މިއަހަރުގެ ރޯދަ މަހުގެ ފުރަތަމަ ދުވަހަކީ މާދަމާކަން އިއްޔެ ސައުދީ އަރަބިއްޔާއިން ވަނީ އިއުލާންކޮށްފައެވެ. އެއާއެކު، މިދުވަސްވަރު އެކި ގައުމުތަކުގައި އިރު އޮއްސޭ ވަގުތަށް ބަލާއިރު، އެންމެ ގިނަ އިރު ރޯދައަށް ތިބެން ޖެހޭނީ ގްރީންލޭންޑްއާއި އައިސްލޭންޑްގައި ދިރިއުޅޭ މީހުންކަން ވަނީ ހާމަވެފައެވެ.
އަލްޖަޒީރާއިން ރިޕޯޓްކޮށްފައިވާ ގޮތުގައި، ދުނިޔޭގެ އެންމެ ދެކުނުގެ ގައުމުތަކުގައި ދިރިއުޅޭ މުސްލިމުން އެވްރެޖްކޮށް 12 ގަޑިއިރު ރޯދަ ހިފާއިރު، ދުނިޔޭގެ އެންމެ އުތުރުގެ ގައުމުތަކުގައި ދިރިއުޅޭ މުސްލިމުން 17 ގަޑިއިރަށް ވުރެ ގިނަ އިރަށް ރޯދައަށް ތިބެންޖެހެއެވެ.
އޭގެ ތެރެއިން ގްރީންލޭންޑްއާއި އައިސްލޭންޑުގައި ދިރިއުޅޭ މީހުން 18 ގަޑިއިރާއި 12 މިނެޓު ވަންދެން ރޯދަ ހިފަން ޖެހެއެވެ. އެ ދެ ގައުމަކީ އާންމުކޮށް ވެސް، އެންމެ ގިނަ އިރު ވަންދެން މީހުން ރޯދައަށް ތިބެން ޖެހޭ ދެ ގައުމެވެ.
ދެން އެންމެ ގިނަ ވަގުތު ރޯދައަށް ތިބެން ޖެހޭނީ ފިންލޭންޑް، ސްވިޑެން އަދި ސްކޮޓްލޭންޑްގެ މީހުންނެވެ. އެ ގައުމުތަކުގައި ދުވާލު ވަގުތު 17 ގަޑިއިރަށް ދިގުދެމިގެންދެއެވެ.
ރޯދައަށް ހުންނަން ޖެހޭ ވަގުތު އެންމެ ކުރީ ނިއުޒީލެންޑްގައެވެ. އެ ގައުމުގައި ރޯދަ ހިފަން ޖެހޭނީ 12 ގަޑިއިރާއި 17 މިނެޓަށެވެ. އޭގެ އިތުރުން ޗިލީ، އުރުގުއޭ، އޮސްޓްރޭލިއާ އަދި ސައުތު އެފްރިކާގައި ވެސް ރޯދައަށް ތިބެން ޖެހޭނީ އެވްރެޖުކޮށް 12 ގަޑިއިރަށެވެ.
ރާއްޖޭގައި ވެސް ރޯދައަށް ހުންނަން ޖެހޭނީ އެވަރެޖުކޮށް 13 ގަޑިއިރަށެވެ.