އެމްއެމްޕީއާރްސީގެ ޚިޔާނާތުގެ ފައިސާ ދައުރުކުރި އެސްއޯއެފްގެ އެކައުންޓުގައި އެއްވެސް ފައިސާއެއް ނެތުމުން އެ އެކައުންޓް ފްރީޒް ކުރުމުގެ މަސައްކަތް އެންޓި ކޮރަޕްޝަން ކޮމިޝަން (އޭސީސީ) އިން ހުއްޓާލައިފިއެވެ.
އެސްއޯއެފްގެ އެކައުންޓް ފްރީޒް ކުރުމުގެ މަސައްކަތް ހުއްޓާލިކަން އެ ކޮމިޝަނުގެ ސީނިއާ ކޮމިއުނިކޭޝަން އޮފިސަރު ނިޝާން މުހައްމަދު ދީދީ ވަނީ "ސަން"އަށް ކަށަވަރުކޮށްދީފައެވެ. އެނގިފައިވާ ގޮތުގައި އެ މަސައްކަތް ހުއްޓާލީ އެ ކައުންޓުގައި ފައިސާ ނެތްކަން އެނގުމުންނެވެ.
ގިނަ ދުވަސްތަކެއް ވަންދެން ފްރީޒްކޮށްފައިވާ އެ އެކައުންޓް މި މަހުގެ ހަތް ވަނަ ދުވަހު އަންފްރީޒް ކުރުމުން އޭސީސީން ވަނީ އެ އެކައުންޓް އަލުން ފްރީޒް ކުރުމުގެ މަސައްކަތް ފަށައިފައެވެ. ނަމަވެސް އެ ކޮމިޝަނުން ބެލިބެލުމުން އެ އެ ކައުންޓްގައި އެއްވެސް ފައިސާއެއް ނެތްކަން ވަނީ އެނގިފައެވެ.
އެކައުންޓްގައި ހުރި ފައިސާއަށް ވީގޮތެއް ދައުލަތުގެ އެއްވެސް އިދާރާއަކުން ބުނެދީފައެއް ނުވެއެވެ.
މިކަމާ ގުޅޭގޮތުން އޭސީސީގެ ސީނިއާ ކޮމިއުނިކޭޝަން އޮފިސަރު ނިޝާން ވިދާޅުވީ އެ ކޮމިޝަނުން ބެލިބެލުމުން އެސްއޯއެފްގެ އެކައުންޓް އަލުން ފްރީޒް ކުރަންޖެހޭ ސަބަބެއް ނެތްކަން އެނގިފައިވާ ކަމަށެވެ. އަދި އެކަމާ ގުޅިގެން މާކުރިން ސިވިލް ކޯޓުން ގޮތް ނިންމާފައިވާ ކަމަށް އޭނާ ވިދާޅުވި އެވެ.
"ސީދާ އެސްއޯއެފް ޕްރައިވެޓް ލިމިޓެޑްގެ ނަމުގައި އިން އެކައުންޓް ފިޔަވައި ދެން އެ ކުންފުންޏާ ގުޅޭ އެހެން އެކައުންޓްތައް އަދިވެސް ހުރީ ފްރީޒްކޮށްފައި،" ނިޝާން ވިދާޅުވިއެވެ.
އެސްއޯއެފް ކުންފުނީގެ މައި ހިއްސާދާރު، މުހައްމަދު އައްލާމް ލަތީފް (މޮހޯ)ގެ މައްޗަށް އެ މައްސަލާގައި ތުހުމަތުކޮށް ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ތަހުގީގު ހިންގަން ފެށިއެވެ.
ރާއްޖެއިން ބޭރަށް ގޮސް ފިލާފައިވާތީ އޭނާ އާއި އިތުރު ބަޔަކު ހޯދަން އިންޓަޕޯލުން ރެޑް ނޯޓިސް ވެސް ނެރުނެވެ. ނަމަވެސް މި ސަރުކާރު އައިފަހުން ޕްރޮސިކިއުޓާ ޖެނެރަލްގެ އޮފީހުން ވަނީ މޮހޯގެ މައްޗަށް ދައުވާ ނުކުރަން ނިންމައި ދައުލަތުގެ ހެއްކަކަށް އޭނާ ހަދައިފައެވެ.
އެމްއެމްޕީއާރްސީގެ ހިޔާނާތުގެ ފައިސާގެ ޖުމްލަ އަދަދު 1.4 ބިލިއަން ރުފިޔާއަށް އަރާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ވަނީ ބުނެފައެވެ.
އެމްއެމްޕީއާރްސީގެ ޚިޔާނާތުގެ މައްސަލަ ބެލުމަށް ރައީސް އިބްރާހީމް މުހައްމަދު ޞާލިހް އެސެޓް ރިކަވަރީ ކޮމިޝަނެއް އުފެއްދެވިއެވެ. ނަމަވެސް މިހާރު ވަނީ އެ ކޮމިޝަން އުވާލައިފައެވެ.
މިހާތަނަށް މި ސަރުކާރުން ކުރި މަސައްކަތުން ވެސް އެ ޚިޔާނާތުގެ ފައިސާ ހޯދިފައިނުވާތީ ގިނަ ބައެއްގެ ފާޑުކިޔުން ވަނީ ސަރުކާރަށް އަމާޒުވެފައެވެ.