ދިވެހި ފުލުހުންގެ 89 ވަނަ އަހަރީ ދުވަހުގެ މުނާސަބަތުގައި މިރޭ ހަވާ އަރުވަން ނިންމައިފިއެވެ.
ފުލުހުން ބުނީ ހަވާ އެރުވުން ބޭއްވުމަށް ހަމަޖައްސާފައިވަނީ މިރޭ 10 ޖަހާއިރު، ހުޅުމާލޭ ސެންޓްރަލް ޕާކުގައި ކަމަށެވެ.
ފުލުހުންގެ އަހަރީ ދުވަސް ނުހަނު ކުލަގަދަކޮށް ފާހަގަ ކުރަމުން އަންނައިރު މާލެއާއި އަތޮޅުތަކުގައި ގާއިމު ކޮށްފައިވާ ޕޮލިސް ސްޓޭޝަންތަކުގައި ދިދަ ނެގުމުގެ ރަސްމިއްޔާތެއް ވަނީ ބާއްވައިފައެވެ.
މާލޭގައި ދިދަ ނެގުމުގެ ރަސްމިއްޔާތު ކުރިއަށް ގެންގޮސްފައިވަނީ ހޯމަ ދުވަހުގެ ރޭ ފުލުހުންގެ މައި މަރުކަޒު ޝަހީދު ޙުސައިން އާދަމް ބިލްޑިންގު ކުރިމަތީގައެވެ. އަތޮޅުތަކުގައި ދިދަ ނެގުމުގެ ރަސްމިއްޔާތު ކުރިއަށް ގެންގޮސްފައިވަނީ އެ ރަށްރަށުގެ ޕޮލިސް ސްޓޭޝަންތަކުގައެވެ.
ފުލުހުންގެ އަހަރީ ދުވަހުގެ މުނާސަބަތުގައި ޖުމްހޫރީ މައިދާނުގައި ރޭ ބޭއްވި ޖަލްސާގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ، ފުލުހުންނަށް ބޭނުންވާ އިންސާނީ ވަސީލަތާއި ޓެކްނޮލޮޖީ ފޯރުކޮށްދެއްވާނެކަމުގެ ޔަގީންކަން ދެއްވާފައެވެ.
މީގެ އިތުރުން ކުރިއަށް އޮތް އަހަރު ނިމިގެންދާއިރު ރާއްޖޭގެ މީހުން ދިރިއުޅޭ ހުރިހާ ރަށެއްގައި ފުލުހުންގެ ޚިދުމަތް ގާއިމު ކުރެވިގެންދާނެކަން ރައީސް ފާހަގަކުރެއްވިއެވެ. އަދި އުމްރާނީ ވަސީލަތާއެކުއެކީ ފުލުހުންނަށް ބޭނުންވާ އިންސާނީ ވަސީލަތުގެ މަގު އަލިވަމުންދާ ކަމަށާއި އެއީ ރައްކާތެރި، އަމާން ރާއްޖެއެއް ކަށަވަރު ކުރުމަށް ހިންގޭ ބޮޑު މަޝްރޫއެއް ކަމަށް ރައީސް ވިދާޅުވިއެވެ.