މ. ކޮޅުފުށީގައި ހުންނަ އެ އަތޮޅު މަދަރުސާގައި މި ސަރުކާރުން އިމާރާތްކުރަން ފެށި އާ ކްލާސްރޫމްތަކުގެ މަސައްކަތް ނިންމާލައިފިއެވެ.
އެޑިއުކޭޝަން މިނިސްޓްރީއިން ބުނީ އެ ސްކޫލުގައި އިމާރާތް ކުރި އަށް ކްލާސްރޫމާއި މަލްޓިޕާޕަސް ހޯލުގެ މަސައްކަތް މިހާރު ނިމިފައިވާ ކަމަށެވެ. އަދި މިހާރު އެ ހޯލު ބޭނުން ކުރަން ފަށާފައިވާއިރު މިއަދު އޮތް ދިވެހީންގެ އެއްބައިވަންތަކަމުގެ ދުވަހުގެ ރަސްމީ ޖަލްސާ ބާއްވާފައި ވަނީ އެ ހޯލުގައިކަން މިނިސްޓްރީން ފާހަގަކުރެވެ.
އެ އިމާރާތާއެކު މި ހިނގާ ދިރާސީ އަހަރުގެ ދެވަނަ ޓާމްގެ ކިޔެވުން ފެށޭއިރު މ. އަތޮޅު މަދަރުސާ ވާނީ އެއް ދަންފަޅިއަށް ކިޔަވައިދޭ ސްކޫލަކަށް ކަމަށް ވެސް އެޑިއުކޭޝަނުން ބުނެއެވެ.
އެކަމާގުޅިގެން 'ސަން' އާ ވާހަކަދައްކަވަމުން ކޮޅުފުށީ ކައުންސިލްގެ ރައީސް ޢަބްދުލްއަލީމް ވިދާޅުވީ މިހާރު ބޭނުންކުރަމުންދާ ކްލާސްރޫމްތަކަކީ ވަރަށް ދުވަސްވެ، ބާވެފައިވާ ކްލާސްރޫމްތަކެއް ކަމަށެވެ.
އޭނާ ވިދާޅުވީ އެ ކްލާސްތަކަކީ މީގެ 21 ނުވަތަ 20 ވަރަކަށް އަހަރު ކުރިން އިމާރާތް ކޮށްފައިވާ ކްލާސްތަކެއް ކަމަށެވެ. އަދި މިހާރު އެ ކްލާސްތައް ބާވެ، އަލުން އިމާރާތް ކުރަން މަސައްކަތް ކުރި ނަމަވެސް ކްލާސްތަކުގެ ހާލަތު ރަނގަޅު ނުވާކަމަށް ޢަބްދުލްއަލީމް ވިދާޅުވިއެވެ.
އޭނާ ވިދާޅުވީ ސްކޫލަށް ދިމާވެފައިވާ ގިނަ މައްސަލަތަކަށް، އަލަށް އެޅި ކްލާސްތަކުގެ ސަބަބުން ހައްލު ލިބޭނެ ކަމަށެވެ. އެގޮތުން ދިމާވެފައިވާ ޖާގައިގެ ދަތިކަމަށް ވެސް ހައްލު ލިބޭނެ ކަމަށް ޢަބްދުލްއަލީމް ވިދާޅުވިއެވެ.
އެ މަޝްރޫއަކީ 2020 ވަނަ އަހަރުގެ ޖެނުއަރީ މަހުގެ 14 ވަނަ ދުވަހު ސްވިފްޓް އިންޖިނިއަރިންގް ޕްރައިވެޓް ލިމިޓެޑްއާ ހަވާލުކޮށްގެން ކުރިއަށްގެންދިޔަ މަޝްރޫއެކެވެ. އެއީ 14 މިލިޔަން ރުފިޔާގެ މަޝްރޫއެކެވެ.