ގއ. މާމެންދޫ ގިރާ ސަރަހައްދުގެ ގޮނޑުދޮށް ހިމާޔަތްކުރުމުގެ މަސައްކަތް އަންނަ އަހަރުގެ ބަޖެޓުގައި ހިމަނައިގެން ކޮށްދެއްވާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މިއަދު ވައުދުވެވަޑައިގެންފިއެވެ.
ގއ. މާމެންދޫގެ އުތުރު ފަރާތުގެ ރަށް ގިރުމުގެ މައްސަލައަށް ސަރުކާރުން ހައްލެއް ހޯދައިދީފައިނުވާތީ އެކަން ސަރުކާރުގެ ސަމާލުކަން ގެނައުމަށް އެ ރަށު ކައުންސިލްގެ މި ދައުރުގެ 78 ވަނަ ޖަލްސާ ރަށް ގިރާ ސަރަހައްދުގައި ވަނީ މި މަހުގެ 13ވަނަ ދުވަހު ބާއްވައިފައެވެ.
ރަށް ގިރުމުގެ ސަބަބުން އެރަށުގެ އެ ސަރަހައްދާ ކައިރީގައި ދިރިއުޅޭ ރައްޔިތުންނަށް މިއީ ބޮޑު ތަކުލީފެކެވެ. އެންމެ ބޮޑު މައްސަލައަކަށްވީ އެ ސަރައްހަދުގެ ގެތަކުގެ ވަޅު ފެން ލޮނު ވުމެވެ.
https://sun.mv/171622
އެއާއެކު އެމަނިކުފާނު މިހާރު ދާންދޫ ދައިރާގެ ރަށްތަކަށް ކުރައްވާ ރަސްމީ ދަތުރުފުޅުގައި، އެ ރަށު ކައުންސިލާ ބައްދަލުކުރެއްވުމަށްފަހު، މިއަދު އެ ރަށުގެ ފެނަކަ އޮފީހާއި އާ އިންޖީނުގެ ހުޅުވައިދެއްވުމަށްފަހު ގިނަ ވައުދުތަކެއް ވެވަޑައިގަތެވެ.
އޭގެ ތެރޭގައި އެ ރަށު ގޮނޑުދޮށް ހިމާޔާތްކުރުން ހިމެނެއެވެ.
މީގެ އިތުރުން ކުޅިލެންދޫ، މާމެންދޫގެ އިހްތިޞާސްގެ ތެރެއަށް ކަނޑައަޅުއްވައިދެއްވައި ކައުންސިލާ ހަވާލުކޮށްދެއްވާނެކަމަށް ވެސް އެ މަނިކުފާނު ވިދާޅުވިއެވެ.
ހަމައެއާއެކު ސްޕޯޓްސް ފިޝިން އަށް ޚާއްސަ ކަނދުފައްޗެއް އެ ރަށް ކައިރީ އަޅައިދޭނެކަމަށް ވެސް ވިދާޅުވިއެވެ. އަދި ރަށުގެ ފުޓުބޯޅަ ދަނޑުގައި ޓާފް އަޅައިދީ، ވޮލީ ބޯޅައަށް ޚާއްސަ ޒަމަނީ ކޯޓެއް އަޅައިދޭނެކަމަށް ވެސް އެ މަނިކުފާނު ވައުދުވެވަޑައިގެންނެވިއެވެ.
އެއާއެކު ދަތިކަމެއް ނެތި ކަރަންޓު ހުރިހާ ރަށަކަށް ވެސް ލިބޭނެކަމަށް ރައީސް ވިދާޅުވިއެެވެ. އަދި ދެން ވެރިކަމަށް އަންނަ ބަޔަކު ކަރަންޓުގެ ޚިދުމަތް ޔަގީންކޮށްދިނުމާމެދު ވިސްނާކަށް ނުޖެހޭނެކަމަށް ވެސް ރައީސް ވިދާޅުވިއެވެ.
"އަޅުގަނޑުމެންގެ ވެރިކަން ނިމޭއިރު ރާއްޖޭގައި ކަރަންޓުގެ ޚިދުމަތް ނުލިބޭ އެއްވެސް ރަށެއް އޮވެގެން ނުވާނޭ. އެ ކަން އިރާދަކުރެއްވިއްޔާ މި އަންނަނީ ކޮށްދެމުން،"
"އެއީ 2028ކަމަށް ވިޔަސް 2033ކަމަށް ވިޔަސް ދެން ވެރިކަމަށް އަންނަ ބަޔަކު މި ކަމަކާ މެދު ވިސްނާކަށް ނުޖެހޭނެ،" އެ މަނިކުފާނު ވިދާޅުވިއެވެ.
ފެނަކަ އާ އިންޖީނު ގެއެއް އެ ރަށުގައި ތަރައްގީކޮށްފައިވަނީ މާމެންދޫ ބާ އިންޖީނު ގެއަށް 23 އަހަރު ފަހުންނެވެ. އެ ރަށުގެ ކުރީގެ އިންޖީނު ގެ ހުރީ ވަރަށް ދަށް ހާލަތެއްގައެވެ.
އިންޖީނުގެ ހުޅުވައިދެއްވީ ރައީސް އިބްރާހީމް މުހައްމަދު ޞާލިހާއި ފެނަކަ ކޯޕަރޭޝަންގެ މެނޭޖިން ޑިރެކްޓަރު އަޙްމަދު ސައީދު މުހައްމަދެވެ.
މީގެ އިތުރުން ފެނަކައިން ސްމާޓް މީޓަރުގެ ޚިދުމަތް ވެސް މިއަދު ވަނީ އިފްތިތާހުކޮށްފައެވެ. އެ ކުންފުނިން ބުނީ މިއީ އެ ކުންފުނީގެ ޚިދުމަތް ޑިޖިޓަލައިޒްކުރުމުގެ ގޮތުން ތައަރާފްކުރި ޚިދުމަތެެއް ކަމަށެވެ.
މި މީޓަރު ތަކުން ވަގުތުން ވަގުތަށް ކަރަންޓު ބޭނުންކުރެވޭ މިންވަރު ވެސް ފެންނާނެއެވެ. އަދި ކަރަންޓަށް ވަމުން އަންނަ ގޮތް ވަގުތުން ބަލައިލެވޭނެއެވެ.
މާމެންދޫގައި މި ސަރުކާރުން ކޮށްފައިވާ ބައެއް މަސައްކަތް ތަކުގެ ތެރޭގައި ކުޑަކުދިންގެ ޕާކު މަސައްކަތާއި، ބަނދަރު ބޭރުގައި ބޮޑު ހިލަ ޖެހުން ވެސް ހިމެނެއެވެ.
ހިނގަމުންދާ ބައެއް މަޝްރޫތަކުގެ ތެރޭގައި ސިއްޚީ މަރުކަޒުގައި ލެބޯޓްރީ ގާއިމްކުރުމާއި، ފެނުގެ ނިޒާމް ގާއިމްކުރުން ހިމެނެއެވެ.
ކޮންޓްރެކްޓުކޮށްފައިވާ ބައެއް މަސައްކަތްތަކުގެ ތެރޭގައި އިޖުތިމާއީ މަރުކަޒެއް މާމެންދޫގައި ގާއިމްކުރުން ހިމެނެއެވެ.