ހދ. ނޮޅިވަރަމްގައި މަރުވެފައި އޮއްވާ ފެނުނު އަންހެން މީހާގެ އޮޓޮޕްސީ ހަދަން ނިންމާފައިވާ ކަމަށް "ސަން"އަށް މައުލޫމާތު ލިބިއްޖެއެވެ.
ނޮޅިވަރަމްގައި މަރުވެފައި އޮއްވައި ފެނިފައިވަނީ، 28 އަހަރުގެ ނިޝާމާ މުހައްމަދެވެ. އޭނާ ގޭގެ ކޮޓަރީގައި މަރުވެފައި އޮއްވައި ފެނިގެން، އެ ރަށު ސިއްހީ މަރުކަޒަށް ގެންދިޔައީ މިއަދު 14:15 ހާއިރެވެ.
"ސަން"އަށް އެނގިފައިވާ ގޮތުގައި އެ އަންހެން މީހާގެ ހަށިގަނޑު މިހާރު ވަނީ ނޮޅިވަރަމުން، އެ އަތޮޅު ކުޅުދުއްފުއްޓަށް ގެންގޮސްފައެވެ. އޭނާ މަރުވި ގޮތް ހޯދަން ހަށިގަނޑު ބޭރަށް ފޮނުވަން ނިންމާފައިވާ ކަމަށް ވެސް "ސަން"އަށް ވަނީ މައުލޫމާތު ލިބިފައެވެ.
އެ އަންހެން މީހާ މަރާލި ކަމަށް އޭނާގެ ފިރިމީހާ، އދ. ފެންފުށީ، ފައިސަލް އަލީގެ މައްޗަށް ވަނީ ތުހުމަތު ކުރެވިފައެވެ. އޭނާ މަސައްކަތް ކުރަނީ، ނޮޅިވަރަމް ފެނަކަ ބްރާންޗްގެ ޓެކްނީޝަނެއްގެ ވަޒީފާގައެވެ. ނިޝާމާގެ މަރަށް ފަހު އޭނާ ވަނީ ފިލައިގެން ކުޅުދުއްފުއްޓަށް ގޮސްފައެވެ.
"ސަން" އަށް އެނގިފައިވާގޮތުގައި ފަހުން ފައިސަލް ވަނީ ކުޅުދުއްފުށީ ޕޮލިސް ސްޓޭޝަނަށް ގޮސް ހަވާލުވެފައެވެ. އަދި އޭނާ ހައްޔަރު ކުރުމަށް ކުރަން ޖެހޭ މަސައްކަތް ފުލުހުން އަންނަނީ ކުރަމުންނެވެ.
އެނގިފައިވާގޮތުގައި ފައިސަލްއަކީ މަސްތުވާތަކެތި ބޭނުން ކުރާކަމަށް ތުހުމަތު ކުރެވޭ މީހެކެވެ. ނިޝާމާއާ ކައިވެނިކޮށްގެން އެ ދެމީހުން ކުރިން ދިރިއުޅެމުން އައީ ފެންފުށީގައެވެ. ނޮޅިވަރަމްއަށް ބަދަލުވީ މިއަހަރުގެ ތެރޭގައެވެ.
"މިރަށުގައި ވެސް މަސްތުވާތަކެތި ބޭނުން ކުރާ މީހުންނާއެކު މުޅިން އުޅޭނީ. ނިޝާމާ އުޅޭނެ ދަންވަރު ވެސް ނުކުމެ އޭނާ ނުފެނިގެން،" ނޮޅިވަރަމްއިން ވާހަކަ ދެއްކި މީހަކު ބުންޏެވެ.
"ސަން" އިން ނިޝާމާގެ އާއިލާގެ މެމްބަރަކަށް ގުޅާލުމުން ވެސް ބުނީ މަރާލި ކަމަށް ތުހުމަތު ކުރަނީ ނިޝާމާގެ ފިރިމީހާއަށް ކަމަށާއި އޭނާ ވަނީ ފިލައިގެން ގޮސްފައި ކަމަށެވެ. އިތުރު ތަފްސީލެއް ނުދިނެވެ.
ނިޝާމާ މަރާލީ ކީއްވެގެން ކަމެއް އަދި ޖެހުނީ ކޮން މައްސަލައެއް ކަމެއް އަދި ނޭނގެއެވެ.
ނިޝާމާ އާއި އޭނާގެ ފިރިމީހާ އިނދެގެން އުޅޭތާ އަހަރުތަކެއް ވެފައިވާއިރު އެ ކައިވެންޏަށް ތިން ކުދިން ވަނީ ލިބިފައެވެ. ދޮށީ ކުއްޖާގެ އުމުރުން ހަތް ވަރަކަށް އަހަރު ވެފައިވާއިރު ހަގު ދަރިފުޅު އުޅެނީ ބޭބީ ނާސަރީގައެވެ.