ބަންގްލަދޭޝާއި ރާއްޖެއާ ދެމެދު މީގެ ކުރިން ވެފައިވާ އެއްބަސްވުންތަކާއި ވައުދުތައް އިތުރަށް ވަރުގަދަވެއްޖެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ޝެއިޚް ހަސީނާއަށް ޓަކައި މިރޭ ކުރުނބާ މޯލްޑިވްސްގައި ބޭއްވި ރަސްމީ ޖާފަތުގައި ވާހަކަފުޅު ދައްކަވަމުން ރައީސް ވަނީ ދެ ގައުމުގެ ދެމެދުގައި އޮތް ޒަމާންވީ ގާތް ރަޙްމަތްތެރި ގުޅުމުގެ މައްޗަށް އަލި އަޅުއްވައިލައްވައިފައެވެ.
ރައީސް ވިދާޅުވީ ވެރިން ކުރި ދަތުރުތަކުގެ ސަބަބުން ދެ ގައުމުގެ ދެމެދުގައި ކުރިން ވެފައިވާ ވަޢުދުތައް އިތުރަށް ވަރުގަދަ ކުރެވި، އެއްބާރުލުން އިތުރުކުރެވޭނެ އާ ގޮތްތައް މިހާރު ހޯދިފައިވާ ކަމަށެވެ.
ހަމައެހެންމެ ރާއްޖެއާއި ބަނގްލަދޭޝްއާ ދެ ގައުމުގެ ދެމެދުގައި އޮތް ގުޅުމަކީ، ޑިޕްލޮމެޓިކް ފެންވަރުގައި ކުރެވޭ މުއާމަލާތްތަކަށްވުރެ މާ ގާތް ގުޅުމެއް ކަމަށާއި، ދެ ގައުމުގެ ރައްޔިތުންގެ ގުޅުމަކީ، މި ސަރަޙައްދުގެ ގައުމުތަކުގެ މެދުގައި އޮތް އެންމެ ވަރުގަދަ އެއް ގުޅުން ކަމުގައި ރައީސް ވިދާޅުވިއެވެ.
ބަންގާޅުގެ ޝައިޚް މުޖީބުއްރަޙްމާންގެ އުފަންދުވަހުގެ މުނާސަބަތުގައި، މިއަހަރުގެ ކުރީކޮޅު ބަންގްލަދޭޝްއަށް ކުރެއްވި ދަތުރުފުޅުގެ މައްޗަށް އަލިއަޅުއްވައިލައްވަމުން ރައީސް ވަނީ ބައްޕާފުޅުގެ ފިޔަވަޅުމަތިން ޝެއިޚް ހަސީނާ ކުރިއަށް ވަޑައިގެން ކުރައްވަމުން ގެންދަވާ މަސައްކަތްޕުޅަށް ތައުރީފްކުރައްވަވައިފައެވެ.
މި ޖާފަތުގައި ޝެއިޚް ހަސީނާ ދެއްކެވި ވާހަކަފުޅުގައި ބަންގްލަދޭޝްއާއި ރާއްޖެއަކީ ދީނީ އަދި ސަގާފީ ގޮތުން ވަރަށް އެއްގޮތް، އަދި ތަރައްގީގެ މަގުގައި ވަރަށް އެއްގޮތް ދެ ގައުމު ކަން ފާހަގަކުރެއްވިއެވެ. އަދި ކޮވިޑް ބަލިމަޑުކަމުގައި ދެ ގައުމުގެ ގުޅުމަކީ އެހެން ގައުމުތަކަށް ނަމޫނާއެއްގެ ގޮތުގައި ސިފަކުރެއްވިއެވެ.
ހަމައެހެންމެ މި ސަރަހައްދުގެ ގައުމުތަކުން އެންމެ ބޮޑަށް ސަމާލުކަން ދޭން ޖެހޭނީ ރައްޔިތުންގެ ތަރައްގީއަށް ކަމަށް ވެސް ޝެއިޚް ހަސީނާ ވިދާޅުވިއެވެ.
ކުރުނބާ މޯލްޑިވްސްގައި މިރޭ ބޭއްވި ޖާފަތުގައި ރައީސް ސޯލިހާއި، އަނބިކަނބަލުން ފަޒުނާ އަހުމަދުގެ އިތުރުން ދައުލަތުގެ އިސްވެރީން ބައިވެރިވެވަޑައިގެންނެވިއެވެ.