ޔުނައިޓެޑް ވިކްޓްރީއަށް ކުޅެމުންއަންނަ ދެ ކުޅުންތެރިންކަމަށްވާ މިލޯސް ކޮވަސިޗް އާއި މިޑްފީލްޑަރު އީވާން ވެރަސްއަށް ދޭންޖެހޭ މުސާރަ ދީފިއެވެ.
މުސާރަ ނުދޭކަމަށް ބުނެ އެ ދެ ކުޅުންތެރިން ވަނީ މިދިޔަ ހަފުތާގައި ގަލޮޅު ދަނޑުގައި ހަޅުތާލު ކޮށްފައެވެ. އެ ހަޅުތާލު ނިންމާލީ އެފްއޭއެމްގެ ރައީސް ބައްސާމް އަދީލް ޖަލީލް އެ ކުޅުންތެރިންނާ ބައްދަލުކޮށް މުސާރަ ދޭނެކަމަށް ވައުދުވުމުންނެވެ.
އެފްއޭއެމްގެ ޖެނެރަލް ސެކްރެޓަރީ ހުސައިން ޖަވާޒް "ސަން"އަށް ވިދާޅުވީ އެފްއޭއެމްއިން ޔުނައިޓެޑް ވިކްޓްރީއަށް ބަޖެޓެއް ދީގެން އެ ކުޅުންތެރިންނަށް ދޭންޖެހޭ މުސާރަ ދީފައިވާކަމަށެވެ.
"ސަން"އަށް އެނގިފައިވާ ގޮތުގައި މުސާރަ ލިބުމާއެކު އެ ދެ ކުޅުންތެރިން މިހާރު ދަނީ އެ ކުޅުންތެރިންގެ ގައުމަށް އެނބުރި ދިއުމަށް ތައްޔާރު ވަމުންނެވެ.
އެގޮތުން މިލޯސް އަންނަ އަންގާރަ ދުވަހު ގައުމަށް ދާން ފުރާއިރު އީވާން މި މަހުގެ 19،20 ހިސާބުގައި ފުރާނެއެވެ.
ރާއްޖޭގެ ފުޓުބޯޅައިގައި ކުޅުންތެރިންނަށް ދޭންޖެހޭ މުސާރަ ނުދިނުމުގެ މައްސަލަތައް ވަރަށް ބޮޑަށް ވަނީ ކުރިމަތިވެފައެވެ.
އެގޮތުން ގްރީން ސްޓްރީޓްސްއަށް ކުޅުނު ސްޕެއިންގެ ފޯވާޑް އެންޖަލް މުނޯޒްއަށް މުސާރަ ނުދޭތީ ފީފާއިން ވަނީ އެ ކްލަބާ ދެކޮޅަށް ފިޔަވަޅު އަޅައިފައެވެ. ކުރިއަށް އޮތް ޓްރާންސްފާގެ ތިން ޕީރިއަޑްގައި ވެސް ގްރީންއަށް އާ ކުޅުންތެރިން ނުގެނެވޭނެއެވެ. އެ އަދަބުން ސަލާމަތް ވާނީ އެ ފައިސާ ދެއްކުމުންނެވެ.
ގްރީންގެ އިތުރުން ބައެއް އެހެން ކްލަބްތަކުގެ ދިވެހި އަދި ބިދޭސީ ކުޅުންތެރިންނަށް ވެސް މުސާރަ ދީފައި ނުވާ މައްސަލަތައް ވަނީ ފެންމަތިވެފައެވެ. ގްރީން އިން އޭގެ ފަހުން ނެރުނު ބަޔާނެއްގައި ބުނެފައި ވަނީ އަންނަ ސީޒަން ފެށުމުގެ ކުރިން، އެ ކްލަބަށް ދިމާވެފައިވާ ހާލަތުން އަރައިގަނެ ފީފާގެ އަދަބުން ސަލާމަތްވާނެ ކަމަށެވެ.