ފަސް މީހުންނާއެކު ދަތުރުކުރަމުންދިޔަ ދޯންޏެއް އަޑިއަށް ގޮސްފިއެވެ.
އެމްއެންޑީއެފުން ބުނި ގޮތުގައި އަޑިއަށް ގޮސްފައިވަނީ ކާށިދޫން ފުރައިގެން ޅ. އަތޮޅަށް ދަތުރުކުރަމުންދިޔަ ދޯންޏެކެވެ. އަދި މި ދޯންޏަކީ 60 ފޫޓުގެ ސަޕްލައި ދޯންޏެއް ކަމަށާއި ދޯނި އަޑިއަށް ގޮސްފައިވަނީ ޅ.އަލިގާގެ ހުޅަނގުން 4 ނޮޓިކަލްމޭލު ބޭރުން ކަމަށް ވެސް އެމްއެންޑީއެފުން ބުނެއެވެ.
އެމްއެންޑީއެފުން ބުނި ގޮތުގައި މި ދޯނީގައި ތިބީ ފަސް ދިވެހިންނެވެ. އަދި އެ ފަސް ދިވެހީން ވެސް އެ ސަރަހައްދުގައި އެމީހުން ހޯދަން އުޅުނު ކޯސްޓުގާޑުގެ އުޅަނދަށް 8:30ހާއިރު ވަނީ ފެނިފައި ކަމަށް ވެސް އެމްއެންޑީއެފުން ބުނެއެވެ.
އެ ފަސް މީހުން ވެސް ކާށިދޫއަށް ގެންދިއުމުގެ މަަސައްކަތް އެމްއެންޑީއެފުން ދަނީ ކުރަމުންނެވެ. އަދި އެ އެންމެންގެ ވެސް ހާލު ރަނގަޅުކަމަށް އެމްއެންޑީއެފުން މައުލޫމާތުދެއެވެ.