ދަތުރުފަތުރުގެ ގައުމީ ނިޒާމު ނުވަތަ ރާއްޖެ ޓްރާންސްޕޯޓް ލިންކު (އާރުޓީއެލް)ގެ ދަށުން ހުވަދު އަތޮޅު ގުޅާލަން ބޭނުންކުރާ އަޅަނދުތަކުގެ ތެރެއިން ފުރަތަމަ ލޯންޗާ އެމްޓީސީސީން ހަވާލުވެ މޫދަށް ބާލައިފިއެވެ.
މުޅި ރާއްޖެ ސްޕީޑް ފެރީން ގުޅާލުމަށް ސަރުކާރުން އެމްޓީސީސީއާ ހަވާލުކޮށްފައިވާ މަޝްރޫއަށް ބޭނުންވާ ލޯންޗުފަހަރުތައް ބަންނަމުން އަންނަނީ ރާއްޖޭގައި ފުޅާ ދާއިރާއެއްގައި އެކަން ކުރަމުން އަންނަ އަލް-ޝާލީ މެރިންއިންނެވެ.
އެގޮތުން އަލް-ޝާލީ މެރިންއިން ތިލަފުށީގައި ބަނދެ ނިންމާލި ސްޕީޑް ލޯންޗެއް މިއަދު ވަނީ މޫދަށް ބަލައި އެމްޓީސީސީން ހަވާލުވެފައެވެ. އެއަށް ފަހު މީޑިއާތަކާ ވާހަކަ ދައްކަމުން އެމްޓީސީގެ ޓްރާންސްޕޯޓް ޖެނަރަލް މެނޭޖަރު އިސްމާއީލް ފާރިގު ވިދާޅުވީ, އެހެން ލޯންޗަތަކާ އަޅާ ބަލާއިރު މި ލޯންޗު ޖާގައިގެ ގޮތުން ތަނަވަސް ވާނެ ކަމަށެވެ.
"ހަމަ ފަންސާސް ސީޓް އިންނާނެ. ނަމަވެސް އެތެރޭގަ ތަންކޮޅެއް ޖާގަ ތަނަވަސް ވާނެ. އެގޮތުން ސްޓެޗާ އާއި ވީލްޗެއާ ބަހައްޓާ ސަރަހައްދުތައް ކުރިއަށްވުރެ ޖާގަ ބޮޑުކޮށް ހުންނާނީ," އޭނާ ވިދާޅުވިއެވެ.
އެމްޓީސީސީން މަސައްކަތް ކުރަމުންދަނީ ޖުލައި މަހުގެ ތެރޭގައި ހުވަދު އަތޮޅުގެ ދަތުރުތައް ފެށުމަށެވެ.
އެގޮތުން ހުވަދު އަތޮޅުގެ ގއ. އަދި ގދ. އަތޮޅުގެ ރަށްތައް ގުޅާލުމަށް ޖުމްލަ ހަ ލޯންޗް ބޭނުންވާނެ ކަމަށް ވެސް ފާރިގު ވިދާޅުވިއެވެ.
ހުވަދު އަތޮޅަށްފަހު ދެން އެމްޓީސީން މަސައްކަތް ކުރާނީ ފުވައްމުލަކު ސިޓީ އާއި އައްޑޫ ސިޓީގައި އާރުޓީއެލް ސްޕީޑް ފެރޭގި ހިދުމަށް ފެށުމަށެވެ. މި އަހަރު ނިމުމުގެ ކުރިން ދެކުނުގެ ހަތަރު އަތޮޅު އާރުޓީއެލް ފެރީން ގުޅާލެވޭނެ ކަމަށް ރައީސް އިބްރާހިމް މުހައްމަދު ޞާލިޙް ވެސް މީގެ ކުރިން ވަނީ ވިދާޅުވެފައެވެ.