ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ގެކޮޅު ކައިރީގައި ބަޔަކު ފާރަލާ ކަމަށް ބުނެ އެ މައްސަލަ ބަލައިދިނުމަށް އެދި ފުލުސް އޮފީހަށް ހުށަހަޅައިފިއެވެ.
ރައީސް ޔާމީނުގެ ގެކޮޅު ހ. ދޫވެހި ކައިރީގައި ބަޔަކު ފާރަލާ މައްސަލަ އިއްޔެ ފުލުސް އޮފީހަށް ހުށަހެޅީ އެންމެ ފުރަތަމަ ވަކީލުންނަށް ފާހަގަވެގެން ނޫން ކަމަށާއި ވަކީލުންނަށް ވެސް ފާހަގަވީ މީޑިއާއިން އެފަދަ ވީޑިއޯތަކެއް ފެނިގެން ކަމަށް ރައީސް ޔާމީންގެ ގާނޫނީ ވަކީލު އާދަމް ޝަމީމް "ސަން"އަށް ވިދާޅުވިއެވެ.
އޭނާ ވިދާޅުވީ ވަރަށް "ސިއްރުސިއްރުން" ކެމެރާ ދިއްކޮށްގެން ދާ މަންޒަރު އެ ވީޑިއޯއިން ފެންނަ ކަމަށެވެ. އަދި ރައީސް ޔާމީނަކީ އެމަނިކުފާނު ވެރިކަމުގައި ހުންނެވިއިރު ވެސް ހަމަލާތަކެއް އަމާޒުވެފައިވާ ބޭފުޅަކަށް ވާތީ އެއީ ކަންބޮޑުވާން ޖެހޭ ކަމެއްގެ ގޮތުގައި ވަކީލުންގެ ޓީމަށް ވިސްނުނު ކަމުގައި ވެސް ޝަމީމް ވިދާޅުވިއެވެ.
"ކުރީގެ ރައީސުންނަށް ރާއްޖޭގައި ވަރަށް ނުރައްކާކަން އެބަ އެނގޭ އެންމެ ފަހުން ރައީސް ނަޝީދަށް ވެސް އެފަދަ ހަމަލާއެއް ދެވިގެން މި ދިޔައީ. ހަމަ ކިރިޔާ ސަލާމަތްވީ،" ޝަމީމް ވިދާޅުވިއެވެ.
ޝަމީމް ވިދާޅުވިގޮތުގައި އެންމެ ފަހުން ފުލުހުންގެ ގާނޫނަށް ގެނައި އިސްލާހުގައި ވާ ގޮތުން ކުށްކުރުން ހުއްޓުވުމަށް ދުރާލާ އަޅަން ޖެހޭ ފިޔަވަޅުތައް ފުލުހުން އަޅަން ޖެހެއެވެ. އެހެންކަމުން އެކަމުގައި ރައީސް ޔާމީނަށް ނުރައްކަލެއް އޮތްތޯ ބައްލަވައި ދެއްވުން އެދި ފުލުހުންނަށް ހުށަހަޅައިފައިވާނެ ކަމަށް އޭނާ ވިދާޅުވިއެވެ.
"ފުލުހުން ވަރަށް ކޯޕަރޭޓިވްކޮށް ތިބީ. ވިދާޅުވި އެމްއެންޑީއެފަށް ވެސް އަންގާނަމޭ. ކުރަން ޖެހުނު ކޮންމެ ކަމެއް ކުރާނަމޭ." ޝަމީމް ވިދާޅުވިއެވެ.
ޝަމީމް ވިދާޅުވީ މިކަން މި ހިސާބުން ގާނޫނީ ވަކީލުންގެ ޓީމުން ދޫކޮށް ނުލާނެ ކަމަށާއި ފުލުހުން މައްސަލަ ބައްލަވާތޯ ގާތުން ބަލަމުން ގެންދަވާނެ ކަމަށެވެ.
ޓޫރިސްޓް ރިސޯޓެއް ތަރައްގީކުރުމަށް ގއ. ވޮޑަމުލާ ކުއްޔަށް ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު ލޯންޑާ ކުރިކަން ސާބިތުވެ ރައީސް ޔާމީން ފަސް އަހަރަށް ޖަލަށް ލުމަށާއި ފަސް މިލިއަން ޑޮލަރުން ޖޫރިމަނާ ކުރުމަށް ކްރިމިނަލް ކޯޓުން ހުކުމް ކުރީ، ނޮވެމްބަރު 28، 2019ގައެވެ.
އެ މައްސަލަ އެމަނިކުފާނުގެ ފަރާތުން ހައިކޯޓުގައި އިސްތިއުނާފު ކުރުމުން އެ މައްސަލަ ބަލައި ކްރިމިނަލް ކޯޓުގެ ހުކުމަށް ހައިކޯޓުން ތާއީދު ކުރީ ޖެނުއަރީ 21، 2021 ވަނަ ދުވަހުއެވެ. އެއަށްފަހު އެ ހުކުމް އެމަނިކުފާނުގެ ފަރާތުން ވަނީ ސުޕްރީމް ކޯޓުގައި އިސްތިއުނާފު ކުރަން ހުށަހަޅައިފައެވެ. އެ މައްސަލައިގެ އަޑުއެހުންތައް ސުޕްރީމް ކޯޓުގައި ފަށާނީ އަންނަ މަހުގެ 12ވަނަ ދުވަހުއެވެ.
ޖަލު ހުކުމެއް ތަންފީޒު ކުރައްވަމުން ގެންދެވި ނަމަވެސް އެމަނިކުފާނު މިހާރު ހުންނެވީ ގޭ ބަންދަށް ބަދަލު ކޮށްފައެވެ. ކަރެކްޝަނަލް ސާވިސް އިން ބުނާ ގޮތުގައި ޔާމީން ގެއަށް ބަދަލު ކުރަން ނިންމީ ޖަލުގައި ކޮވިޑް ފެތުރޭތީއެވެ.