ފީފާ ވޯލްޑް ކަޕްގައި އާޖެންޓީނާއަށް ޗެމްޕިއަންކަން ލިބުމާއެކު، އުފާ ފާޅު ކުރުމުގެ އަޑާއި މަންޒަރުތަކުން މުޅި މާލެ ވެސް ފުރާލައިފިއެވެ.
މިރޭ ރާއްޖެ ގަޑިން 8:00ގައި ފެށި ފައިނަލް މެޗަށް ބޮޑު ސްކްރީން ބަހައްޓައި ތައްޔާރުކޮށްފައި އޮތް ހުސް ބިންތަކާއި، މެޗު ދައްކަމުން ދިޔަ ބޮޑު ކެފޭ ރެސްޓޯރެންޓުތައް ވެސް އޮތީ ފުރާލާފައެވެ.
މެޗު ފެށުމުން، ފްރާންސާއި އާޖެންޓީނާއަށް ސަޕޯޓު ކުރާ މީހުންގެ އަޑު މާލޭގެ ހުރިހާ ސަރަހައްދަކުން ވެސް އިވެމުން ދިޔައެވެ. އެންމެ އާންމު މަންޒަރަކަށް ފެނުނީ އާޖެންޓީނާގެ ޖާޒީ ލައިގެން ނުވަތަ އެ ޓީމަށް ސަޕޯޓުކުރާކަން ކޮންމެވެސް ގޮތަކަށް ދައްކުވައިދޭ ގޮތަށް ހެދުން އަޅާފައި ތިބި މީހުންނެވެ.
އާޖެންޓީނާއަށް ޗެމްޕިއަންކަން ލިބުމުން ސަޕޯޓަރުން މަގުމަތީގައި އުފާ ފާޅުކުރަނީ -- ސަން ފޮޓޯ/ ނާއިލް ހުސައިން
އާޖެންޓީނާގެ ކޮންމެ މެޗަކާ ދިމާކޮށް ވެސް މިފަދަ މަންޒަރުތައް ފެންނަ ނަމަވެސް މިރޭ އެ ޓީމުގެ ސަޕޯޓަރުން ދެއްކީ ތަފާތު ރޫހެކެވެ.
އެ މެޗުގެ ފުރިހަމަ ވަގުތުގައި ޖުމްލަ ހަތަރު ލަނޑު ޖެހި އިރާއި އިތުރު ވަގުތުގެ ދެ ހާފުގައި ވެސް ދެ ލަނޑު ޖެހި އިރު، ކޮންމެ ލަނޑަކާއެކު ސަޕޯޓަރުންގެ ފޯރި ދިޔައީ ގަދަވަމުންނެވެ.
އެއަށް ފަހު ޕެނަލްޓީ ޖެހި ވަގުތު، ނޭވާ ހިފަހައްޓާލާ ގަޑީގައި މުޅިން އަޑު ކެނޑިފައި ގޯލް ޖެހުމާއެކު އަނެއްކާވެސް އަޑު ފަޅައިގެންދެއެވެ.
އާޖެންޓީނާއަށް ޗެމްޕިއަންކަން ލިބުމުން ސަޕޯޓަރުން މަގުމަތީގައި އުފާ ފާޅުކުރަނީ -- ސަން ފޮޓޯ/ ނާއިލް ހުސައިން
އާޖެންޓީނާއިން ހަތަރު ވަނަ ޕެނަލްޓީ ކާމިޔާބު ކުރުމާއެކު ބޮޑު ސްކްރީންތައް ކައިރިއަށް ޖަމާވެ ތިބި މީހުންނާއި ކެފޭ ރެސްޓޯރެންޓުތަކުގައި ތިބި މީހުންގެ އިތުރުން ގޭތެރޭގައި މެޗު ބަލަން ތިބި ގިނަ ބަޔަކު ވެސް މަގު މައްޗަށް ނުކުމެ، އުފާ ފާޅުކުރަން ފެށި މަންޒަރު ފެނުނެެވެ.
އެއާއެކު، އާޖެންޓީނާ އާއި އެ ޓީމުގެ ކެޕްޓަން ލިއޮނެލް މެސީއަށް މަރުހަބާ ކިޔަމުން ދިޔަ މީހުންނާއި، މެޗު ނިމުމުން ގެޔަށް ދާން މިސްރާބު ޖެހި މީހުންނާއެކު މާލޭގެ މަގުތައް ހަލަބޮލިވެ، އުފަލާއި މަޖަލުގެ އަޑާއެކު ބަރުގޮނުގެ އަޑުވެސް އިތުރުވިއެވެ.
މާލެ އާއި މި ސަރަހައްދުގެ އެހެން ރަށްތަކުގެ އިތުރުން، އަތޮޅުތެރޭގައި ވެސް ވޯލްޑް ކަޕްގެ މެޗުތައް ފޯރިގަދަކޮށް ބަލައި، އުފާ ފާޅު ކުރާ މަންޒަރު ފެންނަ ފޮޓޯ އާއި ވީޑިއޯތައް ސޯޝަލް މީޑިއާއަށް ވަނީ ބަންޑުންކޮށްލާފައެވެ.