ބޭރު ގައުމުތަކާއެކު އޮންނަ ގުޅުންތައް ހީނަރުވެއްޖެ ނަމަ، އެކަމުގެ ނޭދެވޭ އަސަރު ރާއްޖޭގވެ ފަތުރުވެރިކަމަށް ކުރާނެ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ)ގެ 15ވަނަ އަހަރީ ދުވަސް ފާހަގަކުރުމަށް ރޭ ކުރުނބާ މޯލްޑިވްސްގައި އޮތް ހާއްސަ ރަސްމިއްޔާތެއްގައި ވާހަކަ ދައްކަވަމުން ޝާހިދު ވިދާޅުވީ ރާއްޖޭގެ އިގްތިސާދު ބަރޯސާވެފައި އޮންނަނީ ފަތުރުވެރިކަމުގެ ސިނާއަތަށް ކަމަށެވެ. އެހެންވެ، ބޭރުގެ ގައުމުތަކާއެކު އޮންނަ ގުޅުންތައް ހެޔޮ ގޮތުގައި ދެމެހެއްޓުމުގެ މުހިއްމު ކަމަށް މިނިސްޓަރުގެ ވާހަކައިގައި ވަނީ އަލިއަޅުއްވާލައްވައިފައެވެ.
"އަޅުގަނޑުމެންގެ ގުޅުންތަކާއި އަޅުގަނޑުމެންގެ މިންގަނޑުތައް ބަހައްޓަން ޖެހޭ ގޮތްތަކެއް އެބަހުރި. އެއީ، ގައުމުތަކާ ދޭތެރޭ އޮންނަ ގުޅުން، ގައުމުތަކުން އަންނަ މީހުންނާ ދޭތެރޭ އަޅުގަނޑުމެން ބަހައްޓަން ޖެހޭ އަހްލާގީ މިންގަނޑުތައް. ގުޅުންތައް." މިނިސްޓަރު ވިދާޅުވިއެވެ.
ފަތުރުވެރިންނާއި ބޭރު ގައުމުތަކުން އެ ނޫން ވެސް ބޭނުންތަކުގައި ރާއްޖެ އަންނަ މީހުންނަށް ދިވެހިންގެ އަތްތައް ހުޅުވާލަން ޖެހޭކަން ފާހަގަކުރައްވާ ޝާހިދު ވިދާޅުވީ ފަތުރުވެރިކަމަށް ބަރޯސާވެ ތިބެ، ބޭރުގެ ގައުމުތަކާ ދިމާލަށް ހިތުހުރި އެއްޗެއް ނުބުނެވޭނެ ކަމަށެވެ.
"ފަތުރުވެރިކަމަށް އިގްތިސާދު ބިނާވެގެން ތިބެ، އަޅުގަނޑުމެންނަކަށް ދުނިޔޭގެ ގައުމުތަކަށް ހިތުހުރި އެއްޗެއް ކިޔާ، ހިތުހުރި ގޮތަކަށް ހަދައިގެނެއް ކަމަކު ނުދާނެ. އެއީކީ ބުއްދިވެރި ގޮތެއް ނޫން،" މިނިސްޓަރު ވިދާޅުވިއެވެ.
ބޭރުގެ ފަތުރުވެރިންނަށް އަބަދުވެސް މަރުޚަބާ ކިޔަން ޖެހޭ ކަމަށާއި އެ މީހުންނަށް އަބަދުވެސް އޯގާތެރިވުމަށް މިނިސްޓަރު ވަނީ ގޮވާލައްވައިފައެވެ.
ޝާހިދު ވިދާޅުވީ، ރާއްޖެ އަބަދުވެސް މަޝްހޫރުވެފައި ވަނީ މަރުޚަބާ ކިޔުމުގެ މަތިވެރި ރަމްޒުން ކަމަށާއި އެ ރަމްޒު މި ގައުމުގައި އަބަދުވެސް އޮންނަން ޖެހޭނެ ކަމަށެވެ. ވަކި ބަޔަކާއި ވަކި ނަސްލަކާ ދިމާކޮށްލައިގެން އުޅެއްޖެ ނަމަ، ފާއިތުވި 50 އަހަރުގެ މަސައްކަތުން ދިވެހި ފަތުރުވެރިކަމަށް ލިބިފައި އޮތް ރީތި ނަން ހަރާބުވެދާނެ ކަމަށް މިނިސްޓަރު ވިދާޅުވިއެވެ.
"އަޅުގަނޑުމެންނަކީ ވަކި ބަޔަކާ ދިމާކޮށްލައިގެން ވަކި ނަސްލަކާ ދިމާކޮށްލައިގެން، ވަކި ގޮތަކަށް އުޅޭ ބައެއް ކަމުގައި ހަދަން ފަށައިފި ނަމަ، އަޅުގަނޑުމެންގެ ފަތުރުވެރިކަމަށް މިދިޔަ 50 އަހަރު ތެރޭގައި ލިބިފައި އޮތް ރީތި ނަން ޚަރާބު ވެގެން ހިނގައިދާނެ." މިނިސްޓަރު ވިދާޅުވިއެވެ.
އެހެންވެ، މިނިސްޓަރު ވަނީ ރާއްޖެއަށް ބޭރުން އަންނަ ފަތުރުވެރިންނަށް ހެޔޮކޮށް ހިތާ، މަރުޚަބާ ކިޔުމުގެ ރަމްޒު ދިރުވުމަށް ގޮވާލައްވައިފައެވެ.