ހަނިމާދޫ އިންޓަނޭޝަނަލް އެއާޕޯޓް ތަރައްގީ ކުރުމުގެ މަޝްރޫއަށް ބީލަން ހުށަހެޅުމަށް ހުޅުވާލި ފުރުސަތުގައި ބީލަން ހުށަހެޅީ ހަތަރު ކުންފުންޏަކުން ކަމަށް އިކޮނޮމިކް މިނިސްޓްރީން ބުނެފިއެވެ.
ހަނިމާދޫ އިންޓަނޭޝަނަލް އެއާޕޯޓް ތަރައްޤީކުރުމަށް ޝައުގުވެރިވާ ފަރާތްތަކުން ބީލަން ހުށަހެޅުމުގެ ފުރުސަތު މިއަދަށް ވަނީ ހަމަވެފައެވެ. އެ ފުރުސަތުގައި ބީލަން ހުށަހެޅީ ހަތަރު ކުންފުޏަކުންކަމަށް އިކޮނޮމިކް މިނިސްޓްރީން ބުނި ނަމަވެސް އެ ކުންފުނިތަކުގެ ތަފްސީލެއް އެ މިނިސްޓްރީން ހާމައެއްނުކުރެއެވެ.
ހަނިމާދޫ އިންޓަނޭޝަނަލް އެއާޕޯޓު ތަރައްޤީ ކުރުމުގެ މި މަޝްރޫއުގެ ދަށުން 2.46 ކިލޯމީޓަރުގެ އާ ރަންވޭއަކާއި އަހަރަކު 1.3 މިލއަން ދަތުރުވެރިންނަށް ޚިދުމަތްދެވޭނެ ޖާގައިގެ އާ ޓަމިނަލެއް އިމާރާތްކުރުމަށް ވަނީ ނިންމާފައެވެ.
މީގެ އިތުރުން އެ އެއާޕޯޓުގެ މަސައްކަތް ނިމޭއިރު ބައިނަލްއަގްވާމީ ދަތުރުތަކަށް ބޭނުންވާނެ އެހެނިހެން ޒަމާނީ ޚިދުމަތްތައްވެސް ލިބެން ހުންނާނެއެވެ. އެ އެއާޕޯޓު ތަރައްޤީ ކުރާނީ ބައިނަލްއަގްވާމީ އުދުހުން ތަކުގައި ބޭނުންކުރާ އެއާބަސް A320 އަދި ބޯއިންގް 737 ގެ މަރުކާގެ ބޯޓުފަހަރުވެސް ޖެއްސޭނެ ފެންވަރަށެވެ.
އެ އެއާޕޯޓު ނިމުމުން މެދު އިރުމައްޗާއި، ދެކުނު އޭޝިއާއާއި، ދެކުނު އިރުމަތީ އޭޝިއާގެ އިތުރުން އެފްރިކާގެ ގައުމުތަކުން ސީދާ ފްލައިޓްތައް ހަނިމާދޫއަށް އޮޕްރޭޓްކުރެވޭ ވަރުގެ ގާބިލުކަން ހުންނާނެކަމަށްވެސް އިކޮނޮމިކް މިނިސްޓްރީން ބުނެއެވެ.
ހަނިމާދޫ އެއާޕޯޓު ތަރައްޤީ ކުރުމުގެ މަޝްރޫޢުއަކީ ސަރުކާރުން އުތުރަގައި އިގްތިސާދީ މައި ހަބެއް ގާއިމްކުރުމުގެ ސިޔާސަތުގެ ތެރެއިން ހިންގާ މަޝްރޫޢުއެކެވެ. އަދި އެ އެއާޕޯޓު ވެގެންދާނީ އުތުރުގައި ރިސޯޓުތަކާއި ގެސްޓު ހައުސްތައް ފުޅާކުރުމަށް މުހިންމު މަޝްރޫޢުއަކަށެވެ.