މިދިޔަ ބުރާސްފަތި ދުވަހު ފ. ބިލެއްދޫގައި މަސައްކަތް ކުރަން އުޅޭ ބިދޭސީންތަކެއް ރަށުތެރޭގައި ބުދަކަށް އަޅުކަންކުރި މައްސަލައިގައި ތިން ބިދޭސީ ފިރިހެނުން ހައްޔަރުކޮށްފިއެވެ.
އެކަމާ ގުޅިގެން ފުލުހުންގެ މީޑިއާ އޮފިޝަލަކު ވިދާޅުވީ އެ މައްސަލަ ބުރާސްފަތި ދުވަހު ފުލުހުންނަށް ރިޕޯޓުކޮށްފައިވާކަމަށެވެ. އަދި އެ މައްސަލައިގައި ޝާމިލުވާ ތިން ބިދޭސީން އިއްޔެ ހައްޔަރުކޮށްފައި ވަނީ ކޯޓު އަމުރެއްގެ ދަށުން ކަމަށް އޭނާ ވިދާޅުވިއެވެ. އެގޮތުން އެ މައްސަލައިގައި ހައްޔަރުކުރީ އުމުރުން 27 އަހަރުގެ މީހަކާއި، 37 އަހަރުގެ މީހެއްގެ އިތުރުން 39 އަހަރުގެ މީހެކެވެ.
"އެ މީހުންގެ ބަންދަށް ކޯޓުން 10 ދުވަސް މިއަދު ވަނީ ދީފައި،" ފުލުހުންގެ މީޑިއާ އޮފިޝަލް ވިދާޅުވިއެވެ.
ބިދޭސީ ބަޔަކު ބުދެއް ހިފައިގެން ބިލެއްދޫ މަގެއްމަތިން ހިނގާފައިދާ މަންޒަރު ފެންނަ ފޮޓޯއެއް މިދިޔަ ހުކުރު ދުވަހު ސޯޝަލް މީޑިއާގައި ވަނީ ދައުރުވެފައެވެ. އަދި އެ މީހުން ދިރިއުޅޭ ތަން އެރަށު ރައްޔިތުން ބަލައި ފާސް ކުރާ ވީޑިއޯއެއް ވެސް ދަނީ ދައުރުވަމުންނެވެ.
އެކަމާ ގުޅިގެން އެރަށު ކައުންސިލްގެ ރައީސް އަޙްމަދު އަސްލަމް 'ސަން'އަށް ވިދާޅުވީ އެކަން ހިނގާފައިވަނީ ބުރާސްފަތި ދުވަހު މެންދުރު ކަމަށެވެ. އަދި އެ މައްސަލަ ކައުންސިލްގެ ސަމާލުކަމަށް އައިސްފައިވަނީ އެދުވަހުގެ ރޭގަނޑުގެ ވަގުތެއްގައި، ސޯޝަލް މީޑިއާ މެދުވެރިކޮށް ކަމަށް އަސްލަމް ވިދާޅުވިއެވެ.
"އެ މައްސަލައިގައި ޝާމިލުވާ ކަމަށް ބެލެވެނީ އިންޑިއާއަށް ނިސްބަތްވާ ތިން މީހެއް. އަޅުގަނޑުމެން އެދުނިން އެކަމުގަ ޝާމިލުވާ އެންމެންނަށް ވެސް އެންމެ ހަރުކަށި ފިޔަވަޅު އެޅުމަށް،" އަސްލަމް ވިދާޅުވިއެވެ.
އެ ބިދޭސީންގެ ގެ ބަލައިފާސް ކުރުމުގައި ހަރަކާތްތެރިވި އެރަށު ރައްޔިތަކު މީގެކުރިން މި ނޫހަށް މައުލޫމާތު ދެމުން ބުނީ ބިދޭސީން ދިރިއުޅެމުން ދިޔަ ދެ ތަނެއް ފުލުހުންނާއި ކައުންސިލާއި އާންމު ބައެއް ރައްޔިތުންގެ ހާޒިރުގައި ބަލައިފައިވާ ކަމަށެވެ. އަދި އެމީހުންނާ ސުވާލު ކުރުމުން އެއީ އެމީހުން އަމިއްލައަށް ހެދި ބުދެއް ކަމަށް އެމީހުން ބުނެފައިވާ ކަމަށް އޭނާ ބުންޏެވެ.
"އެމީހުން ބުނީ އެ ބުދަކީ އެމީހުން އަމިއްލައަށް ހެދި އެއްޗެއް ކަމަށް. އެއީ ޗަކައިން ހަދާފައިވާ ބުދެއް ކަމަށް ބުނި. އަދި އެމީހުން ގެންގުޅުނު ކުލަ ފޮއްޓަކުން އޭގައި ކުލަ ޖައްސާފައިވާ ކަމަށް އެމީހުން ވަނީ ބުނެފަ،" އެރަށުން 'ސަން'އަށް މައުލޫމާތު ދިން މީހާ ބުންޏެވެ.
އޭނާ ބުނި ގޮތުގައި ބިދޭސީން ދިރިއުޅެމުން އައި ތަނުން އިތުރު ބުދެއް ފެނިފައެއް ނުވެއެވެ. ނަމަވެސް އެތަނުން ޗަކައާއި ކުލަ ފޮށި ފެނިފައިވާކަން އޭނާ ފާހަގަކުރިއެވެ.
"އެ މީހުން ބުނީ އެ ބުދަށް އަޅުކަން ކުރުމަށްފަހު އެ ބުދު މޫދަށް ފައްތާފައިވާ ކަމަށް،" އޭނާ ބުންޏެވެ.
އެމައްސަލައިގައި އިތުރަށް ބަލަންޖެހޭ ކަންކަން ފުލުހުން ދަނީ ބަލަމުންނެވެ.