އަރަބިއްޔާ ސްކޫލް ޔުނީފޯމް ކޯޑާ ޚިލާފަށް ބައެއް ދަރިވަރުން ބުރުގާ އަޅާތީވެ، އެކަން އެގޮތަށް ނުކުރުމަށް އެޑިއުކޭޝަން މިނިސްޓްރީން އަންގާފައިވަނިކޮށް އަރަބިއްޔާގެ ބެލެނިވެރިން އެ މައްސަލަ ސިވިލް ކޯޓަށް ހުށަހަޅައިފިއެވެ.
މިދިޔަ އަހަރުގެ ޑިސެމްބަރު މަހުގެ 28 ވަނަ ދުވަހު އެޑިއުކޭޝަން މިނިސްޓްރީން އަރަބިއްޔާ ސްކޫލަށް ފޮނުވި ލިޔުމަކުން ވަނީ، ޔުނީފޯމް ކޯޑު މިހާރުވެސް އޮތްގޮތަށް އެއްވެސް ބަދަލެއް ނުގެނައުމަށް ދަރިވަރުންނަށާއި، ބެލެނިވެރިންނަށް އަންގައިދިނުމަށް އެދިފައެވެ.
އަރަބިއްޔާގެ ބައެއް ބެލެނިވެރިންގެ ފަރާތުން މި މައްސަލަ ސިވިލް ކޯޓަށް ހުށަހަޅާފައިވަނީ، އަމިއްލަ ލޯ ފާމެއްކަމަށްވާ ރެހެނދި ޗެމްބާސް އިންނެވެ.
މިކަމާ ގުޅޭގޮތުން ރެހެނދި ޗެމްބާސްއިން ނެރެފައިވާ ބަޔާނެއްގައި ބުނެފައިވަނީ، އަރަބިއްޔާ ދަރިވަރުންގެ ތެރެއިން މޫނު ބުރުގާ އަޅަން ބޭނުންވާ ކުދިން މޫނު ބުރުގާ އަޅައިގެން ސްކޫލަށް ދަނީ އެ ސްކޫލުން ދީފައިވާ ހުއްދައެއްގެ ދަށުން ކަމަށެވެ. ނަމަވެސް އެކަން އެގޮތަށް ނުކުރެވޭނޭކަމަށް ކުދިންނަށާއި ބެލެނިވެރިންނަށް އަންގައި، މޫނު ބުރުގާ އަޅައިގެން ސްކޫލަށް ދިއުމުގެ ހައްގުން ކުދިން މަހްރޫމްކުރުވަމުންދާ މައްސަލަ، ފައިސަލާ ކުރަނިވި ހުކުމެއް ހޯދުމަށް ސިވިލްކޯޓަށް ހުށަހަޅާފައިވާކަމަށް އެ ބަޔާނުގައިވެއެވެ.
މި ބަޔާނުގައި ބުނެފައިވަނީ އެޑިއުކޭޝަނުގެ މި އަމަލަކީ ރާއްޖޭގެ ގާނޫނު އަސާސީ އާއި ތައުލީމުގެ ގާނޫނާއި ކުޑަކުދިންގެ ހައްގުތައް ރައްކާތެރިކުރުމުގެ ގާނޫނާއި، ރާއްޖެ ބައިވެރިވެ، ބަލައިގަނެފައިވާ މުއާހަދާތަކާ ފުށުއަރާކަމެއްކަމަށެވެ.
މި ބަޔާނުގައި މޫނުބުރުގާ އެޅުމަކީ މިހާރު ދިވެހި މުޖުތަމައު ގަބޫލުކުރާ ކަމަކަށް ވާތީވެ، ދަރިވަރުންނަށް އެފުރުސަތު އޮންނަންޖެހޭނެކަން ވަނީ ފާހަގަކޮށްފައެވެ.
އަދި ސްކޫލްތަކުގެ ޔުނީފޯމް ކޯޑާއި، އާންމު ގަވައިދުތައް ހެދުމުގެ ބާރު ސަރުކާރަށް އޮތް ނަމަވެސް މުޖުތަމައުގައި ހުންނަކަމަށް ސަރުކާރުން ގަބޫލުކުރާ މައްސަލަތަކުގައި ސިޔާސަތު އެކުލަވާލައި ތަންފީޒު ކުރުމަކީ ސަރުކާރަށް ކުރެވިދާނޭ ކަމެއް ނަމަވެސް އެކުލަވާލެވޭ ސިޔާސަތަކުން އަދި ގަވާއިދަކުން ތައުލީމުގެ ހައްގުން އެކުގައި އެއްވެސް ކުދިބަޔަކު ނުވަތަ އެންމެ ކުއްޖަކުވިޔަސް މަހްރޫމް ނުކުރެވޭނޭކަންވެސް ބަޔާނުގައި ވަނީ ފާހަގަކޮށްފައެވެ.
ސިވިލް ކޯޓަށް ހުށަހެޅި މި މައްސަލައިގައި ރެހެނދި ޗެމްބާސް އިން ވަނީ، މައްސަލައިގައި ފައިސަލާ ކުރަނިވި ހުކުމެއް ކުރެވެންދެން، މޫނު ބުރުގާ އަޅައިގެން ސްކޫލަށްދާ ކުދިންނަށް ސްކޫލަށް ހާޒިރު ނުވެވޭނޭފަދަ އެއްވެސް ކަމެއް ނުކުރުމަށް ދިވެހި ދައުލަތަށާއި، އެޑިއުކޭޝަން މިނިސްޓްރީއަށާއި އަރަބިއްޔާ ސްކޫލުގެ މައްޗަށް ވަގުތީ އަމުރެއް ނެރެދިނުމަށް އެދިފައެވެ.