މާލޭގައި މިފަހުން ހުޅުވި ބިއްލޫރިޖެހިގެ ޕާކިން ޒޯންގައި ހުރި 12 ސައިކަލަކަށް ރޭގެ ވަގުތެއްގައި ގެއްލުންދީ ވައްކަން ކުރަން މަސައްކަތް ކޮށްފިއެވެ.
ފުލުހުންގެ މީޑިއާ އޮފިޝަލަކު "ސަން" އަށް ވިދާޅުވީ ބިއްލޫރިޖެހިގޭ ޕާކިން ޒޯންގައި ހުރި ސައިކަލްތަކަކަށް ގެއްލުންދީ ވައްކަން ކުރަން އުޅުނު ކަމުގެ މައުލޫމާތު މިއަދު ހެނދުނު ލިބިފައިވާކަމަށެވެ.
"ބިއްލޫރިޖެހިގެ ޕާކިން ޒޯންގައި ހުރި ސައިކަލް ތަކަކަށް ގެއްލުންދީ މަޑި ފަޅާލަން މަސައްކަތްކޮށްފައި ހުރި ކަމުގެ މައުލޫމާތު މިއަދު 06:47 ހާއިރު ވަނީ ފުލުހުންނަށް ހުށަހަޅާފައި" މީޑިއާ އޮފިޝަލް ވިދާޅުވިއެވެ.
ފުލުހުން ބުނީ މިހާތަނަށް ބެލިބެލުމުން 12 ވަރަކަށް ސައިކަލްއަށް ގެއްލުންދީފައިވާކަން ޔަގީން ކުރެވިފައިވާކަމަށެވެ.
"މިކަމާ ގުޅިގެން އިތުރަށް ބަލަންޖެހޭ ކަންކަން ފުލުހުން ދަނީ ބަލަމުން" ފުލުހުންގެ މީޑީއާ އޮފިޝަލް ވިދާޅުވިއެވެ.
ބިއްލޫރިޖެހިގެ ޕާކިން ޒޯންގެ މަސައްކަތް ނިންމާލުމަށްފަހު އާންމުންނަށް ހުޅުވާލީ މެއި މަހުގެ 21 ވަނަ ދުވަހުއެވެ.
އެތަނުގައި ޕާކިން ޒޯނެއް ހަދާފައިވަނީ، ސަލާމަތީ ސަބަބުތަކަކަށްޓަކައި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ދިރިއުޅުއްވާ ގ. ކެނެރީގެ ހުންނަ ނީލޯފަރު ހިނގުމަކީ އުޅަނދު ދުއްވުން މަނާ މަގެއްގެ ގޮތުގައި ކަނޑައެޅުމާ ގުޅިގެން އެ ސަރަހައްދުގައި ޕާކް ކުރާނެ ޖާގައެއް ހެދުމުގެ ގޮތުންނެވެ.