މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ) ގެ ދަސްވެނިވުން އަންނަ މަހު ބާއްވަން ހަމަޖައްސައިފިއެވެ.
އެމްއެންޔޫގެ ރެޖިސްޓަރާ މުހައްމަދު ޟާމިރު ވިދާޅުވީ، އޮކްޓޯބަރު 17ގައި ފެށޭ ދަސްވެނިވުން ހަފްތާއަކަށް ކުރިއަށް ދާނެ ކަމަށެވެ. ސަބަބަކީ ބައިބަޔަށް ދަސްވެނިވުން ކުރިއަށް ގެންދާތީއެވެ.
ޟާމިރު ވިދާޅުވީ، މި ގްރެޖުއޭޝަންގައި ހަތަރު ޓާމެއްގެ ދަރިވަރުން ބައިވެރި ވާނެ ކަމަށެވެ. އެއީ ކޮވިޑާ ގުޅިގެން ގްރެޖުއޭޝަން ނުބޭއްވި ދިޔަ ޓާމްތަކުގެ ދަރިވަރުން ހިމެނޭތީއެވެ.
" އަޅުގަނޑުމެން މިހާރު މި ބަލަމުން ދަނީ އަޅުގަނޑުމެންގެ މި ފާއިތުވި ގްރެޖުއޭޝަން ތަކުގައި ބައިވެރިވާން އެދިފައި ތިބި ދަރިވަރުންގެ ތެރެއިން ކިތައް ދަރިވަރުންނަށްތޯ މިހާރު ބައިވެރި ވެވޭނީ، ބައިވެރި ވާން ބޭނުމީ. އަޅުގަނޑުމެން ވާތީ (މީގެ ކުރިން) ސަރުމަނީ ނުބޭއްވުނަސް ދަރިވަރުންނަށް ސެޓްފިކެޓްތައް ހަވާލު ކޮށްފަ،"
ޟާމިރު ވިދާޅުވީ، އޭގެ ތެރެއިން އެއް ޓާމް ފިޔަވައި ދެން ތިބި ދަރިވަރުންނަށް، ގައުންއާއެކު ފޮޓޯ ނަގަން ވެސް ހުއްދަ ދީފައި ވާނެ ކަމަށެވެ.
އެހެންކަމުން ރަސްމިއްޔާތުގެ އިތުރު ކަންތައްތައް ކުރިއަށް ގެންދާނެ ގޮތް ނިންމާނީ ބައިވެރި ވާން ބޭނުންވާ ދަރިވަރުންނަނީ ކޮބައިތޯ ބަލައި، ދަރިވަރުންގެ އަދަދު އެނގުމުން ކަމަށް އޭނާ ވިދާޅުވިއެވެ.
އެމްއެންޔޫގެ ގްރެޖުއޭޝަން ބާއްވަން މީގެ ކުރިން ނިންމާފައި ވަނީ 2020 މާރޗްގެ ތެރޭގައެވެ. ނަމަވެސް ހަލުވިކަމާއެކު ފެތުރެމުން ދިޔަ ކޮވިޑް-19ގެ ދެ ކޭހެއް ރާއްޖެއިން ފެނުމާ ގުޅިގެން، ވަކި މުއްދަތެއް ނެތް ގޮތަށް ގްރެޖުއޭޝަން ލަސްކުރީއެވެ.