މިފްކޯގެ މަސް ބޯޓަކަށް މިއަދު 155.57 ޓަނުގެ މަސްގަނެފިއެވެ.
ފެލިވަރުގެ މެނޭޖަރު މުޙައްމަދު އިބްރާހިމް "ސަން"އަށް ވިދާޅުވީ މިފްކޯގެ ތާރީޚުގައި ވެސް އެއްދުވަހުން ބޯޓަކަށް އެންމެ ގިނަ މަސް ގަނެވުނު ދުވަހަކީ މިއަދުކަމަށެވެ.
އޭނާ ވިދާޅުވީ ރައީސް އިބްރާހިމް މުޙައްމަދު ޞާލިހުގެ ވެރިކަމުގައި މިފްކޯއަށް އެންމެ ފަހުން ގެނައި ޖަޒީރާ 102 ބޯޓަށް މަސް ކިރާފައިވަނީ ގދ. ތިނަދޫއިން ކަމަށެވެ.
އެ ބޯޓުގައި ކުރަންޖެހޭ މަސައްކަތް އަދި ނިމިފައި ނުވި ނަމަވެސް އުތުރުގެ މަސްވެރިކަން ވަރަށް ރަނގަޅުވަމުން ވަގުތީގޮތުން އެ ބޯޓު މަސް ގަތުމަށް ނެރުނީ ކަމަށް މުޙައްމަދު އިބްރާހިމް ވިދާޅުވިއެވެ.
"އެ ބޯޓު އަދި އެއްކޮށް ނިމިފައެއް ނުވޭ. ވަގުތީ ގޮތުން މަސްގަތުމުގެ މަސައްކަތަށް ނެރެފަ އެވަނީ. އެ ބޯޓުގެ ކައްކާ ބައިވެސް އަދި އެހެނިހެން އިންތިޒާމްތައް ވެސް ހަމަޖެހިފައެއް ނުވާނެ،" މުޙައްމަދު އިބްރާހިމް ވިދާޅުވިއެވެ.
އޭނާ ވިދާޅުވީ މި މަސައްކަތުގެ ސަބަބުން އެތަށް މަސްވެރިންނަށް މިކަމުގެ ފައިދާ ވާނެކަމަށެވެ. މިއީ މި މަަސައްކަތުގެ ފެށުން ކަމަށާއި އުންމީދަކީ މަސްވެރިން ބާނާ ހުރިހާ މަހެއް ހަމަ އަގުގައި ގަތުން ކަމަށް ވެސް މުޙައްމަދު އިބްރާހިމް ވިދާޅުވިއެވެ.