"މަނިކޭ މަގޭ ހިތޭ" ލަވައިން ބޮޑު މަގުބޫލުކަމެއް ހޯދި، ސްރީލަންކާގެ ލަވަ ކިޔުންތެރިޔާ، ޔޮހާނީ ޑިލޯކާ ޑިސިލްވާ ޝޯއެއް ދިނުމަށް ރާއްޖެ އައުމަށް ނިންމައިފިއެވެ.
ރާއްޖޭގެ މަޝްހޫރު ސްޓްރީމިން އެޕް، ބައިސްކޯފުން "ޗަނާޗާ 2022" ގެ ނަމުގައި އެ ޝޯ ބޭއްވުމަށް ނިންމާފައި ވަނީ މިމަހު 28 ގައި ހުޅުމާލޭ ސިންތެޓިކް ޓްރެކުގައެވެ. އެ ޝޯ އޮންނާނީ އެ ދުވަހުގެ 4:00 އިން ހަވީރު 6:00 އަށް އަދި އެރޭ 8:00 އިން 12:00 އަށެވެ.
ހަވީރުގެ ޝޯއަށް ހިލޭ ވަދެވޭއިރު ރޭގަނޑު ޝޯއަށް ވަދެވެނީ 150 ރުފިޔާގެ ޓިކެޓެއް ގަނެގެންނެވެ. އެ ޝޯގެ ޓިކެޓް ބައިސްކޯފުން މިހާރު އަންނަނީ ވިއްކަމުންނެވެ. އޮންލައިންކޮށް އެ ޓިކެޓް ގަނެވޭނެއެވެ.
އެ ޝޯގައި އުމުރުން 29 އަހަރުގެ ޔޮހާނީގެ ލައިވް ޕާފޯމަންސް ފެނިގެން ދާނެއެވެ. އޭނާއާއެކު އެހެން މިއުޒީޝަނުން ވެސް ބައިވެރިވާނެއެވެ. އަދި ދިވެހި މަޝްހޫރު ގިނަ ބޭންޑްތަކަކުން ވެސް ލަވަތައް ހުށަހަޅައި ދޭނެއެވެ.
އޭގެ ތެރޭގައި ރެވިއޯ، އެކުއެޓިކް ވައިބް، ޓްރެފިކް ޖޭމް، އަޗޭސިއާ، ސިމްބޮލިކް ރެކޯޑްސް، ޑީ ޓިއުން ބޭންޑް، ފަސީ ލައިވް، ހަމްބްލް ބަކަރި، އަދި ވެސް އިތުރު ލަވަކިޔުންތެރިން ހިމެނެއެވެ. މިއީ މިއަހަރު ބާއްވާނެ އެންމެ ބޮޑު މިއުޒިކް ފެސްޓިވަލަށް ވާނެ ކަމަށް ބައިސްކޯފުން ބުނެއެވެ.
މިދިޔަ އަހަރުގެ ސެޕްޓެމްބަރު މަހު ޔޮހާނީ ޔޫޓިއުބުގައި އާއްމުކުރި "މަނިކޭ މަގޭ ހިތޭ" ލަވައިން ދުނިޔޭގެ ގިނަ ބައެއްގެ ސަމާލުކަން އޭނާއަށް ލިބުނެވެ. މިހާތަނަށް 227 މިލިއަން ވިއުސް އެ ލަވައަށް ޔޫޓިއުބުން އެކަނި ލިބިފައިވެއެވެ.
އިންޑިއާގައި ވެސް އެ ލަވަ ވަރަށް މަޝްހޫރުވެ، ޓީވީ ޗެނަލްތަކުގެ މަޝްހޫރު ޝޯތަކުގައި ފީޗާކުރިއެވެ. ބޮލީވުޑްގެ މަޝްހޫރު ތަރި، ނޯރާ ފަތޭހީއާއެކު ވަރަށް ފަހުން އެ ލަވައިގެ ރިމޭކެއް ނެރެފައިވެއެވެ. އެ ލަވައަށް ވެސް މިހާތަނަށް 80 މިލިއަން ވިއުސް ވަނީ ލިބިފައެވެ.
ޗަނާޗާ އަކީ ބައިސްކޯފުން ކޮންމެ އަހަރަކު ވެސް ބާއްވަމުން އަންނަ ޝޯއެކެވެ. އެ ޝޯގެ މަގުސަދަކީ ދިވެހި ފަންނާނުންނަށް ފުރުސަތުދީ ކުރިއެރުވުމެވެ.