ގދ. ފަރެސްމާތޮޑާ އެއާޕޯޓް ސަރަހައްދުގައި ގެސްޓްހައުސް ވިޔަފާރި ހިންގުމަށް ބޭނުންވާ ދިވެހިންނަށް އެފުރުސަތު ހުޅުވާލައިފިއެވެ.
ރީޖަނަލް އެއާޕޯޓްސް ކުންފުނިން އާއްމުކޮށްފައިވާ އިއުލާނެއްގައި މިއަދު ބުނެފައިވަނީ، ފަރެސްމާތޮޑާ އެއާޕޯޓްގައި ގެސްޓްހައުސް ހިންގުމަށް ޝައުގުވެރިވާ ކުންފުނިތަކުން އެކަމަށް އެދި ހުށަހެޅުމުގެ ފުރުސަތު މިމަހުގެ 26 ވާ ބުދަދުވަހުގެ 14:00 ގެ ނިޔަލަށް ފުރުސަތު ހުޅުވާލާފައިވާކަމަށެވެ.
ފަރެސްމާތޮޑާ އެއާޕޯޓް ސަރަހައްދުގައި ގެސްޓްހައުސް އެޅުމަށް 18 ބިމެއް ދޫކުރުމަށް ވަނީ ނިންމާފައެވެ. ގެސްޓްހައުސް ހިންގުމަށް ދޫކުރުމަށް ނިންމާފައިވާ ބިމުގެ ބޮޑުމިނަކީ 10،000 އަކަފޫޓެވެ.
ރީޖަނަލް އެއާޕޯޓްސް ކުންފުނީގެ މެނޭޖިންގ ޑިރެކްޓަރު މުހަންމަދު ރިޒްވީ "ސަން"އާ ވާހަކަދައްކަވަމުން ވިދާޅުވީ، ފަރެސްމާތޮޑާ އެއާޕޯޓް ސަރަހައްދުގައި ގެސްޓްހައުސް ވިޔަފާރި ކުރުމުގެ ފުރުސަތު ހުޅުވާލާފައިވަނީ ހަމައެކަނި ދިވެހިންނަށް ކަމަށެވެ.
ފަރެސްމާތޮޑާ އެއާޕޯޓް ހުޅުވުމުގެ ގޮތުން މިދިޔަ މާޗުމަހު ބޭއްވި ރަސްމިއްޔާތުގައި ވާހަކަދައްކަވަމުން ރިޒްވީ ވަނީ، ފަރެސްމާތޮޑާ އެއާޕޯޓަކީ ހަމައެކަނި 1200 މީޓަރުގެ ތާރުގަނޑެއް ނޫންކަމަށް ވިދާޅުވެފައެވެ.
ރިޒްވީ މިރޭ ވިދާޅުވީ، ފަރެސްމާތޮޑާ އެއާޕޯޓްގައި ގެސްޓްހައުސް ތަރައްޤީ ކުރުމަށް ފުރުސަތު ހުޅުވާލުމަށް ނިންމީ، ޓޫރިޒަމް ދާއިރާއިން ދިވެހިންނަށް ފުރުސަތު ހޯދައިދިނުމަށްކަމަށެވެ.
އެއާޕޯޓާއިއެކު އެނދު ހުރި ނިސްބަތް އިތުރުކުރަންޖެހޭކަން ފާހަގަކުރަމުން ރިޒްވީ ވިދާޅުވީ، ފަރެސްމާތޮޑާ އެއާޕޯޓްގައި ގެސްޓްހައުސް ތަރައްޤީ ކުރުމަށް ހުޅުވާލި މި ފުރުސަތާއިއެކު ދިވެހި ކުދި އަދި މެދުފަންތީގެ ވިޔަފާރިވެރިންނަށް ޓޫރިޒަމް ދާއިރާއިން ކުރިއަށްދިޔުމަށް ފަހިވެގެންދާނޭކަމަށެވެ.
ސަރުކާރާއި ރައްޔިތުން ހިއްސާވާ ކުންފުނި އެމްޓީސީސީން ތަރައްޤީކުރި ފަރެސްމާތޮޑާ އެއަރޕޯޓް ރަސްމީކޮށް ހުޅުވާފައިވަނީ މިދިޔަ މާޗްމަހުގެ 15 ގައެވެ.