އެންމެ ފަޔަކާއެކު ފުޓުބޯޅަ ކުޅޭތަން ފެންނަ ވީޑިއޯއަކުން އާއްމުންގެ ލޯބި ހޯދި ހދ. މަކުނުދޫ، އަހްމަދު ޝަވަން ފައެއް ޖަހައިފިއެވެ.
ޝަވަންގެ މަންމަ އާއިޝަތު ވިޝާހު "ސަން"އަށް ކިޔައިދިން ގޮތުގައި ޝަވަންއަށް ފައެއް ޖެހުމަށް ޓަކައި އިންޑިއާއަށް ދިޔައީ މީގެ ހަތަރު މަސް ކުރިންނެވެ. އޭނާގެ ފައި ޖެހީ މީގެ ތިން މަހެއްހާ ދުވަސްކުރިން ބެންގަލޫރުގެ ހޮސްޕިޓަލަކުންނެވެ.
"ވަރަށް އުފާވޭ. އޭނާ އެންމެ ކުޑަ ދުވަހުން ފަށައިގެން ވެސް ކުރި އުންމީދެއް އެއީ،" ވިޝާހު ބުންޏެވެ.
ވިޝާހު ބުނީ މިހާރު ޝަވަންއަށް ފައި ޖަހައިގެން ހިނގެނީ އެންމެ ގަޑިއިރަކު ކަމަށެވެ. އަދި އަންނަ މަހު 12ގައި އިންޑިއާއަށް އިތުރު ޓެސްޓުތައް ހަދަން ދާން ޖެހޭ ކަމަށް ބުންޏެވެ.
"ފްލޯއަޕް ޓެސްޓުތަކަށްފަހު އެއްކޮށް ޖަހައިގެން އުޅެވޭނޭ ބުނީ،" ވިޝާހު ބުންޏެވެ.
އާޓިފިޝަލް ފައި ޖަހައިގެން އާއްމު އިންސާނުން އުޅޭހެން އުޅެވެއެވެ. އަދި އާޓިފިޝަލް ފައި ޖަހައިގެން ވާދަވެރި ކުޅިވަރުތައް ކުޅޭ އެތްރީޓުން ވެސް ދުނިޔޭގެ އެކި ހިސާބުތަކުގައި އުޅެއެވެ.
އެއް ފަޔާއެކު ޝަވަން ދެއްކި ހިތްވަރަށް ގިނަ ބައެއްގެ ތައުރީފް ވަނީ ލިބިފައެވެ.