ހދ. ނޮޅިވަރަމްގައި މަރުވެފައި އޮއްވާ ފެނުނު ނިޝާމާ މުހައްމަދުގެ ގާތިލު ކަމަށް ތުހުމަތުކުރެވޭ އޭނާގެ ފިރިމީހާ، އަބޫބަކުރު ފައިސަލްގެ ބަންދަށް ކޯޓުން 15 ދުވަސް ޖަހައިފިއެވެ.
ފުލުހުން މިރޭ ބުނީ އެ މައްސަލައިގައި ހައްޔަރު ކުރި މީހާގެ ބަންދާ މެދު ގޮތެއް ނިންމަން ކޯޓަށް ހާޒިރު ކުރުމުން، ހޯމް މިނިސްޓްރީއިން ކަނޑައަޅާ ތަނެއްގައި ބަންދުގައި ބެހެއްޓުމަށް 15 ދުވަހުގެ މުއްދަތެއް ދީފައިވާ ކަމަށެވެ.
ނިޝާމާ، އޭނާގެ ގޭގެ ކޮޓަރީގައި މަރުވެފައި އޮއްވައި ފެނިގެން، އެ ރަށު ސިއްހީ މަރުކަޒަށް ގެންދިޔައީ މިއަދު 14:15 ހާއިރެވެ.
އެ މަރުކަޒުގެ ޑޮކްޓަރުންނާ ހަވާލާދީ މީގެ ކުރިން ފުލުހުން ބުނީ އޭނާ ގެންދިޔަ އިރުވެސް މަރުވެފައިވާ ކަމަށެވެ.
ފުލުހުން އިތުރަށް ބުނެފައި ވަނީ، ނިޝާމާ މަރުވި ސަބަބު ހޯދަން ޕޯސްޓްމޯޓަމް ހަދަން ނިންމާފައިވާ ކަމަށެވެ.
ނިޝާމާ މަރާލި ކަމުގެ ތުހުމަތު ކުރެވޭ ފައިސަލް ވަނީ އިއްޔެ މެންދުރު ނޮޅިވަރަމްއިން އެ އަތޮޅު ކުޅުދުއްފުއްޓަށް ގޮސްފައެވެ. އޭނާ ކުޅުދުއްފުށީ ޕޮލިސް ސްޓޭޝަނަށް ގޮސް، ފުލުހުންނާ ހަވާލުވީ އަމިއްލައަށެވެ. އަދި ކޯޓުގެ އަމުރެއްގެ ދަށުން ފުލުހުން އޭނާ ހައްޔަރުކުރީ ރޭގެ ވަގުތެއްގައެވެ.
"ސަން"އަށް މައުލޫމާތު ލިބިފައިވާ ގޮތުގައި، ފައިސަލްއަކީ މަސްތުވާތަކެތި ބޭނުން ކުރާކަމަށް ތުހުމަތު ކުރެވޭ މީހެކެވެ. ނިޝާމާއާ ކައިވެނިކޮށްގެން އެ ދެމީހުން ކުރިން ދިރިއުޅެމުން އައީ އދ. ފެންފުށީގައެވެ. ނޮޅިވަރަމްއަށް ބަދަލުވީ މިއަހަރުގެ ތެރޭގައެވެ.
ނިޝާމާ މަރާލީ ކީއްވެގެން ކަމެއް އަދި ޖެހުނީ ކޮން މައްސަލައެއް ކަމެއް މިހާތަނަށް ހޯދިފައެއް ނުވެއެވެ.
ނިޝާމާއާއި އޭނާގެ ފިރިމީހާ ކައިވެނިކޮށްގެން އުޅޭތާ އަހަރުތަކެއް ވެފައިވާއިރު އެ ކައިވެންޏަށް ތިން ކުދިން ވަނީ ލިބިފައެވެ. އެކުދިންގެ ތެރެއިން ދޮށީ ކުއްޖާގެ އުމުރުން ހަތް ވަރަކަށް އަހަރު ވެފައިވާއިރު ހަގު ދަރިފުޅު އުޅެނީ ބޭބީ ނާސަރީގައެވެ.