ބައު ޖަމާލުއްދީން ސުކޫލް އިމާރަތް ތަޅާލުމުގެ މަސައްކަތް ކޮށްދޭނެ ފަރާތެއް ހޯދަން އިއުލާން ކޮށްފިއެވެ.
އެޑިއުކޭޝަން މިނިސްޓްރީން މިއަދު ކުރި އިއުލާނެއްގައި ވަނީ އަމިއްލަ ތަކެތީގައި ބައު ޖަމާލުއްދީން ސުކޫލް ތަޅައިދޭނެ ފަރާތެއް ހޯދާ ކަމަށެވެ. އަދި އެ މަސައްކަތަށް އެދި ބީލަން ހުށަހެޅުމުގެ ފުރުސަތު އެ މިނިސްޓްރީން ވަނީ ހުޅުވައިލައިފައެވެ.
އެޑިއުކޭޝަން މިނިސްޓްރީން ބުނީ މި ޕްރޮޖެކްޓަށް ބީލަން ހުށަހެޅޭނީ އިކޮނޮމިކް މިނިސްޓްރީގެ ކުދި އަދި މެދު ފަންތީގެ ވިޔަފާރީގެ ގިންތިތަކުން ގިންތިއެއްގައި ރަޖިސްޓްރީ ކުރެވިފައިވާ ވިޔަފާރިތަކަށް ކަމަށެވެ. އަދި އެ އިއުލާނާއެކު ހިމަނައިފައިވާ ބީލަން ފޮތުގައި އިތުރު ޝަރުތުތައް ވަނީ ބަޔާން ކޮށްފައެވެ.
މި ޕްރޮޖެކްޓްގެ ބިޑް ސެކިއުރިޓީއެއްގެ ގޮތުގައި 15،000 ރުފިޔާ ހުށަހަޅަން ޖެހެއެވެ. އަދި ބިޑް ސެކިއުރިޓީގެ މުއްދަތަކީ ބިޑް ހުޅުވާ ތާރީހުން ފެށިގެން 30 ދުވަސް ކަމަށް ވެސް އެ އިއުލާނުގައި ބުނެފައިވެއެވެ.
މިހާރު ހުރި އަރަބިއްޔާ ސްކޫލް އިމާރާތުގެ ބަދަލުގައި އާ އިމާރާތެއް އަޅަން ބާ ޖަމާލުއްދީން ބިން ދޭން ރައީސް އިބްރާހިމް މުހައްމަދު ސޯލިހު ނިންމެވީ މިދިޔަ އަހަރުގެ ޑިސެމްބަރު މަހުގެ ތެރޭގައެވެ.
އެ ނިންމުން ނިންމެވީ، އަރަބިއްޔާ ސްކޫލް އިމާރާތުގައި ރެނދުލައި، އެތަނުގައި ކިޔެވުމަކީ ދަރިވަރުންނަށް ނުރައްކާތެރި ކަމެއް ކަމަށް ބުނެ ބެލެނިވެރިން އިހުތިޖާޖު ކުރުމުންނެވެ.