މަސް މާރުކޭޓުގެ މަތީގައި ޑްރަގް ބޭނުންކުރަމުން އަންނާތީ އެތަން ބަންދު ކުރުމަށް މާލޭ ސިޓީ ކައުންސިލުން މިއަދު ނިންމައިފިއެވެ.
މި ގޮތަށް ނިންމީ ސިޓީ ކައުންސިލާއި ޕޮލިސް ކޮންސްޓިބިއުލަރީ، އަދި ފުލުހުންގެ ޑްރަގު އެންފޯސްމެންޓް ޑިޕާޓްމެންޓް ގުޅިގެންނެވެ.
މަސް މާރުކޭޓުގެ މަތީގައި ބަޔަކު މަސްތުވާތަކެތި ކަމަށް ބެލެވޭ އެއްޗެއް ބޭނުންކުރާ ވީޑިއޯއެއް މީސް މީޑިއާގައި މިއަދު ވަނީ އާއްމު ކޮށްފައެވެ.
އެ ވީޑިއޯއިން ފެންނަނީ މާރުކޭޓުގެ މަތީގައި އޮންނަ ހުސްތަންކޮޅުގެ ތަޅުންގަނޑު މަތީގައި ދެމީހަކު އިށީނދެގެން ތިބެ، ދިވެހި ލަވައެއް ކިޔަމުން ވަރަށް ފާޅުކަން ބޮޑު ގޮތެއްގައި މަސްތުވާތަކެތި ކަމަށް ބެލެވޭ އެތި ބޭނުންކުރާ ތަނެވެ. އެވަގުތު، އެތަނާއި ތަންކޮޅެއް ދުރުގައި މަސްތުވެގެން ބިއްޖެހިފައި ތިބި ކަމަށް ބެލެވޭ އެހެން ހަ މީހަކު ވެސް މަޖާކޮށް ސަކަރާތް ޖަހަމުން ގެންދެއެވެ.
މަސް މާރުކޭޓުގައި ޑްރަގް ބޭނުން ކުރާ ތަން ފުލުހުންނާއި ސިޓީ ކައުންސިލުން ބަލަނީ --
މާރުކޭޓުގެ ތިރީގައި ހުރި އަށި ތަކުގެ މަތީގައި މަސް ބަހައްޓައިގެން ވިއްކަން ތިބޭ މީހުން ފެންނާތީ، އެއީ ބާޒާރުމަތީގެ އެންމެ ކާރޫބާރޫ ބޮޑު ގަޑި ކަމަށް ބެލެވެއެވެ.
ވީޑިއޯއަށް ކޮމެންޓް ކުރި މީހަކު ވަނީ ބިރަކާ ނުލާ މަޖާ ކުރުމާއި ލިވާތު ކުރުމާއި އަދި ޑްރަގް ނަގަމުން އަންނައިރު ފުލުހުންގެ ދައުރު މި ރާއްޖެއިން ފެނޭތޯ ސުވާލު ކޮށްފައެވެ.
ގޭގޭ ސިޑި މައްޗާއި މިސްކިތުގެ ފާޚާނާ ތެރޭ މަސްތުވާތަކެތީ ބޭނުން ކުރުމަކީ މިހާރު އާއްމު ކަމެކެވެ. މީގެ އިތުރުން ޕާކު ތަކާއި ހުސް ގޯތިތަކަށް ވަދެ، ފާޅުގައި މަސްތުވާތަކެތި ބޭނުންކުރުމުގެ މައްސަލަތައް ވެސް އަންނަނީ ގިނަ ވަމުންނެވެ.