ރެކްޔަވިކް (ޖުލައި 6): އައިސްލޭންޑުގައި ހަފްތާއެއްގައި މަސައްކަތްކުރާ ދުވަސް މަދުކޮށް, ހަތަރު ދުވަހުގެ މަސައްކަތު ހަފްތާ އަޖުމަބެލުމަށް އެގައުމުގެ ސަރުކާރާއި ވެރިރަށް ރެކްޔަވިކްގެ ސިޓީ ކައުންސިލުން ކުރިއަށް ގެންދިޔަ ދިރާސާ ވަރަށް ކާމިޔާުކަމަށް ބުނެފިއެވެ.
އައިސްލެންޑުގައި 2015 އާއި 2019އާ ދޭތެރޭ 2،500 މީހުން ބައިވެރިކޮށްގެން ކުރިއަށްގެންދިޔަ ދިރާސާގެ ނަތީޖާ އެއްކޮށްފައި ވަނީ އިނގިރޭސިވިލާތުގެ ތިންކްޓޭންކް، އޮޓޮނޮމީއާއި އެސޯސިއޭޝަން ފޯ ސަސްޓެއިނަބަލް ޑިމޮކްރަސީ (އަލްޑާ)އިން ގުޅިގެންނެވެ. އެ ދިރާސާގައި އެކި ބާވަތުގެ މަސައްކަތް ކުރާ މީހުންގެ މަސައްކަތް ކުރާ ގަޑި، މުސާރައަށްނބަދަލު ގެނައުމަކާ ނުލައި، ހަފްތާއަކު 40 ގަޑިއިރުން 35 ގަޑިއިރަށް މަދުކުރި އެވެ. އޭގެ ތެރޭގައި އޮފީސްތަކާއި ހޮސްޕިޓަލްތަކާއި އިޖުތިމާއީ ހިދުމަތްތައް ދިނުމުގައި ހަރަކާތްތެރިވާ މީހުން ހިމެނުނެވެ.
އޮޓޮނޮމީން ބުނި ގޮތުގައި އެ ދިރާސާއިން ފާހަގަވީ މުވައްޒަފުން މަސައްކަތް ކުރާ ދުވަސްތައް މަދުކުރި ނަމަވެސް އެމީހުންގެ އުފެއްދުންތެރިކަން ދަށްނުވާ ކަމަށެވެ. އަދި ގިނަ ތަންތަނުގައި އުފެއްދުންތެރިކަން އިތުރުވި ކަމަށެވެ.
މީގެ އިތުރުން އެ ދިރާސާ ކުރިއަށް ދިޔަ އިރު މުވައްޒަފުންގެ ހާލަތު އެކި ގޮތް ގޮތުން ރަނގަޅުވި ކަމަށްވެސް އެ ރިޕޯޓުގައިވެ އެވެ. އެގޮތުން ސްޓްރެސް ހުރި ކަމަށް ބެލެވޭ މިންވަރު ދަށްވެ، މަސައްކަތާއި އަމިއްލަ ދިރިއުޅުމަށްވެސް އެކަށީގެންވާ ވަރަށް ވަގުތު ދެވި، ސިއްހަތުވެސް ރަނގަޅުވި ކަމަށް އޮޓޮނޮމީން ބުންޏެވެ.
އެ ދިރާސާއާ ގުޅިގެން މިހާރު އައިސްލޭންޑުގައި މަސައްކަތް ކުރާ އާބާދީގެ 86 ޕަސެންޓު މީހުން މަސައްކަތް ކުރާ ގަޑިތައް މަދުކޮށް ނުވަތަ މަދު ކުރުމުގެ މަސައްކަތް ކުރިއަށްދާ ކަމަށް އޮޓޮނޮމީގެ ރިޕޯޓުގައިވެ އެވެ.
އައިސްލެންޑުގެ އިތުރުން ސްޕެއިން އާއި ނިއު ޒިލެންޑުގައިވެސް މަސައްކަތް ކުރާ ދުވަސްތައް މަދު ކުރުމުގެ ނަތީޖާ ބެލުމަށް ދިރާސާތައް ކުރިއަށްގެންދެ އެވެ. އަދި ދާދި ފަހުން ޖަޕާނުގެ ސަރުކާރުން ވަނީ އެގައުމުގެ ކުންފުނިތަކުގައި މަސައްކަތް ކުރާ ދުވަސްތައް ހަފްތާއަކު ފަސް ދުވަހުން ހަތަރު ދުވަހަށް މަދު ކުރަން ލަފާ ދޭން ނިންމާފަ އެވެ.