މި އަހަރު އެންމެ ގިނަ ފަތުރުވެރިން ރާއްޖެ އައީ މިދިޔަ މަހު ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ޓޫރިޒަމް މިނިސްޓްރީން އާއްމުކުރި ތަފާސްހިސާބުގައިވާ ގޮތުން މިދިޔަ މަހު 144،725 ފަތުރުވެރިން އައިސްފައިވެއެވެ. އެގޮތުން މިދިޔަ މަހު އެވަރެޖުކޮށް ކޮންމެ ދުވަހަކު 4،824 ފަތުރުވެރިން އައިސްފައިވާ އިރު އެއް ދުވަސް ތެރޭ އެންމެ ގިނަ އަދަދަކަށް ފަތުރުވެރިން އައީ މަހުގެ ފަހުކޮޅު، 5،987 މީހުންނެވެ.
މިދިޔަ މަހު އެންމެ ގިނަ ފަތުރުވެރިން އައި ފަސް މާކެޓަކީ:
- އިންޑިއާ: 29،708
- ރަޝިއާ: 15،937
- ޔޫކޭ: 15،117
- ޖަރުމަނު: 13،705
- ޔޫއެސްއޭ: 7،592
ޓުއަރިޒަމް މިނިސްޓްރީން މިދިޔަ ބުރާސްފަތި ދުވަހު އާއްމުކުރި ތަފާސްހިސާބުގައިވާ ގޮތުން މިމަހުގެ އެކަކާ ހަމަޔަށް ރާއްޖެއަށް ޖުމްލަ 1،162،425 ފަތުރުވެރިން އައިސްފައިވެއެވެ.
މުޅި އަހަރު އެންމެ ގިނަ ފަތުރުވެރިން އައި ފަސް މާކެޓަކީ:
- އިންޑިއާ: 261،164
- ރަޝިއާ: 205،246
- ޖާމަނީ: 83،817
- ޔޫއެސްއޭ: 48،949
- ޔޫކޭ: 46،177
މިއަހަރުގެ އެއް މިލިއަން ވަނަ ފަތުރުވެރިޔާ ރާއްޖެ އައީ އޮކްޓޯބަރު މަހުގެ ފަހުކޮޅެވެ. އަދި މިއަހަރު ތެރޭ ޓޫރިސްޓުން ރާއްޖޭގައި ހޭދަކޮށްފައިވާ ރޭގެ އަދަދު ނުވަތަ ބެޑްނައިޓްސް ވަނީ މިމަހު 10 މިލިއަނަށް އަރައިފައެވެ.
ރާއްޖޭގެ 99 ޕަސެންޓު ރިސޯޓު މުވައްޒަފުން މިހާރު ވަނީ ވެކްސިން ޖަހާފައެވެ. އަދި އޭގެ ތެރެއިން 95 ޕަސެންޓު މުވައްޒަފުން ވަނީ ވެކްސިން ފުރިހަމަކޮށްފައެވެ.