ފެލިވަރުގައި އަލަށް ގާއިމުކުރުމަށް ހަމަޖެހިފައިވާ 4000 ޓަނުގެ ކޯލްޑް ސްޓޯރޭޖް ވަސީލަތުގެ ބީލަން މަރުހަލާ ފެށިއްޖެއެވެ.
އިކޮނޮމިކް މިނިސްޓްރީން މިއަދު ބުނީ އެ މަޝްރޫއުގެ ޕްރިކޮލިފިކޭޝަން މަރުހަލާ މިހާރު ނިމިފައިވާ ކަމަށެވެ. އަދި އެ މަޝްރޫއުގެ ދަށުން ކޯލްޑް ސްޓޯރޭޖެއްގެ އިތުރުން ދުވާލަކު 200 ޓަނުގެ މަސްގަނޑު ކުރެވޭ ބްރައިން ފްރީޒިން ފެސިލިޓީއެއް ގާއިމުކުރެވޭނެކަމަށް ވެސް އެ މިނިސްޓްރީން ބުންޏެވެ.
އިންޑިއާގެ އެގްޒިމް ބޭންކުގެ ލޯނު އެހީގެ ދަށުން ކުރިއަށްދާ މި މަޝްރޫއުގެ ދަށުން ގއ. ގެމަނަފުށީގައި 50 ޓަނުގެ އައިސް ޕްލާންޓަކާއި 100 ޓަނުގެ އައިސް ސްޓޯރޭޖެއް ވެސް ގާއިމުކުރުމަށް ހަމަޖެހިފައިވެއެވެ.
އިކޮނޮމިކް މިނިސްޓްރީން ބުނީ މި މަޝްރޫއުގެ ސަބަބުން މިފްކޯގެ ކޯލްޑް ސްޓޯރޭޖް ފެސިލިޓީ 48 ޕަސެންޓު އިތުރުވާނެ ކަމަށާއި، ފްރީޒިން ކެޕޭސިޓީ 37 އިންސައްތަ އިތުރުވާނެއެވެ.
މީގެ އިތުރުން ވެސް ފެލިވަރުގެ ބިން ހިއްކައި، ބަނދަރު ތަރައްގީކުރުމަށް 113 މިލިއަން ރުފިޔާގެ މަޝްރޫއެއް އިންޑިއާ ސަރުކާރުގެ އެހީގައި ކުރިއަށް އެބަދެއެވެ.