ރާއްޖެ އެޓޯލް ވޮލީބޯލް ޗެމްޕިއަންޝިޕްގެ ފ. އަތޮޅުގެ ފިރިހެން ޑިވިޝަންގައި މިއަދު ހަވީރު ދަރަނބޫދޫއާ ދެކޮޅަށް ކުޅުނު މެޗު ފަސޭހަކަމާއެކު ކާމިޔާބުކޮށް، މަގޫދޫން ފައިނަލާ ގާތަށް ޖެހިލައިފިއެވެ.
މަގޫދޫ ރަސްމީ ވޮލީ ކޯޓުގައި ކުޅުނު މެޗު އެ ޓީމުން ކާމިޔާބުކުރީ ސީދާ ތިން ސެޓުންނެވެ.
މެޗުގެ ފުރަތަމަ ސެޓު މަގޫދޫން ކާމިޔާބުކުރީ 25-22 ގެ ހަނި ނަތީޖާއަކުންނެވެ. ނަމަވެސް ޖެހިގެން އައި ދެ ސެޓުވެސް މަގޫދޫން ކާމިޔާބުކުރީ ތަފާތު ބޮޑު ނަތީޖައަކުންނެވެ.
ދެ ވަނަ ސެޓު މަގޫދޫން ކާމިޔާބުކުރީ 25-16 ގެ ނަތީޖާއަކުންނެވެ. އަދި ތިން ވަނަ ސެޓު ކާމިޔާބުކޮށްފައިވަނީ 25-12 ގެ ބޮޑު ތަފާތަކުންނެވެ.
މެޗުގެ މޮޅު ކުޅުންތެރިޔަކަށް ހޮވުނީ މަގޫދޫގެ ޔޫޝައު ޙަސަންއެވެ. އޭނާ ވަނީ މަގޫދޫން ކުޅުނު ފުރަތަމަ މެޗުގެ މޮޅު ކުޅުންތެރިޔާކަން ވެސް ހޯދާފައެވެ.
މިއަދުގެ މެޗުން މޮޅުވެ ޖުމުލަ ތިން މެޗުން ލިބުނު އަށް ޕޮއޮންޓާއެކު މަގޫދޫ އޮތީ ދެ ވަނައިގައެވެ. އެއް ވަނައިގައި ބިލެތްދޫ އޮތީ ތިން މެޗުން ނުވަ ޕޮއިންޓާއެކުއެވެ. ތިން ވަނައިގައި އޮތް އެފްޑީއެސް އަށް ތިން މެޗުން ލިބެނީ ހަތަރު ޕޮއިންޓެވެ. ހަަތަރު ވަނައިގައި އޮތް ނިލަންދޫއަށާއި ފަސް ވަނައިގައި އޮތް ދަރަނބޫދޫއަށް އެއްވެސް ޕޮއިންޓެއް ލިބިފައެއް ނުވެއެވެ.
މުބާރާތުގެ އަންހެން ޑިވިޝަންގައި މިރޭ ނިލަންދޫ ނިކުންނާނީ ބިލެތްދޫއާ ދެކޮޅަށެވެ.