ޕައިލެޓުން ތަމްރީނުކުރުމަށް، ގައުމީ އެއާލައިން، މޯލްޑިވިއަން އާއި ގައުމީ ޔުނިވާސިޓީ ގުޅިގެން އުފެއްދި، މޯލްޑިވިއަން އޭވިއޭޝަން އެކަޑެމީން ކިޔަވަން ފަށާ، އޭޝިއަން އެކަޑެމީ އޮފް އެރޮނޯޓިކްސް (އޭއޭއޭ)ގެ ދަރިވަރުންނަށް ސަރުކާރުން ލޯނު ދޫކުރަން ނިންމައިފިއެވެ.
އޭއޭއޭގެ ބައެއް ދަރިވަރުންގެ ކިޔެވުން ވަނީ ދިގު ދެމިގެން ގޮސް، އެކި ސަބަބުތަކާ ގުޅިގެން ކުރިއަށް ނުގެންދެވިފައެވެ.
ކަންމިހެން އޮތްއިރު، އައްޑޫގައި މޯލްޑިވިއަން އޭވިއޭޝަން އެކަޑެމީ ހިންގަން ޗެކް-ރިޕަބްލިކްގެ މަޝްހޫރު ފްލައިން އެކެޑެމީ އަކާ ހަވާލުކޮށް، އެކަޑެމީއަށް ދަރިވަރުން ވަނުމުގެ ފުރުސަތު މިހާރު ވަނީ ހުޅުވައިލައިފައެވެ.
މޯލްޑިވިއަންގެ އޭވިއޭޝަން ސުކޫލުން ކޮންމެ އަހަރަކު 80 ކުދިންނަށް ޖާގަ ދޭން ނިންމައިފައިވާއިރު، ފުރަތަމަ ބެޗުން 30 ކުދިންނަށް ޖާގަ ދިނުމަށް ވަނީ ނިންމައިފައެވެ. އޭގެ ތެރޭގައި އިސްކަން ދެނީ އޭއޭއޭގައި ކިޔެވުން މެދުކެނޑުނު ދަރިވަރެކެވެ.
ފްލައިން އެކަޑެމީގެ ދަށުން އެންމެ ފުރަތަމަ ގެންދަން ހަމަޖެހިފައިވަނީ ދެ މަސް ދުވަހުގެ ރިފްރެޝާ ޕްރޮގްރާމެކެވެ. މި ޕްރޮގްރާމްގައި 50 ގަޑިއިރުގެ ތިއަރީއާއި ފްލައިން ކުރިއަށް ދާނެއެވެ.
މިއަދު ކުރިއަށް ދިޔަ ނޫސްވެރިންގެ ބައްދަލުވެއްގައި މިނިސްޓާ އޮފް ހަޔާ އެޑިއުކޭޝަން ޑރ. އިބްރާހިމް ހަސަން ވިދާޅުވީ މޯލްޑިވިއަން ފްލައިން އެކަޑެމީގެ ރިފްރެޝާ ޕްރޮގްރާމްގެ ފީއަކީ 1500 ޑޮލަރު (23,175 ރުފިޔާ) ކަމަށެވެ.
މިނިސްޓަރު ވިދާޅުވީ ފީ ދައްކަން އުނދަގޫވާ، ކިޔެވުން މެދުކެނޑިފައިވާ އޭއޭއޭގެ ދަރިވަރުންނަށް ސަރުކާރުން މި ފީ ލޯނުގެ ގޮތުގައި ދޫކުރަން ނިންމައިފައިވާ ކަމަށެވެ.
"އައިލެންޑް އޭވިއޭޝަނުން މި ފަށާ ޕްރޮގްރާމްގަ، މި ތަނުން މި ބައިވެރިވާ ޓްރިޕަލް އޭ ފްލައިން ސުކޫލުގައި ކިޔަވާފައި ތިބި، ކޯސް ނުނިމި ތިބި ދަރިވަރުންނަށް ރިފްރެޝާ ކޯހަށް ބޭނުންވާ 1500 ޑޮލަރު މިނިސްޓްރީ އޮފް ހަޔާ އެޑިއުކޭޝަނުން ލޯނު ގޮތުގަ ދޭނެ،" މިނިސްޓަރު ވިދާޅުވިއެވެ.
ޑރ. އިބްރާހިމް އިތުރަށް ވިދާޅުވީ ރިފްރެޝާ ކޯސް ނިމުމުން އިތުރަށް ބޭނުންވާ ފައިސާ ސަރުކާރުން ހަމަޖައްސާނެ ކަމަށެވެ.