ސުނާމީ ކާރިސާގައި މ. ކޮޅުފުށިން ދުނިޔެ ދޫކުރި މީހުންގެ ހަނދާނުގައި ބިނާކޮށްފައިވާ 'ސުނާމީ މޮނިއުމަންޓް', ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް އިފްތިތާހް ކޮށްދެއްވައިފިއެވެ.
މ. އަތޮޅަށް މިހާރު ކުރައްވަމުން ގެންދަވާ ރަސްމީ ދަތުރުފުޅެއްގައި މިއަދު ރައީސް ވަނީ ކޮޅުފުއްޓަށް ވަޑައިގަންނަވާފައެވެ. އެއީ އެއްބައިވަންތަކަމުގެ ދުވަހާ ގުޅިގެން ކޮޅުފުށީގައި ބާއްވާ ރަސްމީ ޖަލްސާ ޝަރަފްވެރި ކޮށްދެއްވުމަށެވެ.
ރައީސްގެ އެ ދަތުރުފުޅުގައި މިއަދު ހެނދުނު ވަނީ ކޮޅުފުށީގައި ގާއިމްކޮށްފައިވާ ސުނާމީ ބިނާ އިފްތިތާހް ކޮށްދެއްވާފައެވެ. އެއަށްފަހު އެ ރަށުގެ ރައްޔިތުންގެ ފަރާތުން ވަނީ ރައީސަށް ރަމްޒީ ސުނާމީ ބިނާއެއް ހަދިޔާ ކޮށްފައެވެ.
ކޮޅުފުށީގައި ގާއިމްކޮށްފައިވާ ސުނާމީ ބިނާ ރައީސް އިފްތިތާހް ކޮށްދެއްވަނީ --- ފޮޓޯ: ރައީސް އޮފީސް
ދެހާސް ހަތަރުވަނަ އަހަރުގެ ޑިސެމްބަރު މަހުގެ 26 ވަނަ ދުވަހު އިންޑޮނޭޝިއާގެ ސްމަޓްރާގެ ކަނޑުގެ އަޑިއަށް އައި ބާރުގަދަ ބިންހެލުމާ އެކު އުފެދުނު ސުނާމީގެ އަސަރު ނިސްބަތުން އެންމެ ބޮޑަށް ކުރި އެއް ގައުމަކީ ރާއްޖެއެވެ. އެ ހާދިސާގައި ރާއްޖެއިން 82 މީހަކު މަރުވެ 26 މީހުން ގެއްލުނެވެ.
ސުނާމީ ކާރިސާގައި ރާއްޖެއިން އެންމެ ގިނަ ބަޔަކު މަރުވެފައިވަނީ މ. އަތޮޅުންނެވެ. އެ އަތޮޅުން 34 މީހުން މަރުވެފައިވާއިރު އެއް ރަށަކުން އެންމެ ގިނަ މީހުން މަރުވެފައިވަނީ ތ. ވިލުފުށިންނެވެ. އެ ރަށުން 15 މީހުން މަރުވެ، ތިން މީހަކު ގެއްލުނެވެ. ދެން އެންމެ ގިނަ މީހުން މަރުވީ ކޮޅުފުށިންނެވެ. އެ ރަށުން 10 މީހުން މަރުވެ ހަ މީހަކު ގެއްލުނެވެ. ދެން އެންމެ ގިނަ މީހުން މަރުވީ ލ. އަތޮޅުންނެވެ. އެ އަތޮޅުގެ އެކި ރަށްރަށުން 25 މީހަކު މަރުވެފައިވާއިރު، ތ. އަތޮޅުން 19 މީހުން އަދި ދ. އަތޮޅުން 13 މީހުން ވަނީ މަރުވެފައެވެ.