ޒިކުރާ އިންޓަނޭޝަނަލް ކޮލެޖުން 1070 ދަރިވަރުން ރޭ ދަސްވެނިވެއްޖެއެވެ.
އެ ދަރިވަރުން ދަސްވެނިވެފައި ވަނީ ފުވައްމުލަށް ސިޓީގައި އެކަމަށް ޚާއްސަކޮށް ބޭއްވި ރަސްމިއްޔާތެއްގައެވެ. މި ރަސްމިއްޔާތު ޝަރަފުކޮށްދެއްވާފައި ވަނީ އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސަޢީދެވެ.
މިގޮތުން، މިއަހަރު އެ ކޮލެޖުން ދަސްވެނިވި, 1070 ދަރިވަރުންގެ ތެރޭގައި 907 އަންހެން ދަރިވަރުންނާއި 163 ފިރިހެން ދަރިވަރުން ހިމެނެއެވެ.
ދަރިވަރުން ދަސްވެނިވި ބައެއް ދާއިރާތައް:
- ޑިޕްލޮމާ އިން އޮފީސް މެނޭޖްމަންޓް
- ޑިޕްލޮމާ އިން ބިޒްނަސް މެނޭޖްމަންޓް
- ބެޗެލާ އޮފް ހިއުމަން ރިސޯސް މެނޭޖްމަންޓް
- ބެޗެލާ އޮފް ޓީޗިން ސެކަންޑްރީ މެތަމެޓިކްސް
- ބެޗެލާ އޮފް ޕްރައިމަރީ ޓީޗިން
- ބެޗަލާ އޮފް ޓީޗިން އަރަބިކް ލެންގުއޭޖް
- ބެޗެލާ އޮފް ޓީޗިން ގުރުއާން
- މާސްޓާ އޮފް ޓީޗިން ގުރުއާން
- މާސްޓާ އޮފް އިންކްލޫސިވް އެޑިއުކޭޝަން
މި ރަސްމިއްޔާތުގައި ވާހަކަދައްކަވަމުން އެ ކޮލެޖުގެ ވައިސް ރެކްޓާ ހުސައިން ސައީދު ވިދާޅުވީ، މީގެ ނުވަ ވަރަކަށް އަހަރު ކުރިން އިލްމު ފޯރުކޮށްދިނުމަށް ފެށި ދަތުރު އަމާންކަމާ އެއްކޮށް ފަސޭހަ ކުރުމަށް ކެނޑިނޭޅި މަސައްކަތް ކުރަމުން އަންނަ ކަމަށެވެ.
މިގޮތުން، ކޮލެޖުން ކަނޑައަޅާފައިވާ ލަނޑުދަނޑިތަކާއި ތަޞައްވުރު ހަގީގަތްތަކަށް ހެދުމަށްޓަކައި ކުރެވުނު މަސައްކަތުން އެ ކޮލަޖީ މަތީ ތައުލީމު ދިނުމުގައި ރާއްޖޭގެ އެހެން ކޮލެޖުތަކާ ވާދަކޮށް، ކާމިޔާބީތައް ހާސިލްކުރަމުންދާ ކޮލެޖެއް ކަމަށް ސައީދު ވިދާޅުވިއެވެ.
ކޮލެޖުގެ އަޒުމަކަށް ވެފައި އޮންނަނީ ފެންވަރު ރަނގަޅު މޮޅު ތައުލީމެއް ފޯރުކޮށްދިނުމާއި އިލްމާއި ހުނަރުވެރި ދަރިވަރުންތަކެއް ދިވެހި މުޖުމައުއަށް ނެރުން ކަމަށް ސައީދު ވިދާޅުވިއެވެ.