ތ. މަޑިފުށީ ސްކޫލްގައި ޓީޗަރުންގެ ދަތިކަން އެބައޮތް ކަމަށާއި ޓީޗަރުން ހަމަނުވާކަމަށް ބުނެ އެ ރަށުގައި ބެލެނިވެރިން މުޒާޙަރާ ކުރަން ފަށައިފިއެވެ.
އެ ރަށުގައި މުޒާހަރާކުރުމުގައި އިސްކޮށް އުޅޭ އެއް ބެލެނިވެރިއަކު ބުނީ މުޒާހަރާއަށް ނުކުންނަން ޖެހުނީ ދަރިވަރުންގެ ހައްގުތައް ގެއްލޭތީ ކަމަށެވެ.
އެ ރަށު ސްކޫލުގެ ދަށް ގްރޭޑްތަކަށް ކިޔަވައިދޭ ޓީޗަރުން ހަމަވެފައިނުވާކަން އޭނާ ފާހަގަކުރިއެވެ. އަދި އެ ކަމުގެ ކަންބޮޑުވުން އެޑިއުކޭޝަން މިނިސްޓްރީއާ ހިއްސާކޮށްފައި ވިޔަސް، އެ ކަމަށް މިހާތަނަށް ހައްލެއް ލިބިފައިނުވާކަމަށް ބުންޏެެވެ.
"ދެ އަހަރުވެގެން މި ދަނީ. ޓީޗަރުން ހަމައެއް ނުވޭ. ޓީޗަރުން ދާއިމީއެއް ނުވޭ. މި ގޮތަށް ކިހިނެއްތޯ އަބަދު މިހެން ތިބެނީ،" އޭނާ ބުންޏެވެ.
އެ ބެލެނިވެރިޔާ އިތުރަށް ބުނީ އުމްރާނީ ތަރައްގީގެ ގޮތުން އެ ސްކޫލަކީ ތަރައްގީވެފައިވާ ސްކޫލެއް ކަމަށެެވެ. ނަމަވެސް، ކިޔަވައިދިނުމުގެ ގޮތުން އެ ސްކޫލް އޮތީ އެންމެ ދަށުގައި ކަމަށް އޭނާ ބުންޏެވެ.
"ގުރުއާން ކްލާހަށް ވެސް އެބަ ދޭ ބޭރު ޓީޗަރުން. މިއީތޯ އިންސާފަކީ،" އޭނާ ބުންޏެވެ.
އެލްކޭޖީ އަދި ޔޫކޭޖީއަށް ކިޔަވައިދޭ ޓީޗަރަކު ވެސް ނެތްކަން ފާހަގަކުރަމުން އޭނާ ބުނީ ދާއިމީ ނުވާ ވެސް އެތައް އެހެންވެ، ފައުންޑޭޝަންގެ ދަރިވަރުން މިއަދު ސްކޫލަށް ވެސް ނުގެންދެއެވެ. އަދި ކިޔަވައިދޭ ދަންފަޅި ނިމުމުން، ބެެލެނިވެރިން ވަނީ މުޒާހަރާ ކޮށްފައެވެ.