ޓޯކިޔޯ (ޖޫން 28): ޖަޕާނުގެ ކުންފުނިތަކުގައި މަސައްކަތް ކުރާ ދުވަސްތައް ހަފްތާއަކު ފަސް ދުވަހުން ހަތަރު ދުވަހަށް މަދު ކުރުމަށް ސަރުކާރުން ލަފާ ދޭން ނިންމައިފި އެވެ.
ޖަޕާނުން ކޮންމެ އަހަރަކު ނެރޭ އިކޮނޮމިކް ޕޮލިސީ ގައިޑްލައިންސްގައި މިފަހަރު މަސައްކަތް ކުރާ ދުވަސްތައް މަދު ކުރަން ލަފާ ދޭން ސަރުކާރުން ނިންމާފައި ވަނީ މުވައްޒަފުންގެ އުފެއްދުންތެރިކަން އިތުރު ކުރުމަށް ކަމަށް އެ ރިޕޯޓުގައިވެ އެވެ. އަދި އެފަދަ ބަދަލެއް ގެނައުމުން، އާއިލީ ޒިންމާތައް ފަދަ ސަބަބުތަކާ ހެދި ވަޒީފާ ދޫކުރަން މަޖުބޫރުވާ މީހުންގެ އަދަދު މަދުވެގެން ދާނެ ކަމަށް އެރިޕޯޓުގައިވެ އެވެ.
މީގެ އިތުރުން، މަސައްކަތް ކުރާ ދުވަސްތައް މަދުވުމުން އިތުރަށް ތައުލީމު ހާސިލު ކުރުމަށް ނުވަތަ އެހެން ވަޒީފާތައް އަދާ ކުރުމަށް ހިތްވަރު ލިބޭނެ ކަމަށްވެސް ޖަޕާނުގެ ސަރުކާރުން ބުންޏެވެ. އަދި މުވައްޒަފުންނަށް ލިބޭ ބަންދު ދުވަސް އިތުރުވުމުން، އެދުވަސްތަކުގައި އެމީހުން ވިޔަފާރި ކުރުމާއި ހޭދަ ކުރާ މިންވަރު އިތުރުވެ، އިގުތިސާދު ކުރި އަރާނެ ކަމަށްވެސް ސަރުކާރުން އުއްމީދު ކުރެ އެވެ.
ނަމަވެސް އެފަދަ ބަދަލެއް ގެނައުމުން އުފެއްދުންތެރިކަން އިތުރުވުމާ ބެހޭ ގޮތުން ބައެއް ކުންފުނިތަކުން ސުވާލު އުފެއްދި ކަމަށް އެ ރިޕޯޓުގައިވެ އެވެ. އަދި ބައެއް މުވައްޒަފުން ވަނީ މަސައްކަތް ކުރާ ދުވަސްތައް މަދުވުމުން މުސާރަ ކުޑަ ކުރުމުގެ ބިރު އޮތް ކަމަށް ބުނެފަ އެވެ.
ޖަޕާނުގެ އިގުތިސާދާ ބެހޭ ސިޔާސަތުތަކުގެ ގައިޑްލައިންގައި އެ ބަދަލު ހިމަނާފައި ވަނީ އެގައުމުގެ މަސައްކަތުގެ ދާއިރާއަށް ވަންނަ ޒުވާނުންގެ އަދަދު މަދުވުމާއި އާބާދީ އިތުރުވާ މިންވަރު މަދުވުމާ ބެހޭ ގޮތުން ކަންބޮޑުވުންތައް އުފެދިފައިވާ ދަނޑިވަޅެއްގަ އެވެ.