މިދިޔަ މަހުގެ 31ވަނަ ދުވަހު ފިލިޕީންސްގެ ސެބޫގައި އެކްސިޑެންޓްވެ އަނިޔާވި ލުހެއިމް މުހައްމަދު އިސްމާއިލް، 21، އިތުރު ފަރުވާއަށް ބެންކޮކަށް ގެންގޮސްފިއެވެ.
ފިލިޕީންސްގެ ޔުނިވާސިޓީއެއްގައި ކިޔަވަމުންދިޔަ ލުހައިމް އެކްސިޑެންޓުވީ އޭނާ ދުއްވާފައި ދިޔަ ސައިކަލު އެހެން އުޅަނދެއްގައި ޖެހި، ވިއްސައިގެން ގޮސް ރޯޑް ލައިޓެއްގައި ޖެހިގެންނެވެ.
މިކަމާ ގުޅިގެން "ސަން"އާ ވާހަކަ ދައްކަމުން ލުހައިމްގެ ބައްޕަ މުހައްމަދު އިސްމާއީލް ބުނީ، އޭނާ ބެންކޮކަށް ގެންގޮސް އެޑްމިޓް ކޮށްފައި ވަނީ ރޭގެ ވަގުތެއްގައި ކަމަށެވެ. އަދި، އޭނާގެ ހާލު އަދިވެސް ރަނގަޅު ނުވާ ކަމަށް އިސްމާއީލް ބުންނެވެ.
"ވަރަށް މަދު ތަނަކަށް އަނިޔާ ނުވަނީ އެތެރެ ހައްޓަށް ވެސް ވަރަށް ގިނަ އަނިޔާތައް ލިބިފައި ވަނީ. ލަންގްސްއާ ތަންތަނަށް،" އޭނާ ބުންނެވެ.
ލުހައިމްގެ ދެފައި ވެސް ވަނީ އެތައް ތަނަކުން ބިންދައިގެން ގޮސްފައެވެ. އޭނާގެ ބައްޕަ ބުނި ގޮތުގައި އެ އަނިޔާތަކަށް ވެސް އަދި ފަރުވާއެއް ނުދެވެއެވެ.
"ފުރާނަ ސަލާމަތް ކުރުމަށްޓަކާ ކުރަން ޖެހޭ ކަންކަން އެންމެ ފުރަތަމަ ކުރަނީ،" އޭނާ ބުންޏެވެ.
މި އެކްސިޑެންޓް ހިނގުމާ އެކު ލުހެއިމްގެ މައިންބަފައިންނާއި އާއިލާގެ އިތުރު މެންބަރުން ވަނީ ފިލިޕީންސްއަށް ގޮސްފައެވެ.