އެކި ދާއިރާތަކުން ކިޔެވި 311 ދަރިވަރުންނާއެކު މޯލްޑިވްސް ނެޝަނަލް ޔުނިވާސިޓީ (އެމްއެންޔޫ)ގެ ދަސްވެނިވުން މިއަދު ބާއްވައިފިއެވެ.
މިއަދު ހެނދުނު ބޭއްވި މި ދަސްވެނިވުން ޝަރަފުވެރިކޮށްދެއްވީ ރައީސް ޑރ. މުޙައްމަދު މުއިއްޒެވެ.
މި ރަސްމިއްޔާތުގައި ވަނީ އަލަށް ރާއްޖޭގައި މެޑިސިން ކިޔެވި 21 ދަރިވަރަކު ވެސް ދަސްވެނިވެފައެވެ.
މިއަދުގެ ރަސްމިއްޔާތުގައި އެކަން ފާހަގަކުރައްވައި ޗާންސެލަރު ޑރ. މަހުމޫދު ޝައުގީ ވިދާޅުވީ، މިއަދު ކުރިއަށްދަނީ ވަރަށް ތާރީޚީ ދަސްވެނިވުމުގެ ހަފުލާއެއް ކަމަށެވެ.
"ހިނދުކޮޅެއްގެ ތެރޭގައި 311 ދަރިވަރަކު ކުރި ބުރަ މަސައްކަތުގެ އަރުތަ ރަމްޒުކޮށްދޭ، ޔުނިވާސިޓީގެ ގާނޫނީ ލިޔުން އެ ދަރިވަރުންގެ މައްޗަށް ތައުގީދު ކުރެވިގެން ދާނެ. މީގެ ތެރޭގައި ފުރަތަމަ ފަހަރަށް ޑޮކްޓާ އޮފް މެޑިސިންގެ ރޮނގުން ދަސްވެނިވާ ދަރިވަރުން ހިމެނޭކަމީ އަޅުގަނޑުމެން ވަރަށް ޝަރަފުވެރިކަމާ އެކު ފާހަގަކުރާ ކަމެއް،" ޑރ. މަހުމޫދު ޝައުގީ ވިދާޅުވިއެވެ.
އެ ރަސްމިއްޔާތު ޝަރަފުވެރިކޮށްދެއްވައި ވާހަކަ ދައްކަވަމުން ރައީސް ވަނީ، ޒުވާނުންނަށް ބޭނުންވާ ބޯހިޔާވަހިކަން ކަށަވަރުކޮށްދެއްވާނެ ކަމުގެ ޔަގީންކަން ދެއްވައިފައެވެ.
"އެހެންވީމަ ގެދޮރުވެރިކަން ހާސިލްކޮށްދިނުމުގައި އިރާދަކުރެއްވިއްޔާ މިއަދު މި ހުށަހެޅޭ ބަޖެޓުން ދެކަމެއް ދަންނަވައިލަން ބޭނުން. އަލަށް ފަށާ މަޝްރޫއުތަކުގެ ތެރޭގައި، ފިޒިކަލް ކޮންސްޓްރަކްޝަން ހައުސިން ޕްރޮޖެކްޓްސްތައް 1.5 ބިލިއަން ރުފިޔާގެ މަސައްކަތް މިއަންނަ އަހަރު ހިނގާނެ. ހަމައެއާއެކީގައި މިއަންނަ ހަފުތާގައި ފަށާ ނޫނީ މިއަންނަ މަހު ކުރީކޮޅުގައި ފެށޭނެ އަޅުގަނޑު ވައުދުވީ ފަސް ޕަސަންޓަށް ވުރެ ބޮޑުނޫން އިންޓެރެސްޓުގައި ދޫކުރާ ހައުސިން ލޯނު ސްކީމް،" ރައީސް ވިދާޅުވިއެވެ.
އެމްއެންޔޫގެ ހުރިހާ ފެކަލްޓީއަކުން ވެސް ގިނަ ދަރިވަރުންތަކެއް މިއަދު ވަނީ ދަސްވެނިވެފައެވެ.