ބާލީ (15 ނޮވެމްބަރު 2022): ދުނިޔޭގައި އިގްތިޞާދީގޮތުން އެންމެ ބޮޑަށް ކުރިއަރާފައިވާ 20 ގައުމު ހިމެނޭ ޖާމާއަތް ކަމަށްވާ ޖީ ޓުވެންޓީގެ އިސްވެރިންގެ ސަމިޓް އިންޑޮނީޝިއާގެ ބާލީ ގައި މިއަދު ހެނދުނު ފަށައިފިއެވެ.
މިސަމިޓް އިފްތިތާޙު ކުރުމުގެ ގޮތުން ދެއްވި ޚިތާބުގައި އިންޑޮނީޝިއާގެ ރައީސް ޖޯކޯ ވިޑޯޑޯ ވިދާޅުވީ ޔޫކްރެއިން ހަނގުރާމަ ހުއްޓުމަކަށް ގެންނަންޖެހޭ ކަމަށާއި އިތުރު ބޮޑު ހަނގުރާމައަކަށް ދެން ތަންދީގެން ނުވާނެކަމަށެވެ.
ޖީ ޓުވެންޓީގެ އިސްވެރިންގެ ސަމިޓްގެ މަޝްވަރާތަކުގެ ބޮޑުބައި އަމާޒުވާނީ ޔޫކްރެއިން ހަނގުރާމައިގެ މައްޗަށްކަމަށް ވަނީ ބެލެވިފައެވެ. މިގޮތުން ޔުކްރެއިން ހަނގުރާމައިގެ ގެއްލުންތަކާ އެހަނގުރާމަ އިތުރަށް ފެތުރި ފުޅާވިޔަ ނުދިނުމާއި އަދި ހަނގުރާމަ ނިމުމަކަށް ގެނެވޭނެ ގޮތްތަކާބެހޭގޮތުން މިސަމިޓްގައި ވަރަށް ފުޅާދާއިރާއެއްގައި މަޝްވަރާކުރާނެކަމަށް މުރާސިލުން ބުނެއެވެ.
މިސަމިޓްގައި ބައިވެރިވާ އެމެރިކާއާއި ޔޫރަޕްގެ ލީޑަރުން ގެންދަވަނީ ސަމިޓުން ނެރުމަށް ހަމަޖެހިފައިވާ ގުޅިފައިވާ ބަޔާނުގައި ވަރަށް ހަރުކަށި އިބާރާތުން ރަޝިއާ ކުށްވެރި ކުރެވޭނެގޮތެއްވޭތޯ ބަލަމުންނެވެ. ސަމިޓުން ނެރުމަށް ހަމަޖެހިފައިވާ ބަޔާނުގައި ކަމެއް ހިމެނޭނީ ސަމިޓްގައި ބައިވެރިވާ 20 ގައުމު އެއްގަލަކަށް އަރައި އެކަމަށް އެއްބާރުލުން ދީގެންނެވެ.
ރަޝިއާ ކުށްވެރިކޮށް ބަޔާން ނެރުމަށް އެމެރިކާއާއި ޔޫރަޕްގެ ގައުމުތަކާއި ޔޫރަޕްގެ އިއްތިހާދު ފިޔަވައި އެހެން ގައުމުތަކުން އެއްބާރުލުން ލިބޭނެކަމަށް ނުބެލެވޭތީ ސަމިޓުން ނެރޭ ބަޔާނުގައި ރަޝިއާ ކުށްވެރިކުރުމުގެ ފުރުސަތު ކުޑަ ކަަމަށް ރިޕޯޓްތައް ބުނެއެވެ. ނަމަވެސް ސަމިޓްގެ ބަޔާނުގައި ޔުކްރެއިން ހަނގުރާމަ ހުއްޓާލުމަށް ގޮވާލުން އެކަށީގެންވެއެވެ.
ޖީ ޓުވެންޓީ ޖަމާއަތަކީ 1999 ވަނަ އަހަރު ވުޖޫދަށް އައި ޖަމާއަތެކެވެ. އެޖަމާއަތުގައި ހިމެނެނީ އެއްޓްރިލިޔަން ޑޮލަރަށްވުރެ ގައުމީ އާމްދަނީ ބޮޑު 19 ގައުމާއި ޔޫރަޕްގެ އިއްތިޙާދެވެ. އިންޑޮނީޝިއާގައި މިއަދު ފެށި ޖީ ޓުވެންޓީގެ ސަމިޓްގައި ރަޝިއާގެ ރައީސް ވްލަޑިމީރު ޕޫޓިން ބައިވެރިވެ ވަޑައިނުގަންނަވައެވެ. ރަޝިއާގެ ވަފްދުގެ އިސްވެރިއަކަށް ހުންނެވީ ޕޫޓިންގެ ބަދަލުގައި ރަޝިއާގެ ޚާރިޖީ ވަޒީރު ސާރްގީ ލާވްރޮވްއެވެ.
ޝީއާއި ބައިޑެން ބައްދަލުކުރައްވަނީ
ސައޫދީ އަރަބިއާއަށް ބަލާއިރު އެގައުމުގެ ވަފްދުގެ އިސްވެރިއަކަށް ހުންނެވީ ސަލްމާން ރަސްގެފާނުގެ ބަދަލުގައި ވަލީއުލްއަހްދު މުހައްމަދު ބިން ސަލްމާންއެވެ. ޖީ ޓުވެންޓީ ޖަމާއަތުގެ މައިގަނޑު އަމާޒަކީ އިގްތިޞާދީ ގޮތުން އެއްގައުމު އަނެއްގައުމަށް އެއްބާރުލުންދިނުމާއި އިގްތިޞާދީ މައްސަލަތައް ހައްލުކުރުމާއި ދުނިޔޭގެ ކާބޯތަކެތީގެ ރައްކާތެރިކަން ކަށަވަރު ކުރުމަށް މަސައްކަތް ކުރުންފަދަ ކަންކަމެވެ.
ނަމަވެސް ދުނިޔޭގައި ހިނގާ ބޮޑެތި ސިޔާސީ ކަންކަމާއި އަމަނާއި ސަލާމަތާބެހޭ ކަންކަމާއި އަދި ޖިއޮޕޮލިޓިކަލް ކަންކަމާމެދު ބަހުސްކޮށް ގޮތްފާޑުކިޔުމަކީ އެޖަމާއަތުގެ ސަމިޓްތަކުގައި ހިނގަމުންދާ ކަމެކެވެ.
ޖީ ޓުވެންޓީގެ ސަމިޓް ފެށުމުގެ ކުރިން ދުނިޔޭގެ ބޮޑު ދެބާރުކަމަށްވާ އެމެރިކާއާއި ޗައިނާގެ ރައީސުންވަނީ ބާލީގައި ބައްދަލުކުރައްވާފައެވެ. މި ބައްދަލުކުރެއްވުމުގައި އެމެރިކާގެ ރައީސް ބައިޑެންވަނީ އެމެރިކާއާއި ޗައިނާގެ ވާދަވެރިކަން ހަނގުރާމައަކާ ހިސާބަށް ނުގެންދާނެކަމުގެ ޔަގީންކަން ދެއްވާފައެވެ. އަދި ދުނިޔެއަށް ކުރިމަތިވާ މައްސަލަތަކާ ކުރިމަތިލުމުގައި ދެގައުމު ގުޅިގެން މަސައްކަތް ކުރެވޭނެ ކަމަށްވެސް ބައިޑަން ވިދާޅުވިއެވެ.
މި ބައްދަލުކުރެއްވުމުގައި ޗައިނާގެ ރައީސް ޝީ ވަނީ ޗައިނާއާއި އެމެރިކާއާ ދެމެދުގައިވާ ވާދަވެރިކަމާއި އަރާރުންތައް ދެގައުމަށް ކޮންޓްރޯލް ކުރެވެންޖެހޭނެކަމަށް ވިދާޅުވެފައެވެ. އަދި ދެގައުމުގެ މެދުގައިވާ އިތުބާރުގެ މައްސަލަތައްވެސް ގޯހުން ގޯހަށް ނުދާނެގޮތެއްގެ މަތިން ދެގައުމުގެ މެދުގައި އަބަދުވެސް އަންޑަސްޓޭންޑިން އޮންނަންވާނެކަމާއި އެއްގައުމުން އަނެއް ގައުމަށް އިހުތިރާމް ކުރަންޖެހޭނެކަމަށް ޝީ ވިދާޅުވިއެވެ. މީގެއިތުރުން ދުނިޔޭގެ ސުލްހައާއި ހަމަޖެހުމަށްޓަކައި ދެގައުމު ގުޅިގެން މަސައްކަތް ކުރުމަށްވެސް ޝީއާއި ބައިޑެން އެއްބަސްވެވަޑައިގެންނެވިއެވެ.
ޗައިނާގެ ރައީސް އާ ބައްދަލުކުރެއްވުމުގެ ކުރިން އެމެރިކާގެ ރައީސްވަނީ ޗައިނާ ހުރަސްކޮށްގެން ނުވާނެ ރަތްރޮނގު ޗައިނާ ރައީސް އަށް ކިޔައިދެއްވާނެ ކަމަށް ވިދާޅުވެވަރަށް ބޮޑާ ގޮތަކަށް ވާހަކަ ދައްކަވާފައެވެ. ނަމަވެސް ބާލީގައި އިއްޔެ ބޭއްވި ޝީއާއި ބައިޑެންގެ ސަމިޓްގައި ބައިޑެން ކުރިން ވިދާޅުވި ރަތް ރޮނގުގެ ވާހަކަ އެއްވެސް ވަރަކަށް އޭނާ ދައްކަވާފައެއް ނުވެއެވެ. ޗައިނާގެ ކުރިމަތީގައި މާގިނަ އުކުޅުތަކެއް ދައްކަން އެމެރިކާގެ ރައީސްއަށް ކެރިވަޑައިގެންފައެއް ނުވެއެވެ.