ބޮލަށާއި އަތަށް ވަނީ އަނިޔާކޮށްފައެވެ. އަދި އެ މީހުން އޭނާއާ ދިމާކޮށްލީ އަނދިރި މަގުތަކުން ކަމަށާއި އެހެންވެ އެއީ ކޮންބައެއްކަން ނޭނގޭކަމަށް ވެސް ބުންޏެވެ.
ފޮއްދޫގައި އަނިޔާވި މީހާ --
ފޮއްދުއަކީ ފުލުހުންގެ ޚިދުމަތް ދޭ ރަށެއް ނޫނެވެ. ބިދޭސީ މީހާއަށް ހަމަލާދިނުމުން ނ. ހޮޅުދޫ ފުލުހުންނަށް އެ ރަށަށް ދެވުނީ 20 ވަރަކަށް މިނެޓު ފަހުންކަމަށް އެ ރަށު މީހުން ކިޔައިިދިނެވެ. ނަމަވެސް އޭރު އެ މީހުން ލޯންޗަށް އަރައި ފިލައިގެން ގޮސްފިކަމަށް ވެސް ބުންޏެވެ.
މި ހަމަނުޖެހުމުގައި މާ ބޮޑު އަނިޔާއެއް ބިދޭސީ މީހާއަށް ވެފައެއް ނުވެއެވެ. އޭނާއަށް އެ ރަށު ސިއްހީ މަރުކަޒުގައި ފަރުވާ ދިނުމަށްފަހު ވަނީ މިހާރު ދޫކޮށްލައިފައެވެ.