ހދ. ނޮޅިވަރަމުގައި ގޮތް ނޭނގޭ ގޮތަކަށް މަރުވެފައި އޮއްވާ ފެނުނު އެރަށު ހިތަށްފިނިވާގޭ، ނިޝާމާ މުހައްމަދުގެ މަރަށް ހަފުތާއެއް ވެގެންދިޔައިރު އަދިވެސް އޭނާގެ ހަށިގަނޑު ޕޯސްޓްމޯޓަމް ހެދުމަށް ފޮނުވިފައިނުވާކަމަށް ފުލުހުން ބުނެފިއެވެ.
ނިޝާމާ، އޭނާގެ ގޭގެ ކޮޓަރީގައި މަރުވެފައި އޮއްވައި ފެނިގެން، އެ ރަށު ސިއްހީ މަރުކަޒަށް ގެންދިޔައީ މިދިޔަ ހޮނިހިރު ދުވަހުގެ 14:15 ހާއިރެވެ. ސިއްހީ މަރުކަޒަށް ގެންދިޔައިރުގައި ވެސް އޭނާ އޮތީ މަރުވެފައެވެ.
އެ މައްސަލަ ތަހުގީގު ކުރުމަށް ފުލުހުންގެ ޚާއްސަ ތަހުގީގު ޓީމެއް އެދުވަހު ރަށަށް ގޮސް، ނިޝާމާގެ ޕޯސްޓްމޯޓަމް ހަދަން ވަނީ ނިންމާފައެވެ. ނަމަވެސް އޭނާގެ އާއިލާއިން ވަނީ އެކަމާ ދެކޮޅު ހަދައިފައެވެ.
"ބޭނުމެއް ނޫން ޕޯސްޓްމޯޓަމް ހަދަން މާލެ ގެނެސް އިންޑިއާއަށް ގެންދާކަށް. ކޯޓު މަރުހަލާއަަށް ދާން މިހާރު އެބަ ވާހަކަދެކެވޭ،" ނިޝާމާގެ ބައްޕަ ބުނެފައިވެއެވެ.
ފުލުހުންގެ މީޑިއާ އޮފިޝަލް ވިދާޅުވީ ޕޯސްޓްމޯޓަމް ހެދުމަށް ނިޝާމާގެ ހަށިގަނޑު އަދި ފޮނުވާލައިފައިނުވާ ކަމަށެވެ. ނަމަވެސް، އެކަމަށްޓަކައި ކުރަން ޖެހޭ މަސައްކަތްތައް މިހާރު ވެސް ކުރަމުންދާ ކަމަށް އޭނާ ވިދާޅުވިއެވެ.
"ޕޯސްޓްމޯޓަމް ހެދުމަށް ފޮނުވުމަށް ކުރަންޖެހޭ މަސައްކަތްތައް ދަނީ ކުރަމުން" ފުލުހުންގެ މީޑިއާ އޮފިޝަލް ވިދާޅުވިއެވެ.
މި މައްސަލައިގައި އެންމެން ވެސް ތުހުމަތުގެ އިނގިލި ދިއްކުރަނީ ނޮޅިވަރަމް ފެނަކަ ބްރާންޗްގެ ޓެކްނީޝަނެއްގެ ވަޒީފާގައި މަސައްކަތް ކުރާ، އޭނާގެ ފިރިމީހާ، އދ. ފެންފުށި ރޯޒީވިލާ، އަބޫބަކުރު ފައިސަލަށެވެ.
މަރުވި ނިޝާމާ މުޙައްމަދާއި އޭނާގެ ފިރިމީހާ އަބޫބަކުރު ފައިސަލް -- ފޮޓޯ/ ފޭސްބުކް
އޭނާ ހައްޔަރުކޮށް ކުޅުދުއްފުށީ ޕޮލިސް ސްޓޭޝަންގެ ގޮޅިއެއްގައި ބަހައްޓާފައި ވަނިކޮށް ވަނީ އަމިއްލައަށް ދަންޖެހިފައެވެ. އެކަމާ ގުޅިގެން ކުޅުދުއްފުށީ ހޮސްޕިޓަލްގައި އޭނާއަށް އަންނަނީ ފަރުވާދެމުންނެވެ. އޭނާގެ ހާލު ވަރަށް ސީރިއަސް ކަމަށް އެ ހޮސްޕިޓަލުން ބުންޏެވެ. މިވަގުތު އޭނާ އޮތީ ކޯމާއެއްގައެވެ.
ފައިސަލްގެ ފަރާތުން އޭނާގެ ކުޑަ ތިން ކުދިންގެ މަންމަ، ނިޝާމާއަށް މީގެ އަހަރުތަކެއް ކުރިންސުރެއް އަނިޔާ ލިބެމުންދާކަމަށް ނިޝާމާގެ އާއިލާ މެމްބަރަކު ވަނީ ކިޔައިދީފައެވެ.
ނިޝާމާއާއި ފައިސަލް އިނދެގެން އުޅޭތާ އަހަރުތަކެއް ވެފައިވާއިރު އެ ކައިވެންޏަށް ތިން ކުދިން ވަނީ ލިބިފައެވެ. އޭގެ ތެރެއިން އެންމެ ބޮޑު ކުއްޖާއަށް ހަތް އަހަރު ފުރިފައިވާއިރު ދެވަނަ ކުއްޖާގެ އުމުރަކީ ހަތަރު އަހަރެއެވެ. އެންމެ ހަގު ކުއްޖާއަށް ދެ އަހަރެވެ.