ށ. ފީވަކު ސްކޫލްގެ މަލްޓިޕާޕަސް ހޯލް އަދި ވަށާފާރުގެ މަސައްކަތް ކުރުމަށް ޔެސް މޯލްޑިވްސް ޕްރައިވެޓް ލިމިޓެޑްއާ މިއަދު ހަވާލުކޮށްފިއެވެ.
އެ މަޝްރޫއަކީ އެއް އަހަރު ދުވަހުގެ ތެރޭގައި ނިންމުމަށް އެ ކުންފުންޏާ ހަވާލުކޮށްފައިވާ މަސައްކަތެކެވެ. އެ އެއްބަސްވުމުގައި އެޑިއުކޭޝަން މިނިސްޓްރީއާއި ޔެސް މޯލްޑިވްސްއިން ސޮއިކޮށްފައިވަނީ އެ މިނިސްޓްރީގައި މިއަދު ބޭއްވި ރަސްމިއްޔާތެއްގައެވެ.
އެޑިއުކޭޝަން މިނިސްޓްރީގެ ފަރާތުން އެއްބަސްވުމުގައި ސޮއިކުރީ މިނިިސްޓްރީގެ ސީނިއާ ޕޮލިސީ ޑިރެކްޓަރު ނައުޝާދު އިބްރާހީމެވެ. އަދި ޔެސް މޯލްޑިވްސްގެ ފަރާތުން އެ އެއްބަސްވުމުގައި ސޮއި ކޮށްފައިވަނީ މެނޭޖަރު އަޝްހަދު ސައީދެވެ.
އެކަމާ ގުޅިގެން ފީވަކު ސްކޫލްގެ ޕްރިންސިޕަލް އަބްދުއްރަޝީދު މިއަދު 'ސަން' އަށް ވިދާޅުވީ، އެ ސްކޫލުގައި މަލްޓީޕާޕަސް ހޯލެއް ނެތުމުން ގޮންޖެހުންތަކާ ދިމާވާ ކަމަށެވެ. އެގޮތުން އިތުރު ހަރަކާތް ބޭއްވުމުގެ އިތުރުން ބޮޑެތި އެސެމްބްލީތައް ބޭއްވުމަށް ވެސް މިހާރު ދަތިވާކަމަށް އޭނާ ވިދާޅުވިއެވެ. އަދި އެ ހޯލާއެކު އެ މައްސަލަތަކަށް ހައްލެއް ލިބޭނެކަމަށް އަބްދުއްރަޝީދު ވިދާޅުވިއެވެ.
އެ މަޝްރޫއަކީ 14.7 މިލިއަން ރުފިޔާގެ މަޝްރޫއެއް ކަމަށް އެޑިއުކޭޝަނުން ބުނެއެވެ.