އދ. މަހިބަދޫއަށް ދިމާވާ ގިނަ މައްސަލަތައް ގުޅިފައިވަނީ ބިމުގެ ދަތިތަކާ ކަމަށް ވުމުން ރަށުގެ ބިން ހިއްކުމަށްފަހު، ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދައިދިނުމަށް ސަރުކާރުގައި އެދެފިއެވެ.
މަހިބަދޫ ކައުންސިލުން މިކަމަށް އެދުނީ ނައިބު ރައީސް، ފައިސަލް ނަސީމާއެކު މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވި ބައްދަލުވުމެއްގައެވެ.
މި ބައްދަލުވުމުގައި ކައުންސިލުން ވަނީ މަހިބަދޫ ރައްޔިތުންގެ ކަންބޮޑުވުންތަކާއި، އެންމެ ބޮޑަށް ބޭނުންވެފައިވާ ކަންކަމާ ބެހޭ މައުލޫމާތު ނައިބު ރާއީސްއާ ހިއްސާކޮށްފައެވެ.
ރައްޔިތުންގެ އެންމެ ބޮޑު ކަންބޮޑުވުމެއްގެ ގޮތުގައި ކައުންސިލުން ފާހަގަކުރީ ރަށުގެ ބިން ފުރިފައިވުމުގެ ސަބަބުން ދިމާވެފައިވާ ބޯހިޔާވަހިކަމުގެ ދަތިކަމެވެ.
މީގެ އިތުރުން ކައުންސިލުން ވަނީ ރަށުގެ ނުހެދި ހުރި މަގުތައް ހެދުމުގެ މަޝްރޫއު ބަޖެޓުގައި ހިމަނާފައި އޮތެއް ކަމަކު އެ މަސައްކަތް ނުފެށި ލަސްވާތީ ހުރި ކަންބޮޑުވުންތަކާއި، ކުނި މެނޭޖް ކުރުމުގެ ދަތިތަކާއި، ރަށުގައި ދަނާލެއް ހުރުމުގެ މުހިންމުކަމާ ގުޅޭގޮތުން ނައިބު ރައީސްއާ މަޝްވަރާކޮށްފައެވެ.
ކައުންސިލަރުންގެ ކަންބޮޑުވުންތައް އަޑު އެއްސެވުމަށްފަހު، ނައިބު ރައީސް ވިދާޅުވީ ކައުންސިލުން ފާހަގަކުރެއްވެވި ކަންކަމުގައި ކަމާގުޅޭ އިދާރާތަކާ ވާހަކަ ދައްކަވައިގެން އެދެވޭ ހައްލުތަކެއް ހޯއްދެވުމަށް މަސައްކަތްކުރައްވާނެ ކަމަށެވެ.
މި ބައްދަލުވުމުގައި އެމަނިކުފާނުވަނީ ރަށުގެ އިޖްތިމާއީ ހާލަތު ރަނގަޅުކުރުމަށް ޓަކައި ކުރެވެންހުރި ކަންކަމަށް އަލިއަޅުއްވާލައްވައި ވާހަކަފުޅު ދައްކަވާފައެވެ.